មហាផ្ទៃឈ្នះមេដាយច្រើនជាងគេក្នុងការប្រជែងជើងឯកសូហ្វតិន្នីសថ្នាក់ជាតិ

កីឡាជាតិ

ជាតិ

មហាផ្ទៃឈ្នះមេដាយច្រើនជាងគេក្នុងការប្រជែងជើងឯកសូហ្វតិន្នីសថ្នាក់ជាតិ

17, Jun 2016 , 4:32 pm

រូបភាព

ដោយ:

ការប្រកួតកីឡាសូហ្វតិន្នីសជ្រើសរើសជើងឯកថ្នាក់ជាតិ ឆ្នាំ២០១៦ បានបញ្ចប់កាលពីព្រឹកថ្ងៃទី១៧ ខែមិថុនា បន្ទាប់ពីធ្វើការប្រកួតអស់រយៈពេល៥ថ្ងៃកន្លងមក ដោយឆ្នាំនេះក្រសួងមហាផ្ទៃបានឈ្នះមេដាយមាសច្រើនជាងគេ។ នាពិធីបិទការប្រកួតជើងឯកថ្នាក់ជាតិកាលពីព្រឹកមិញនេះ លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡា បានផ្តល់អនុសាសន៍ចំនួន៥ចំណុច ដើម្បីអភិវឌ្ឍន៍វិស័យកីឡាកម្ពុជាឲ្យមានការរីកចម្រើនទាំងបរិមាណ និងគុណភាព។

ក្លិបកីឡាសូហ្វតិន្នីសរបស់ក្រសួងមហាផ្ទៃបានគ្រងតំណែងជើងឯកនៃការប្រកួតកីឡាសូហ្វតិន្នីសជ្រើសរើសជើងឯកថ្នាក់ជាតិប្រចាំឆ្នាំ២០១៦នេះបន្ទាប់ពីក្រុមនេះបានឈ្នះមេដាយច្រើនជាងគេក្នុងចំណោមក្លិប-សមាគមទាំង៨ចូលរួម។ ក្រសួងមហាផ្ទៃទទួលបានមេដាយសរុបចំនួន១៨មេដាយក្នុងនោះមាស៩ ប្រាក់៤ និងសំរឹទ្ធ៥ ឬឯក្លិបអគ្គស្នងការនគរបាល់ជាតិ និងក្រសួងការពារជាតិទទួលបាន៤មេដាយ ប្រាក់២ និងសំរឹទ្ធ២ ចំណែកខេត្តកំពង់ស្ពឺទទួលបានមេដាយប្រាក់១គ្រឿងផងដែរ។

មេដាយមាសទាំង៩របសក្លិបក្រសួងមហាផ្ទៃឈ្នះលើវិញ្ញាសាទាំង៩ដែលសហព័ន្ធដាក់ចូលរួមប្រកួតនៅឆ្នាំនេះ ឬឯមេប្រាក់ចំនួន៤ ឈ្នះលើវិញ្ញាសាវាយម្នាក់ទល់ម្នាក់នារី វាយគូបុរស-នារី វាយទោលបុរសក្របខណ្ឌ«ក» និងប្រកួតជាក្រុមបុរស។ ចំណែកមេដាយសំរឹទ្ធចំនួន៥ ឈ្នះលើវិញ្ញាសាវាយម្នាក់ទល់ម្នាក់នារី វាយម្នាក់ទល់ម្នាក់យុវជនអាយុក្រោម១៨ឆ្នាំ វាយម្នាក់ទល់មា្នក់បុរសក្របខណ្ឌ«ខ» វាយទោលបុរសក្របខណ្ឌ«ក» និងវាយគូបុរសក្របខណ្ឌ«ក»។

នាពិធីបិទការប្រកួតកីឡាសូហ្វតិន្នីសជ្រើសជើងឯកថ្នាក់ជាតិកាលព្រឹកមិញនេះដែរ លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡា បានកោតសរសើរចំពោះកម្រិតបច្ចេកទេស និងសមត្ថភាពរបស់កីឡាករកីឡាការិនីសូហ្វតិន្នីស ក៏ដូចជាសហព័ន្ធកីឡាសូហ្វតិន្នីសកម្ពុជាទាំងមូល ដែលអាចអភិវឌ្ឍន៍ខ្លួនឲ្យមានការរីកចម្រើនក្នុងរយៈពេលដ៏ខ្លី ជាពិសេសតាមរយៈការឈ្នះមេដាយពីការប្រកួតអន្តរជាតិផ្សេងៗ។

