កីឡាជាតិ
ជាតិ
×![]()
ការប្រកួតដណ្តើមពានរង្វាន់សម្តេច ហ៊ុន សែន លើកទ១០ នឹងធ្វើការប្រកួតបញ្ចប់ក្នុងពូល C និង D នាល្ងាចនេះ ដោយ ភ្នំពេញក្រោន ត្រូវប្រជែងជាមួយ មជ្ឈមណ្ឌលកំចាត់មីនកម្ពុជា ដើម្បីដណ្តើមឈរកំពូលតារាងក្នុងពូល C ខណៈសៀមរាបអង្គរ ជួប ខេត្តស្វាយរៀង ក្នុងពូល D ប៉ុន្តែវាសនាក្រុមទាំងពីរក្នុងកាឡើងទៅវគ្គបន្តស្ថិតនៅលើក្រុមណាហ្គាវើល ដែលត្រូវជួបប្រកួតជាមួយ អគ្គស្នងការនគរបាលជាតិ នាល្ងាចនេះនៅពហុកីឡដ្ឋានជាតិ។ 
ពានរង្វាន់សម្តេច ហ៊ុន សែន ឆ្នាំ២០១៦ សៀមរាបអង្គរត្រូវប្រជែងជាមួយខេត្តស្វាយរៀងក្នុងពូល D នៅកីឡដ្ឋានខេត្តសៀមរាបនាលា្ងចនេះ ខណៈក្រុមទាំងពីរត្រូវការឈ្នះដូចគ្នាដើម្បីរង់ចាំឡើងទៅប្រកួតនៅវគ្គបន្ត ប៉ុន្តែវាសនាក្រុមទាំងពីរត្រូវពឹងផ្អែកលើក្រុមណាហាវើល ប្រសិនបើណាហ្គាវើលឈ្នះលើក្រុមអគ្គស្នងការនគរបាលជាតិ(ប៉ូលិស) នោះក្រុមទាំងពីរសៀមរាបអង្គរ និងខេត្តស្វាយរៀងមានសង្ឃឹមច្រើនក្នុងការឡើងទៅវគ្គបន្ត។
ជាមួយគ្នានេះ ក្រុមប៉ូលិស ក៏ត្រូវការឈ្នះណាហ្គាវើលផងដែរ ដើម្បីបាន៣ពិន្ទុបន្ថែមសម្រាប់ឡើងទៅវគ្គបន្ត ព្រោះបច្ចុប្បន្នក្រុមនេះមាន៨ពិន្ទុ ខណៈសៀបរាបអង្គរ និងខេត្តស្វាយរៀងមាន៧ពិន្ទុ ចំណែកណាហ្គាវើលជាក្រុមដែលត្រូវឡើងទៅវគ្គបន្តមុនគេតំណាងពូល D ដោយមាន១២ពិន្ទុ។ ទន្ទឹមនឹងនេះ ក្រុមឈរនៅបាតតារាង ខេត្តក្រចេះ និងខេត្តព្រះវិហារ ដែលជាក្រុមមិនស្គាល់ពាក្យឈ្នះ នឹងប្រកួតបង្គ្រប់កិច្ចនៅក្នុងពូល D ផងដែរ។
ចំណែក ក្រុមភ្នំពេញក្រោន នឹងប្រើកីឡដ្ឋាន RSN របស់ខ្លួន ដើម្បីប្រជែងគ្នាជាមួយក្រុមភ្ញៀវមជ្ឈមណ្ឌលកំចាត់មីនកម្ពុជា(ស៊ីម៉ាក់) ដើម្បីដណ្តើមឈរនៅកំពូលតារាងក្នុងពូល C ដោយក្រុមទាំងពីរមាន១២ពិន្ទុដូចគ្នាបន្ទាប់ពីឆ្លងកាត់៤ប្រកួតឈ្នះទាំង៤ប្រកួត និងជាក្រុមដែលត្រូវឡើងទៅប្រកួតនៅវគ្គបន្តតំណាងឲ្យពូល C ផងដែរ។
ក្នុងពូល C ដដែល ក្រុមម្ចាស់ផ្តះ ខេត្តប៉ៃលិន ត្រូវជួបប្រកួតជាមួយ ខេត្តកំពត ខណៈវេស្ទើនភ្នំពេញ ប្រើកីឡដ្ឋានវេស្ទើន របស់ខ្លួន ស្វាគមន៍ក្រុមភ្ញៀវ ខេត្តកំពង់ស្ពឺ។ គួរបញ្ជាក់ថា ការប្រកួតទាំងពីរគូនេះ គឺជាការប្រកួតបង្គ្រប់កិច្ចក្នុងពូល C ប៉ុណ្ណោះ៕
កម្មវិធីប្រកួតពានរង្វាន់សម្តេច ហ៊ុន សែន ថ្ងៃទី១៥ ខែមិថុនា នេះ៖
ពូល C៖
-ម៉ោង៣:៣០-ខេត្តប៉ៃលិន ជួប ខេត្តកំពត នៅកីឡដ្ឋានខេត្តប៉ៃលិន
-ម៉ោង៣:៣០-វេស្ទើនភ្នំពេញ ជួប ខេត្តកំពង់ស្ពឺ នៅកីឡដ្ឋានវេស្ទើន
-ម៉ោង១៨:០០-ភ្នំពេញក្រោន ជួប មជ្ឈមណ្ឌលកំចាត់មីនកម្ពុជា នៅកីឡដ្ឋាន RSN
ពូល D៖
-ម៉ោង៣:៣០-ខេត្តក្រចេះ ជួប ខេត្តព្រះវិហារ នៅកីឡដ្ឋានខេត្តក្រចេះ
-ម៉ោង៣:៣០-សៀមរាបអង្គរ ជួប ខេត្តស្វាយរៀង នៅពហុកីឡដ្ឋានខេត្តសៀមរាប
-ម៉ោង១៨:០០-ណាហ្គាវើល ជួប អគ្គស្នងការនគរបាលជាតិ នៅពហុកីឡដ្ឋានជាតិ។
Tag:
បាល់ទាត់
Hun Sen Cup 2016
© រក្សាសិទ្ធិដោយ thmeythmey.com
