ការប្រកួតប៉េតង់ដណ្តើមពានរង្វាន់សម្តេច ស ខេង អត្តពលិកចូលរួមកើនឡើងទ្វេដង

កីឡាជាតិ

ជាតិ

ការប្រកួតប៉េតង់ដណ្តើមពានរង្វាន់សម្តេច ស ខេង អត្តពលិកចូលរួមកើនឡើងទ្វេដង

17, Jun 2016 , 1:32 pm

រូបភាព

ដោយ:

ការប្រកួតកីឡាប៉េតង់ដណ្តើមពានរង្វាន់សម្តេច ស ខេង លើកទី១៦ ឆ្នាំនេះមានអត្តពលិកចូលរួមកើនឡើងទ្វេដងបើប្រៀបធៀបទៅនឹងឆ្នាំមុន។ ការប្រកួតនេះនឹងព្រឹត្តទៅរយៈពេល៤ថ្ងៃចាប់ពីថ្ងៃទី១៧ ដល់ថ្ងៃទី២០ ខែមិថុនា នៅទីលានវាយប៊ូល និងប៉េតង់ក្នុងពហុកីឡដ្ឋានជាតិ ដោយឆ្នាំនេះមានក្លិប-សមាគមចំនួន៣១ចូលរួម និងមាន៦ប្រភេទវិញ្ញាសា ហើយការប្រកួតធើ្វឡើងតាមរូបមន្តប្រកួតជម្រុះវិលជុំ។

លោក អ៊ិន គឹមស្រ៊ុន អគ្គលេខាធិការសហព័ន្ធកីឡាប៊ូល និងប៉េតង់កម្ពុជាបានបញ្ជាក់ការប្រកួតកីឡាប៉េតង់ដណ្តើមពានរង្វាន់សម្តេច ស ខេង ឆ្នាំនេះមានអត្តពលិកចូលរួមកើនឡើងទ្វេដងបើប្រៀបធៀបទៅនឹងឆ្នាំមុន ពោលគឺឆ្នាំនេះមានអត្តពិកចូលរួមចំនួន៣១១នាក់ ដោយឆ្នាំមុនមានអត្តពលិកចូលរួមត្រឹមតែជាង១០០នាក់ប៉ុណ្ណោះ។

ពាក់ព័ន្ធនៅនឹងបញ្ហានៃការកើនឡើងចំនួនកីឡាករកីឡាការិនីនេះដែរ លោកអគ្គលេខាធិការសហព័ន្ធកីឡាប៊ូលនិងប៉េតង់កម្ពុជារូបនេះបានពន្យល់ថា ដោយសារបច្ចុប្បន្នវិញ្ញាសាប៉េតង់ត្រូវបានដាក់បញ្ចូលនៅក្នុងកម្មវិធីសិក្សារបស់ក្រសួងអប់រំយុវជន និងកីឡា ម្យ៉ាងទៀតដោយសារវិស័យកីឡានៅកម្ពុជាកំពុងមានការរីកចម្រើន។

គួរបញ្ជាក់ថា ការប្រកួតកីឡាប៉េតង់ជ្រើសរើសជើងឯកពានរង្វាន់សម្តេច ស ខេង ឆ្នាំនេះមានក្លិប-សមាគមន៍ដែលនៅតាមបណ្តាខេត្ត និងរាជធានីភ្នំពេញចំនួន៣១ ចូលរួម ដោយក្លិប និងសមាគមទាំងនេះត្រូវប្រកួតប្រជែងគ្នាលើវិញ្ញាសាចំនួន៦ គឺបុរស៣នាក់ទល់នឹង៣នាក់, វ័យចាស់៣នាក់ទល់នឹង៣នាក់, នារី៣នាក់ទល់នឹង៣នាក់, យុវជនចម្រុះ ៣នាក់ទល់នឹង៣នាក់, យុវជន ១នាក់ទល់នឹង ១នាក់ និងយុវនារី ១នាក់ ទល់នឹង ១នាក់។ ការប្រកួតនេះនឹងប្រព្រឹត្តទៅរយៈពេល ៤ថ្ងៃចាប់ពីថ្ងៃទី១៧ ដល់ថ្ងៃទី២០ ខែមិថុនា នៅទីលានវាយប៊ូល និងប៉េតង់ក្នុងពហុកីឡដ្ឋានជាតិអូឡាំពិក៕