កីឡាជាតិ
ជាតិ
កីឡាករកាយសម្ព័ន្ធកម្ពុជា៣រូប និងចៅក្រមមួយរូបចូលរួម World Championships នៅកូរ៉េខាងត្បូង
× សហព័ន្ធកីឡាកាយសម្ព័ន្ធកម្ពុជាបានបញ្ជូនកីឡាករចំនួន៣រូប(ស្រី១រូប) និងចៅក្រមមួយរូប ដើម្បីចូលរួមប្រកួត និងកាត់ក្តីជាលើកទី១ក្នុងព្រឹត្តិការណ៍ប្រកួតជើងឯកកាយសម្ព័ន្ធអាអេរ៉ូប៊ិកពិភពលោកលើកទី១៤ ក្នុងទីក្រុង INCHEON ប្រទេសកូរ៉េខាងត្បូង(14th Aerobic Gymnastics World Championships 2016) ចាប់ផ្តើមពីថ្ងៃទី១៣ ដល់ថ្ងៃទី១៩ ខែមិថុនា។
កីឡាករកីឡាការិនីកាយសម្ព័ន្ធកម្ពុជាចំនួន៣រូប និងចៅក្រមមួយរូប និងចូលរួមជាលើកដំបូងក្នុងព្រឹត្តិការណ៍ការប្រកួតជើងឯកពិភពលោកកីឡាកាយសម្ព័ន្ធអាអេរ៉ូប៊ិកលើកទី១៤ (14th Aerobic Gymnastics World Championships 2016) នៅទីក្រុង INCHEON សាធារៈរដ្ឋកូរ៉េខាងត្បូង។ ការប្រកួតនេះក៏មានវត្តមានកាត់ក្តីរបស់ចៅក្រមកម្រិតអន្តរជាតិរបស់កម្ពុជាមួយរូបផងដែរ។ កីឡាករកម្ពុជាទាំងនេះនឹងត្រូវប្រជែងជាមួយកីឡាករកីឡាការិនីដែលមកពីបណ្តាប្រទេសជាច្រើននៅលើសកលលោក។
លោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជា និងជាប្រធានប្រតិភូបានបញ្ជាក់ថា កីឡាករកម្ពុជាទាំងនោះរួមមានកីឡាករ ជឿន ចាន់បូរី និងកីឡាករ សោ សុផេង ដែលពួកគេទាំងពីរប្រកួតលើវិញ្ញាសាឯកត្តជនបុរស និងកីឡាការិនី សោ សុគីម ប្រកួតលើវិញ្ញាសាម៉ិចគូ។ ពួកគេទាំងនេះនឹងប្រជែងជាកីឡាករកីឡាការិនីជាងមួយពាន់នាក់ផ្សេងទៀតដែលមកពី៤៥ប្រទេសនៅលើពិភពលោក។ ការប្រកួតនេះសហព័ន្ធកីឡាកាយសម្ព័ន្ធកម្ពុជាក៏បានបញ្ជូនចៅក្រមកម្រិតអន្តរជាតិម្នាក់ដើម្បីកាត់ក្តីផងដែរ គឺ លោក ស៊ុន ស្រ៊ន។
លោក ស៊ុន ស្រ៊ន គ្រូបង្វឹកក្រុមជម្រើសកីឡាកាយសម្ព័ន្ធ និងជាបេក្ខភាពចៅក្រមកាត់ក្តីនៃការប្រកួតនេះបានបរិយាយថា ទោះបីជានេះជាលើកទីមួយសម្រាប់ការចូលរួមរបស់កម្ពុជាក៏ពិតមែន ប៉ុន្តែនេះជាលើកទី៣ហើយសម្រាប់រូបលោកក្នុងការធ្វើជាចៅក្រមកាត់ក្តីកម្រិតអន្តរជាតិនេះ ដោយលើកមុនៗនៅចុងឆ្នាំ២០១៣ និងចុងឆ្នាំ២០១៥ ក្នុងក្រុងហូជីមិញប្រទេសវៀតណាមដូចគ្នា។
លោកបានក្លាយជាចៅក្រមអន្តរជាតិតាំងពីឆ្នាំ២០១៣ មកម្ល៉េះដោយធ្វើការប្រឡងនៅទីក្រុងបាងកក ប្រទេសថៃ ក្នុងកម្រិត៣ ប៉ុន្តែដោយសារលោកជាចៅក្រមថ្មីដែលមិនមានបទពិសោធន៍សហព័ន្ធអន្តរជាតិទម្លាក់លោកមកត្រឹមកម្រិត៤ ដែលជាកម្រិតទាបបំផុត។ មុននឹងក្លាយជាចៅក្រមកម្រិតអន្តរជាតិនេះ លោកគឺជាអតីតកីឡាករកាយសម្ព័ន្ធតាំងពីឆ្នាំ២០០២ ហើយបានក្លាយជាកីឡាករជម្រើសជាតិក្នុង២០០៥ ដល់ថ្ងៃទី២០១៣។
