បញ្ចប់ជើងទី១ ការពារជាតិ និងបឹងកេត រក្សាតំណែងកំពូលតារាង ខណៈនគរបាលជាតិ និងវេស្ទើន មិនស្គាល់ជាតិឈ្នះ

កីឡាជាតិ

ជាតិ

បញ្ចប់ជើងទី១ ការពារជាតិ និងបឹងកេត រក្សាតំណែងកំពូលតារាង ខណៈនគរបាលជាតិ និងវេស្ទើន មិនស្គាល់ជាតិឈ្នះ

13, Jun 2016 , 12:00 pm

រូបភាព

ដោយ:

ការប្រកួតដណ្តើមពានរង្វាន់ក្របខណ្ឌមិត្តហ្វូនខេមបូឌានលីករដូវកាល ២០១៦ បានប្រកួតបញ្ចប់ជើងទី១របស់ខ្លួនកាលពីម្សិលមិញ ដោយក្រុមបឹងកេតអង្គរ បានយកឈ្នះក្រុមណាហ្គាវើល ២-១ ចំណែកក្រសួងការពារជាតិយកឈ្នះក្រុមខេមបូឌានថាយហ្គឺរ ២-១។ ជ័យជម្នះនេះបានធ្វើឲ្យក្រុមទាំងពីរមាន២៤ពិន្ទុស្មើគ្នា ប៉ុន្តែបើគិតតាមរូបមន្ត Head to Head ទ័ពឈរក្នុងលំដាប់លេខ១ ចំណែកបឹងកេតឈរលំដាប់លេខ២ ទោះបីបឹងកេតមានគ្រាប់បាល់ចំណេញច្រើនជាងក៏ដោយ។

បន្ទាប់ពីបញ្ចប់ការប្រកួតជើងទី១កាលពីម្សិលមិញ ក្រុមបឹងកេតអង្គរ និងក្រុមក្រសួងការពារជាតិ នៅតែក្លាយជាក្រុមខ្លាំងនៅក្នុងតារាងដែលត្រូវប្រជែងគ្នានៅជើងទី២បន្តទៀត ដោយក្រសួងការពារជាតិឈរលំដាប់លេខ១ ចំណែកបឹងកេតអង្គរឈរក្នុងលំដាប់លេខ២ ជាមួយ២៤ពិន្ទុដូចគ្នា ទោះបីបឹងកេតមានគ្រាប់បាល់ចំណេញ២៤គ្រាប់ ក្រសួងការពារជាតិ១៧គ្រាប់ក៏ដោយ ប៉ុន្តែគេគិតតាមរូបមន្ត Head to Head ដែលបឹងកេតបានចាញ់ក្រសួងការពារជាតិកាលពីសប្តាហ៍ទី៤។

សម្រាប់ការប្រកួតបញ្ចប់ជើងទី១កាលពីម្សិលមិញនាពហុកីឡដ្ឋានជាតិនៅនាទីទី៥២ ប្រធានក្រុមបឹងកេត ឃួន ឡាបូរ៉ាវី សម្រេចបានមួយគ្រាប់ មុនខ្សែប្រយុទ្ធវ័យក្មេង ចាន់ វឌ្ឍនាកា សម្រេចមួយគ្រាប់នៅនាទី៥៨ ដើម្បីជួយឲ្យបឹងកេតអង្គរយកឈ្នះលើក្រុមណាហ្គាវើលក្នុងលទ្ធផល ២-១។ ចំណែកមួយគ្រាប់របស់ ណាហ្គាវើល សម្រេចដោយកីឡាករពាក់អាវលេខ៤៥ ZOGBE GBAYORO ANDERSON នៅនាទីទី៧៣។

ជាមួយគ្នានេះ ក្រសួងការពារជាតិ បានយកឈ្នះលើក្រុមខេមបូឌានថាយហ្គឺរ ២-១ ផងដែរ។ ជ័យជម្នះរបស់ក្រសួងការពារជាតិនេះ គឺសម្រេចបានដោយកីឡាករជនជាតិកូរ៉េ CHOE MYONG HO តែម្នាក់ប៉ុណ្ណោះ នៅនាទីទី៤០ និង៥០ ខណៈមួយគ្រាប់របស់ខេមបូឌានថាយហ្គឺរសម្រេចដោយកីឡាករពាក់អាវលេខ៩ MURAMATSU TOMOKI នៅនាទី៧ ។ CHOE ក៏ក្លាយជាកីឡាករដំបូងផងដែរ ដែលរកគ្រាប់បាល់បញ្ចូលទីនៅរាល់ការប្រកួតនៅជើងទីមួយ។ បច្ចុប្បន្ន CHOE មាន១៤គ្រាប់ ខណៈវឌ្ឍនាកា មាន១៣គ្រាប់។

គួរបញ្ជាក់ថា សម្រាប់ការប្រកួតកាលពីម្សិលមិញនេះដែរ ក្រុមម្ចាស់ផ្ទះភ្នំពេញក្រោនបានយកឈ្នះក្រុមស៊ីម៉ាក់ ៤-២ ចំណែក ព្រះខ័នរាជស្វាយរៀង បានលត់ក្រុម អាស៊ីអឺរ៉ុបយូណាយធីត ៤-០។ ក្នុងជើងទី១នេះ ព្រះខ័នរាជស្វាយរៀង ឈរក្នុងលំដាប់លេខ៣ ដោយមាន១៦ ឬឯណាហ្គាវើល ឈរលំដាប់លេខ៤ ដោយមាន១៤ ខណៈភ្នំពេញក្រោនឈរលំដាប់លេខ៥ ដោយមាន១៤ពិន្ទុ។ ខេមបូឌានថាយហ្គឺរឈរលំដាប់៦ ដោយមាន១៣ពិន្ទុ ឬឯ ស៊ីម៉ាក់ ឈរលេខរៀងទី៧ ដោយមាន៧ពិន្ទុ ខណៈក្រុមអាស៊ីអឺរ៉ុប ឈរលេខរៀងទី៨ ដោយមាន៥ពិន្ទុ ចំណែកក្រុមអគ្គស្នងការនគរបាលជាតិឈរលេខរៀងទី៩ដោយមាន៥ និងក្រុមវេស្ទើនភ្នំពេញឈរនៅបាត់តារាងជាមួយ៤ពិន្ទុ។ ក្រុមអគ្គស្នងការនគរបាលជាតិ និងវេស្ទើនភ្នំពេញជាក្រុមដែលមិនធ្លាប់ស្គាល់ពាក្យថាឈ្នះសម្រាប់ការប្រកួត៩ដង ក្នុងជើងទី១នេះ៕