កីឡាជាតិ
ជាតិ
សៀមរាបអង្គរឡើងទៅវគ្គ៨ក្រុមចំណែកប៉ូលិស, វេស្ទើន និងអាស៊ីអឺរ៉ុបបាត់បង់ឱកាស
× ការប្រកួតពានរង្វាន់សម្តេច ហ៊ុន សែន លើកទី១០ បានបញ្ចប់ការប្រកួតវគ្គជម្រុះតាមពូលនីមួយៗកាលពីថ្ងៃទី១៥ ខែកក្កដា ម្សិលមិញ ដោយបានរកឃើញក្រុមចំនួន៨ ដើម្បីឡើងទៅប្រកួតនៅវគ្គបន្ត។ ក្នុងចំណោមក្រុមទាំងនោះមានតែសៀមរាបអង្គរ តែមួយគត់ជាក្រុមតាមខេត្តដែលមានសមត្ថភាពឡើងដល់វគ្គ៨ក្រុមនេះ ចំណែកក្រុមនៅក្នុងក្របខណ្ឌលីក ប៉ូលិស វេស្ទើនភ្នំពេញ និងអាស៊ីអឺរ៉ុប បានបាត់បង់ឱកាសក្នុងការឡើងទៅវគ្គបន្ត។
សៀមរាបអង្គរ ជាក្រុមតាមខេត្តតែមួយគត់ដែលមានសមត្ថភាពអាចឡើងទៅវគ្គ៨ក្រុមជាមួយ ណាហ្គាវើល តំណាងឲ្យពូល D បន្ទាប់ពីក្រុមម្ចាស់ផ្ទះមួយនេះបានយកឈ្នះ ខេត្តស្វាយរៀង ៣-១ កាលពីម្សិលមិញ។ ការឈ្នះនេះធ្វើឲ្យ សៀមរាបអង្គរ ទទួលបាន៣ពិន្ទុបន្ថែម ដើម្បីឈរចំណាត់ថ្នាក់លេខ២ ដោយមាន១០ពិន្ទុ។ ឱកាសនៃការឡើងទៅវគ្គបន្តនេះ បន្ទាប់ពីក្រុមណាហ្គាវើល ទម្លាក់ ក្រុមអគ្គស្នងការនគរបាលជាតិ តាមរយៈការលត់ ៣-១ នាពហុកីឡដ្ឋានជាតិ កាលពីម្សិលមិញ។
តាមរយៈការលត់របស់ក្រុមណាហ្គាវើលនេះធ្វើឲ្យក្រុមអគ្គស្នងការនគរបាលជាតិ ដែលជាក្រុមនៅក្នុងក្របខណ្ឌមិត្តហ្វូនខេមបូឌានលីកមួយនេះបាត់បង់ឱកាសឡើងទៅប្រកួតនៅវគ្គ ជាមួយក្រុម២ផ្សេងទៀត គឺវេស្ទើនភ្នំពេញ និងក្រុមអាស៊ីអឺរ៉ុប ដោយក្រុមប៉ូលិសមាន៨ពិន្ទុ ឬឯវេស្ទើនភ្នំពេញមាន ៦ពិន្ទុ និងក្រុមអាស៊ីអឺរ៉ុប មាន៩ពិន្ទុ។
ចំណែក ភ្នំពេញក្រោន សម្រាប់ការប្រើកីឡដ្ឋាន RSN ដើម្បីប្រជែងជាមួយក្រុមស៊ីម៉ាក់ សម្រាប់ឈរចំណាត់ថ្នាក់លេខ១ក្នុងពូល C បានត្រឹមរក្សាលទ្ធផលស្មើ ០-០ ធ្វើឲ្យក្រុមទាំងពីរមាន១៣ពិន្ទុស្មើគ្នា។ ប៉ុន្តែដោយសារភ្នំពេញក្រោនមានគ្រាប់បាល់ចំណេញច្រើនជាងនាំឲ្យក្រុមនេះឈរចំណាត់លេខ ចំណែកស៊ីម៉ាក់ឈរចំណាត់លេខ២ ដោយក្រុមទាំងពីរត្រូវឡើងទៅប្រកួតនៅវគ្គ១/៤ តំណាងឲ្យពូល C។
ដោយឡែក នាការប្រកួតនៅក្នុងពូល C ក្រុមម្ចាស់ផ្ទះខេត្តប៉ៃលិន បានយកឈ្នះ ខេត្តកំពត ២-១ ខណៈ វេស្ទើន ស៊ី ខេត្តកំពង់ស្ពឺ ១២-០។ ចំណែកនៅក្នុងពូល D ខេត្តក្រចេះ ស៊ី ខេត្តព្រះវិហារ ៣-០។
គួរបញ្ជាក់ថា ក្រុមទាំង៨ដែលឡើងទៅប្រកួតនៅវគ្គ ១/៤ រួមមាន សៀមរាបអង្គរ និងណាហ្គាវើល តំណាងពូលD, ភ្នំពេញក្រោន និង ស៊ីម៉ាក់ តំណាងពូល C, ក្រសួងការពារជាតិ និងបឹងកេតអង្គរ តំណាងពូល B និងក្រុមព្រះខ័នរាជស្វាយរៀង និងខេមបូឌានថាយហ្គឺរ តំណាងពូល A។ សៀមរាបអង្គរជាក្រុមតាមខេត្តតែមួយគត់ដែលអាចឡើងដល់ ១/៤ ក្នុងចំណោម១៤ខេត្ត៕
Tag:
បាល់ទាត់
Hun Sen Cup 2016
© រក្សាសិទ្ធិដោយ thmeythmey.com