សម្រាប់ការចូលរួមលើកទី១នេះដែរ ប្រធានប្រតិភូរូបនេះរំពឹងថា នឹងទទួលបានលទ្ធផលល្អដើម្បីបំបែកឯកត្តកម្មដែលបានចូលរួមនាពេលកន្លងមក ជាពិសេសសង្ឃឹមថាកីឡាករកីលឡាការិនីកម្ពុជាក៏ដូចជារូបលោកផ្ទាល់នឹងអាចស្រូបយកនូវបទពិសោធន៍ និងបច្ចេកទេសថ្មីៗពីបណ្តាប្រទេសចូលរួមទាំងនោះ។
លោកលើកឡើងថា៖«ឬឯលទ្ធផលយើងសង្ឃឹមថានឹងអាចបំបែកឯកត្តកម្មរបស់យើងពីមុនមក ក្នុងនាមយើងជាគ្រូកម្រិតបច្ចេកទេសយ៉ាងណាយើងដឹងច្បាស់ហើយ ប៉ុន្តែកីឡាប្រសិនបើយើងហាត់ហើយមិនចូលរួមប្រកួតជាស្ថាប័នផ្សេងៗ ឬជាលក្ខណៈអន្តរជាតិនោះទេ មានន័យថាដូចកាំបិតដែលសម្លៀងទុកចោលអញ្ចឹង ដូចវានៅតែអត់មុតដដែល ដូច្នេះកីឡាក៏ដូចគ្នាអញ្ចឹងដែរ បើមិនបានចូលរួមប្រកួតផ្សេងៗគឺមិនមានការរីកចម្រើន»។
ក្នុងចំណោមប្រទេសចូលរួមទាំង៤៥ នោះត្រូវបានលោកអគ្គលេខាធិការរូបនេះបានវាយតម្លៃថា កម្ពុជាមានសមត្ថភាពប្រហាក់ប្រហែលគ្នាទៅនឹងបណ្តាប្រទេសនៅក្នុងតំបន់អាស៊ី និងជាមួយបណ្តាប្រទេសនៅអឺរ៉ុបមួយចំនួនផងដែរ។ ហើយក្នុងចំណោមប្រទេសទាំងនោះ បារាំង អេស្ប៉ាញ រ៉ូម៉ានី ជប៉ុន កូរ៉េ និងចិន ជាប្រទេសដែលមានសមត្ថភាពដែលកម្ពុជាមានការព្រួយបារម្ភ។
សម្រាប់ការចូលរួមក្នុងព្រឹត្តិការណ៍លំដាប់ពិភពលោកនេះ កម្ពុជានឹងទទួលបាននូវបទពិសោធន៍ និងបច្ចេកទេសលំដាប់ពិភពលោក ជាពិសេសកីឡាករកីឡាការិនីនឺងទទួលបានចំណេះដឹងពីអ្វីដែលពិភពលោកកំពុងធ្វើក្នុងវិស័យកីឡាអាអេរ៉ូប៊ិកមួយនេះ។
លោក ណយ ផាណា បានរៀបរាប់ថា៖«ជាការពិតណាស់ព្រឹត្តិការណ៍លំដាប់ពិភពលោក ដូច្នេះអ្វីដែលយើងទទួលបានមកវិញទីមួយគឺលក្ខណៈបច្ចេកទេស ទី២ទទួលបានការផ្លាស់ប្តូរបទពិសោធន៍ជាលក្ខណៈពិភពលោក និងទី៣គឺកីឡាករកីឡាការិនីគាត់បានមើលឃើញពីអ្វីដែលពិភពលោកកំពុងដំណើរការបច្ចុប្បន្ននៅលើពិភពលោកនៃវិស័យកីឡាកាយសម្ព័ន្ធអាអេរ៉ូប៊ិកនេះ»។
គួរបញ្ជាក់ថា កីឡាករកីឡាការិនីកាយសម្ព័ន្ធ និងចៅក្រមព្រមទាំងគណប្រិតភូ បានចាកចេញពីភ្នំពេញដើម្បីចូលរួមប្រកួតនៅប្រទេសកូរ៉េកាលពីយប់ថ្ងៃទី១២ ខែមិថុនា ម្សិលមិញនេះ ដោយគ្រោងនឹងមកដល់កម្ពុជាវិញនៅថ្ងៃទី២០ ខែមិថុនា ខាងមុខនេះ៕
Tag:
កាយសម្ព័ន្ធ
ណយ ផាណា
World Championship 2016
© រក្សាសិទ្ធិដោយ thmeythmey.com