ក្លិបកីឡាបាល់ទាត់ក្រសួងការពារជាតិដែលកំពុងឈរលេខមួយលើតារាងក្របខណ្ឌមិត្តហ្វូនខេមបូឌាលីកឆ្នាំ២០១៦ មានកំណត់ត្រាដ៏គួរឲ្យភ្ញាក់ផ្អើលតាមរយៈការនាំចូលកីឡាករជម្រើសជាតិកូរ៉េខាងជើងរហូតដល់ទៅ២នាក់ គឺខ្សែប្រយុទ្ធ Ri Hyok-chol និងខ្សែការពារ Jang Song-hyok ដើម្បីពង្រឹងក្លិបសម្រាប់ការប្រកួតជើងទីពីរ។ ជាលើកទីមួយក្នុងប្រវត្តិសាស្ត្របាល់ទាត់កម្ពុជា ដែលក្លិបកម្ពុជាមានកីឡាករបរទេសដែលកំពុងមានឈ្មោះក្នុងបញ្ជីក្រុមជម្រើសជាតិរបស់ពួកគេ។
តាមរយៈទំព័រហ្វេសប៊ុកផ្លូវការរបស់ខ្លួន ក្លិបក្រសួងការពារជាតិ បានអះអាងកាលពីថ្ងៃទី១៤ ខែមិថុនា ថា ពួកគេទទួលបានកីឡាករជម្រើសជាតិកូរ៉េខាងជើងពីរនាក់មករួមក្លិបសម្រាប់ការប្រកួតជើងទីពីរក្របខណ្ឌមិត្តហ្វូនខេមបូឌានលីកឆ្នាំ២០១៦ ដោយក្លិបមានមហិច្ឆតាខ្ពស់ក្នុងការលើកពានក្របខណ្ឌកំពូលជាលើកដំបូង។
Ri Hyok-chol និង Jang Song-hyok គឺជាកីឡាករដែលស្ថិតនៅក្នុងក្រុមជម្រើសជាតិកូរ៉េខាងជើងនៅឡើយ។ Ri Hyok-chol ដែលត្រូវពាក់លេខ៣៣សម្រាប់ក្រសួងការពារជាតិ បានជាប់ក្នុងជម្រើសជាតិកូរ៉េខាងជើងតាំងពីឆ្នាំ២០០៤មក ដោយបានស៊ុតបាល់បញ្ចូលទីចំនួន៧គ្រាប់ក្នុងចំណោមការបង្ហាញខ្លួនជិត២០លើក។
មុនមកកាន់ក្លិបក្រសួងការពារជាតិ Ri Hyok-chol បានចំណាយពេលពីរដូវកាលនៅក្លិប Rimyongs Sports Club នៃក្របខណ្ឌ DPR Korea League។ ក្នុងការប្រកួតជម្រុះ World Cup ខ្សែប្រយុទ្ធ Ri Hyok-chol ក៏បានស៊ុតបាល់បញ្ចូលទីចំនួន៣គ្រាប់ផងដែរ ដោយ១គ្រាប់នាជ័យជម្នះ ៤-១ លើថៃ កាលពីឆ្នាំ២០០៤ ១គ្រាប់នាជ័យលើអ៊ូបេគីស្ថាន ៤-២ នៅព្យុងយ៉ាង និង១គ្រាប់នាបរាជ័យ ៣-១ ដោយសារអ៊ូបេគីស្ថានវិញ នៅក្រុង Tashkent កាលពីឆ្នាំ២០១៥ ។ នាជំនួបវគ្គជម្រុះ ជាមួយហ្វីលីពីនកាលពីថ្ងៃទី២៩ ខែមិនា ឆ្នាំ២០១៦ Ri Hyok-chol ក៏ស្ថិតក្នុងជម្រើសដំបូងរបស់កូរ៉េខាងជើងដែលដឹកនាំដោយលោក Kim Chang-bok ផងដែរ។
រីឯខ្សែការពារ Jang Song-hyok អាយុ២៥ឆ្នាំ បានលេងឲ្យក្លិប Rimyongs Sports Club ពីឆ្នាំ២០១១ ដល់ឆ្នាំ២០១៦ ។ Song-hyok ជាសមាជិកឈុត U-20 World Cup របស់កូរ៉េខាងជើងកាលពីឆ្នាំ២០១១ ។ កំណត់ត្រាដ៏គួរឲ្យកត់សម្គាល់នោះ ខ្សែការពាររូបនេះ បានស៊ុតបាល់ប៉េណាល់ទីនៅនាទី ៨៧ ដើម្បីនាំឲ្យកូរ៉េខាងជើងឈ្នះតួកមេនីស្ថាន ២-១ នៅទីក្រុង Kathmandu ប្រទេសនេប៉ាល់ ដើម្បីលើកពាន AFC Challenge Cup ឆ្នាំ២០១២ ។
នាការប្រកួតវគ្គជម្រុះ World Cup កាលពីឆ្នាំ២០១២ Song-hyong បានស៊ុតបាល់ប៉េណាល់ទីចូល ក្នុងជំនួបស្មើ ១-១ ជាមួយតាហ្ស៊ីគីស្ថាន នៅកីឡដ្ឋាន 20 Years of Independence Tajikistan។ នារយៈចុងក្រោយនេះ Song-hyong មិនទទួលបានការកោះហៅពីគ្រួបង្វឹកក្រុមជម្រើសជាតិឡើយ។ សម្រាប់ក្រុមក្រសួងការពារជាតិ Song-hyong នឹងពាក់លេខ៣៤ ។
