សម្ដេច ហ៊ុន សែន ស្នើឲ្យប្រមុខរដ្ឋវៀតណាម បន្តពង្រឹងកិច្ចសហប្រតិបត្តិការភាគីទាំងពីរ

ជាតិ

នយោបាយជាតិ

សម្ដេច ហ៊ុន សែន ស្នើឲ្យប្រមុខរដ្ឋវៀតណាម បន្តពង្រឹងកិច្ចសហប្រតិបត្តិការភាគីទាំងពីរ

15, Jun 2016 , 7:27 pm

រូបភាព

ដោយ: ថ្មីៗ

សម្ដេចនាយករដ្ឋមន្ត្រី ហ៊ុន សែន បានទទួលជួបពិភាក្សាការងារជាមួយ លោក ត្រិន ដាយក្វាង (Tran Dai Quang ) ប្រធានរដ្ឋ នៃសាធារណៈរដ្ឋសង្គមនិយមវៀតណាម នៅវិមានសន្តិភាព។ ដំណើរទស្សនកិច្ចមកកម្ពុជាជាលើកដំបូងរបស់លោក ត្រឹន ដាយក្វាង ពេលនេះគឺដើម្បីបញ្ជាក់អំពីជំហរ និងគោលការណ៍នៃទំនាក់ទំនង សហប្រតិបត្តិការនៃប្រទេសទាំងពីរ។

បើតាមហ្វេសប៊ុកសម្ដេច ហ៊ុន សែន ក្នុងជំនួបពិភាក្សាគ្នានោះ សម្ដេចបានស្នើឲ្យប្រធានរដ្ឋវៀតណាម បន្តជុំរុញកិច្ចពិភាក្សាលើបញ្ហាតភ្ជាប់ខាងសេដ្ឋកិច្ចរវាងប្រទេសទាំងពីរឲ្យកាន់តែល្អប្រសើរឡើងថែមទៀត។ប្រមុខរដ្ឋាភិបាលកម្ពុជា ក៏បានស្នើឲ្យភាគីវៀតណាម រៀបចំនូវកម្មវិធីមួយចំនួនដូចជាសកម្មភាពប្រតិបត្តិការសង្គ្រោះបន្ទាន់នៅតាមព្រំដែន ការប្រកួតប្រជែងកីឡា និងការសម្តែងសិល្បៈមិត្តភាព ដើម្បីពង្រឹងមិត្តភាពនៃប្រទេសទាំងពីរផងដែរ។

ជាការឆ្លើយតបលោក ត្រិន ដាយក្វាង ឯកភាពចំពោះការស្នើរបស់សម្តេច ហ៊ុន សែន ដោយលោកសន្យាខិតខំជុំរុញកិច្ចសហប្រតិបត្តិការនេះឲ្យបានទទួលជោគជ័យដែលនាំមកនូវផលប្រយោជន៌សម្រាប់ប្រជាជាតិទាំងពីរ។ ជាមួយគ្នានេះ ប្រមុខរដ្ឋវៀតណាម ក៏បានគោរពអញ្ជើញ សម្តេច ហ៊ុន សែន ទៅបំពេញទស្សនកិច្ចនៅប្រទេសវៀតណាមវិញផងដែរ។ នាយករដ្ឋមន្ត្រី ហ៊ុន សែន យល់ព្រមបានទទួលយកនូវការអញ្ជើញរបស់លោក ត្រិន ដាយក្វាង ។

ក្រៅពីជួបជាមួយសម្ដេច ហ៊ុន សែន នេះលោក ត្រិន ដាយក្វាង ក៏បានចូលជួបជាមួយប្រធានព្រឹទ្ធសភា សម្ដេច សាយ ឈុំ ប្រធានរដ្ឋសភា សម្ដេច ហេង សំរិន មុននឹងចូលក្រាបបង្គំគាល់ព្រះមហាសក្សត្រនរោត្តម សីហមុនី។

គួរបញ្ជាក់ថា ប្រធានរដ្ឋ នៃសាធារណៈរដ្ឋសង្គមនិយមវៀតណាមលោក ត្រិន ដាយក្វាង មកបំពេញទស្សនកិច្ចនៅកម្ពជាចាប់ពីថ្ងៃទី ១៤-១៦ មិថុនា។ នៅក្នុងដំណើរទស្សនកិច្ចនេះ ប្រធានរដ្ឋ នៃសាធារណៈរដ្ឋសង្គមនិយមវៀតណាម ក៏បានរៀបចំអំណោយថវិកាចំនួន ១លានដុល្លារអាមេរិក ដើម្បីសាងសង់អគារហ្វឹកហ្វឺនវិជ្ជាជីវៈនៅខេត្តព្រៃវែងទៀតផង។ នេះបើតាមហ្វេសប៊ុកសម្ដេច ហ៊ុន សែន៕