គ្រូបង្វឹកកម្រិត១ប្តេជ្ញាចិត្តអភិវឌ្ឍន៍កីឡាវាយសីក្រោយទទួលបានការបណ្តុះបណ្តាលពីគ្រូឧទ្ទេសម៉ាឡេស៊ី

កីឡាជាតិ

ជាតិ

គ្រូបង្វឹកកម្រិត១ប្តេជ្ញាចិត្តអភិវឌ្ឍន៍កីឡាវាយសីក្រោយទទួលបានការបណ្តុះបណ្តាលពីគ្រូឧទ្ទេសម៉ាឡេស៊ី

16, Jun 2016 , 5:39 pm

រូបភាព

ដោយ:

គ្រូបង្វឹកកីឡាវាយសីកម្ពុជាជាច្រើនរូបបន្ទាប់ពីទទួលបានការបណ្តុះបណ្តាលវគ្គគ្រូកម្រិតម១ពីគ្រូឧទ្ទេសជនជាតិម៉ាឡេស៊ី មកពីសហព័ន្ធកីឡាវាយសីអាស៊ី(BAC) SAMBENTHAN រយៈពេល១១ថ្ងៃកន្លងមក ពោលគឺចាប់ពីថ្ងៃទី៦ ដល់ថ្ងៃទី១៦ ខែមិថុនា បានប្តេជាចិត្តថា នឹងយកចំណេះដឹងដែលខ្លួនទទួលបានពីវគ្គនេះទៅអភិវឌ្ឍន៍ធនធានមនុស្សក្នុងវិស័យកីឡាវាយសីកម្ពុជាឲ្យមានការរីកចម្រើនដូចបណ្តាប្រទេសនៅក្នុងតំបន់អាស៊ី។

សិក្ខាកាមចំនួន២០នាក់ដែលមកពីតាមបណ្តាខេត្ត និងរាជធានីភ្នំពេញក្រោយពីទទួលបានការបណ្តុះបណ្តាលវគ្គគ្រូកម្រិត១ពីលោកគ្រូឧទ្ទេសជនជាតិម៉ាឡេស៊ី SAMBENTHAN មកពីសហព័ន្ធកីឡាវាយសីអាស៊ីបានប្តេជា្ញថា នឹងយកចំណេះដឹងដែលខ្លួនបានរៀនទាំងទ្រឹស្តី និងអនុវត្តន៍ជាក់ស្តែងនៅលើទីលាន ទៅអភិវឌ្ឍន៍ធនធានមនុស្សនៅតាមក្លិប សាលា សមាគម ក្នុងរាជធានី-ខេត្តរបស់ពួកគេ ដើម្បីអភិវឌ្ឍន៍កីឡាវាយសីកម្ពុជាឲ្យមានភាពរីកចម្រើនដូចបណ្តាប្រទេសនៅក្នុងតំបន់។

នេះជាលើកទី៣ហើយសម្រាប់កម្ពុជាដែលទទួលបានការបណ្តុះបណ្តាលវគ្គគ្រូបង្វឹកកម្រិត១ដែលមានគ្រូឧទ្ទេសមកពីសហព័ន្ធកីឡាវាយសីអាស៊ី ដែលបណ្តាប្រទេសមួយចំនួននៅតំបន់មិនមានជាពិសេសប្រទេសវៀតណាម និងឡាវជាដើម ព្រោះនៅក្នុងវគ្គបណ្តុះបណ្តាលលើកនេះមានសិក្ខាម្នាក់មកពីប្រទេសវៀតណាមផងដែរ។

ពាក់ព័ន្ធទៅនឹងបញ្ហាដែលកម្ពុជាតែងតែទទួលបានការចូលរួមពីសំណាក់គ្រូឧទ្ទេសមកពីសហព័ន្ធកីឡាវាយសីអាស៊ី ជាពិសេសលោក SAMBENTHAN ជនជាតិម៉ាឡេស៊ីនោះ លោក លី កុសល ប្រធានសហព័ន្ធកីឡាវាយសីកម្ពុជាបានបញ្ជាក់ថា៖«តាមរយៈទំនាក់ទំនងល្អជាមួយសហព័ន្ធកីឡាវាយសីអាស៊ីវគ្គបណ្តុះបណ្តាលគ្រូបង្វឹកកម្រិត១យើងតែងតែធ្វើជារៀងរាល់ឆ្នាំជាបន្តបន្ទាប់ ជាពិសេសគឺទទួលបានការសម្របសម្រួលពីលោក SAMBENTHAN តែម្តង។ វាជាមោទនភាពរបស់កម្ពុជាដែលទទួលបានវគ្គសិក្សានេះ ព្រោះប្រទេសមួយចំនួនដូចជា វៀតណាម និងឡាវ មិនទាន់មានវគ្គសិក្សាបែបនេះនោះទេ»។

ដើម្បីត្រៀមខ្លួនក្នុងការធ្វើជាម្ចាស់ផ្ទះកីឡាស៊ីហ្គេមលើកទី៣២ ឆ្នាំ២០២៣ លោកប្រធានសហព័ន្ធកីឡាវាយសីកម្ពុជារូបនេះឲ្យផោ្តតសំខាន់ទៅលើយុវជន ជាពិសេសគឺការជ្រើសរើសកីឡាករកីឡាការិនី។ លោកបញ្ជាក់ដូច្នេះថា៖«ដើម្បីឲ្យវិស័យកីឡាយើងអាចឈានទៅមុខ និងមានការរីកចម្រើនឲ្យឆាប់រហ័សនោះគឺត្រូវជ្រើសរើសកីឡាករកីឡាការិនីវ័យក្មេងឲ្យបានល្អ ព្រោះការប្រកួតស៊ីហ្គេមនឹងមកដល់ក្នុងរយៈពេល៧ឆ្នាំខាងមុខទៀត ដូច្នេះយើងគិតពីឥឡូវទៅ ដោយយើងត្រូវផ្តោតសំខាន់ទៅលើការហ្វឹកហាត់ទាំងទ្រឹស្តី និងការអនុវត្ត ជាពិសេសគឺការបង្កើតឲ្យមានការប្រកួតឲ្យបានច្រើន ដើម្បីពង្រឹងសមត្ថភាព និងបច្ចេកទេសរបស់កីឡាករ»។

គួរបញ្ជាក់ថា សហព័ន្ធកីឡាវាយសីកម្ពុជាបានរៀបចំវគ្គបណ្តុះបណ្តាលគ្រូបង្វឹកកម្រិត១រយៈពេល១១ថ្ងៃចាប់ពីថ្ងៃទី៦ ដល់ថ្ងៃទី១៦ ខែមិថុនា ដោយមានការសិក្ខាចូលរួមទាំងអស់ចំនួន២០នាក់(ស្រី៣នាក់)។ ពួកគេទាំងនេះមកពីសាលាក្លិប-សមាគមនៅតាមខេត្ត និងរាជធានីចំនួន១៥ ក្នុងនោះមកពីប្រទេសវៀតណាមម្នាក់ផងដែរ។ សិក្ខាកាមទាំងនេះទទួលបានការបង្ហាត់បង្រៀនពីសំណាក់គ្រូឧទ្ទេសជនជាតិម៉ាឡេស៊ី SAMBENTHAN ដែលមកពីសហព័ន្ធកីឡាវាយសីអាស៊ី និងជាអ្នកសម្របសម្រួលរបស់សហព័ន្ធកីឡាវាយសីពិភពលោក៕