មគ្គុទ្ទេសក៍២០រូបចេញទៅម៉ាកាវចូលរួមវគ្គបណ្តុះបណ្តាលស្តីពីវិស័យទេសចរណ៍

ជាតិ

មគ្គុទ្ទេសក៍២០រូបចេញទៅម៉ាកាវចូលរួមវគ្គបណ្តុះបណ្តាលស្តីពីវិស័យទេសចរណ៍

14, Jun 2016 , 10:36 am

រូបភាព

ដោយ: អុីសា រ៉ហានី (Isa Rohany)

ក្រុមមគ្គុទ្ទេសក៍ចំនួន ២០រូប ក្នុងនោះមានមន្ត្រីនៃអាជ្ញាធរជាតិអប្សរា៤រូបផងនោះ បានចេញដំណើរទៅកាន់ទីក្រុងម៉ាកាវ សាធារណៈរដ្ឋប្រជាមានិតចិនហើយ កាលពីថ្ងៃទី១៣មិថុនាម្សិលមិញ។ ការចេញដំណើរនេះ គឺដើម្បីចូលរួមវគ្គបណ្តុះបណ្តាលខ្លីមួយ ស្តីពីវិស័យទេសចរណ៍ ដែលរៀបចំឡើងដោយ អង្គការទេសចរណ៍ពិភពលោក ហៅកាត់ថា UNWTO ។

កាលម្សិលមិញ គេឃើញមានវត្តមានលោក សុខ សង្វារ អគ្គនាយករងអាជ្ញាធរជាតិអប្សរា បានជូនដំណើរដល់ក្រុមមគ្គុទ្ទេសក៍ដល់ព្រលានយន្តហោះអន្តរជាតិភ្នំពេញ។ ក្នុងនោះដែរ លោក សុខ សង្វារ បានផ្តាំផ្ញើដល់មគ្គុទ្ទេសក៍ទាំងអស់ ដែលត្រូវទៅបំពេញភារកិច្ចនៅទីក្រុងម៉ាកាវ ត្រូវធ្វើយ៉ាងណា ក្រេបយកចំណេះដឹង និងបទពិសោធន៍ថ្មីៗពីវគ្គបណ្តុះបណ្តាលនោះ សម្រាប់មកប្រើប្រាស់ក្នុងប្រទេសកម្ពុជា។ ជាងនេះទៅទៀត ក្រុមមគ្គុទ្ទេសក៍ ត្រូវចែករម្លែក និងផ្សព្វផ្សាយពីវិស័យទេសចរណ៍នៅកម្ពុជា ទៅដល់បណ្តាប្រទេសផ្សេងៗ ដើម្បីឲ្យពួកគេកាន់តែច្បាស់ពីប្រទេសកម្ពុជា។

គួររម្លឹកថា អាជា្ញធរជាតិអប្សរាបានសហការគ្នាជាមួយអង្គការទេសចរណ៍ពិភពលលោកបានប្រកាសជូនដំណឹងប្រឡងជ្រើសរើសមគ្គុទេ្ទសក៍ទេសចរណ៍ ដើម្បីទៅចូលរួមវគ្គបណ្តុះ បណ្តាលខ្លីនៅទីក្រុងម៉ាកាវ សាធារណរដ្ឋប្រជាមានិតចិនកាលពីថ្ងៃទី២៧ ខែមេសា ឆ្នាំ២០១៦ ។ កិច្ចសហការនេះក៏មានការចូលរួមធ្វើជា គណៈកម្មការជ្រើសរើសពីសំណាក់តំណាងក្រសួងទេសចរណ៍និងក្រសួងវប្បធម៌និងវិចិត្រសិល្បៈផងដែរ។ មគ្គុទ្ទេសក៏ទេសចរណ៍ទាំងអស់បានចូលរួមវគ្គបណ្តុះបណ្តាលនេះដោយឥតថ្លៃ បូករួមទាំងការធ្វើដំណើរ និងការស្នាក់នៅ ក្រោមការឧបត្ថមពីអង្គការទេសចរណ៍ពិភពលោកផងដែរ៕