កីឡាករទាំងពីរនាក់បានមកដល់កម្ពុជាហើយនៅយប់នេះ ដោយត្រូវចូលរួមជាមួយមិត្តរួមជាតិខ្លួនពីរនាក់ទៀតដែលស្ថិតនៅក្នុងក្រសួងការពារជាតិស្រាប់ ដែលក្នុងនោះ មានខ្សែប្រយុទ្ធ Choe Myong-ho ដែលបានស៊ុតបាល់បញ្ចូលទីនៅរាល់ការប្រកួតក្នុងជើងទីមួយ ដោយមានសរុប១៤គ្រាប់នាំមុខគេលើតារាង និងខ្សែបម្រើ Kim Kyong-hon ដែលមាន៤គ្រាប់នៅក្នុងដៃផងដែរ។
លោក ខូវ ឆាយ អ្នកចាត់ការទូទៅក្លិបក្រសួងការពារជាតិបានប្រាប់ពីគោលបំណងថា ការនាំចូលកីឡាករជើងខ្លាំងជនជាតិកូរ៉េខាងជើងទាំងពីរនាក់នេះដោយសារក្រសួងការពារជាតិចង់សាងប្រវត្តិសាស្ត្រល្អសម្រាប់ក្លិបតាមរយៈការលើកពានក្របខណ្ឌលីកនៅក្នុងឆ្នាំនេះ ម្យ៉ាងទៀតចង់ឲ្យក្លិបរបស់ខ្លួនបន្តឈរលំដាប់លេខ១នៅក្នុងជុំទី២ ទោះបីជុំទី១ខ្លួនឈរលំដាប់លេខ១ក៏ដោយ ប៉ុន្តែដោយសារមានក្រុមបឹងកេតតាមប្រកៀកប្រកិតនឹងក្រុមរបស់ខ្លួន។
លោកបានបញ្ជាក់ថា៖«ការនាំចូលកីឡាករជនជាតិកូរ៉េខាងជើងពីរនាក់នេះ គោលបំណងធំគឺចង់ឲ្យក្រុមក្រសួងការពារជាតិលើកពាននៅឆ្នាំនេះ ដើម្បីបំបែកឯកត្តកម្មជូនក្លិបក្រសួងការពារជាតិ ព្រោះបច្ចុប្បន្នយើងឃើញហើយថា បឹងកេតអង្គរកំពុងតាមប្រកៀកប្រកិតយើង»។
លោក ខូវ ឆាយ បានបញ្ជាក់ថា កីឡាករកូរ៉េខាងជើងទាំងពីរនេះបានចុះកិច្ចសន្យាលេងឲ្យក្លិបក្រសួងការពារជាតិរយៈពេល២ឆ្នាំ។
ដោយសារបច្ចុប្បន្នក្លិបក្រសួងការពារជាតិមានកីឡាករបរទេសរហូតដល់៤នាក់ ហើយសម្រាប់ការចូលថ្មី២នាក់បន្ថែមនេះវាធ្វើក្លិបមួយនេះមានកីឡាករបរទេសរហូតដល់៦នាក់។ ប៉ុន្តែបើតាមច្បាប់នៃការប្រកួតក្រមខណ្ឌមិត្តហ្វូនខេមបូឌានលីក គឺក្លិបមួយតម្រូវឲ្យមានកីឡាករបរទេសតែ៥នាក់ប៉ុណ្ណោះ ពោលគឺក្រសួងការពារជាតិមានកីឡាករបរទេសលើសម្នាក់។ ពាក់ព័ន្ធទៅនឹងបញ្ហានេះ លោក ខូវ ឆាយ បានបកស្រាយថា៖«ការបន្ថែមកីឡាករជនជាតិកូរ៉េខាងជើងទាំងពីរនាក់នេះ ដើម្បីយើងជំនួសកីឡាករជនជាតិជប៉ុន Kazu Yanagidat ដែលត្រូវទៅលេងឲ្យក្លិបស៊ីម៉ាក់»។
ជាមួយគ្នានេះ អ្នកចាត់ការទូទៅក្លិបក្រសួងការពារជាតិ បានប្រាប់ពីមូលហេតុដែលអាចនាំចូលកីឡាករជនជាតិជប៉ុនទាំងពីរនាក់នេះថា ដោយសារ លោក មានទំនាក់ទំនងការទូតល្អជាមួយសហព័ន្ធកីឡាបាល់ទាត់កូរ៉េខាងជើង ក៏ដូចជារដ្ឋាភិបាលកូរ៉េខាងជើង ជាពិសេសកាលពីខែតុលា ឆ្នាំ២០១៥ លោកបានទៅបំពេញទស្សនកិច្ចនៅប្រទេសកូរ៉េខាងជើង ហើយលោកក៏បានពិភាក្សាពីបញ្ហានេះផងដែរ ហើយលោកបានបញ្ជាក់ថា៖«ការនាំមកនេះមិនមែនដោយសារយើងលុយច្រើននោះទេ គឺដោយសារយើងមានទំនាក់ទំនងការទូតល្អ ព្រោះប្រទេសកូរ៉េខាងជើងជាប្រទេសកុម្មុយនីសគេមិនសូវផ្តោតសំខាន់ទៅលើលុយនោះទេ»៕
SaveSaveSave