អគ្គនាយកនៃអគ្គនាយកដ្ឋានកីឡា បានបញ្ជាក់ថា៖«យើងសង្កេតឃើញថា សហព័ន្ធសូហ្វតិន្នីសកម្ពុជាទើបតែបង្កើតឡើងក្នុងរយៈពេលប៉ុន្មានឆ្នាំមកនេះ ខ្លីដែរ ប៉ុន្តែសហព័ន្ធសូហ្វតិន្នីសកម្ពុជាអាចពង្រីកខ្លួនយ៉ាងលឿន។ ការងារបច្ចេកក៏មានការរីកចំរើនទាំងនៅក្នុងស្រុក ហើយការបញ្ជូនទៅប្រកួតនៅក្រៅស្រុកក៏ទទួលលទ្ធផលល្អដែរ។ នេះយើងឃើញថាលទ្ធផលល្អនេះគឺជាការខិតខំប្រឹងប្រែងរបស់សហព័ន្ធកីឡាសូហ្វតិន្នីសកម្ពុជា»។

ជាមួយគ្នានេះអគ្គលេខាធិការសហព័ន្ធកីឡាសូហ្វតិន្នីសកម្ពុជា លោក ជា ប៊ុនហេង បានវាយតម្លៃផងដែរថា ការប្រកួតកីឡាសូហ្វតិន្នីសជ្រើសរើសជើងឯកថ្នាក់ឆ្នាំបានបញ្ចប់ដោយជោគជ័យខ្ពស់ ជាពិសេសតាមរយៈការទទួលបានការកោតសរសើររបស់អគ្គនាយកនៃអគ្គនាយកដ្ឋានកីឡា។ ហើយលោកសង្កេតឃើញថា កម្រិតបច្ចេកទេស និងសមត្ថភាពរបស់កីឡាករកីឡាការិនីក៏មានការរីកចម្រើនជាងឆ្នាំមុនផងដែរ។

ឆ្លៀងក្នុងឱកាសនៃការបិទការប្រកួតនេះដែរ លោកអគ្គនាយកនៃអគ្គនាយកដ្ឋានកីឡា អ៊ុក សិទ្ធិជាតិ បានផ្តល់នូវអនុសាសន៍ចំនួន៥ចំណុចផងដែរ ដើម្បីអភិវឌ្ឍន៍វិស័យកីឡាកម្ពុជាឲ្យមានការរីកចម្រើនទាំងបរិមាណ និងគុណភាពក្នុងរយៈពេលដ៏ខ្លី ដើម្បីត្រៀមខ្លួនក្នុងការរៀបចំធ្វើជាម្ចាស់ផ្ទះនៃការប្រកួតស៊ីហ្គេមលើកទី៣២ ឆ្នាំ២០២៣។

ក្នុងអនុសាសន៍នោះដែរ លោកបានផ្តោតទៅលើការរៀបចំរចនាសម្ព័ន្ធគ្រប់គ្រងផ្ទៃក្នុងរបស់សហព័ន្ធ ក៏ដូចជាបណ្តាក្លិប-សមាគមនៅទូទាំងប្រទេស និងការបណ្តុះបណ្តាលកីឡាករ គ្រូបង្វឹក ចៅក្រមអាជ្ញាកណ្តាលឲ្យមានទាំងបរិមាណ និងគុណភាព។ ម្យ៉ាងទៀតចង់សហព័ន្ធស្វែងរកដៃគូឧបត្ថម្ភ ដើម្បីរៀបចំការប្រកួតឲ្យការប្រកួតឲ្យបានច្រើន។

អនុសាសន៍ទាំង៥ចំណុចនោះរួមមាន៖ ទី១. ពង្រឹងរចនាសម្ព័ន្ធគ្រប់គ្រងផ្ទៃក្នុងសហព័ន្ធ ក្លិប-សមាគម ទូទាំងប្រទេស, ទី២. បណ្តុះបណ្តាលថ្នាកថ្នាលតាមកម្រិតអាយុ និងបង្កើនបរិមាណកីឡាករ កីឡាការិនី ក្លិប-សមាគមកីឡាសូហ្វតិន្នីសឲ្យបានទូលំទូលាយទូទាំងប្រទេស, ទី៣. ពង្រឹងសមត្ថភាពអាជ្ញាកណ្តាលចៅក្រមឲ្យបានទាំងបរិមាណ និងគុណភាពកម្រិតជាតិនិងអន្តរជាតិ, ទី៤. ពង្រឹងការរៀបចំការប្រកួត និងការហ្វឹកហាត់នៅតាមក្លិប-សមាគមឲ្យបានរឹងមាំ និងទី៥ ប្រឹងប្រែងស្វែងរកដៃគូអភិវឌ្ឍន៍។

គួរបញ្ជាក់ថា ការប្រកួតកីឡាសូហ្វតិន្នីសជ្រើសរើសជើងឯកថ្នាក់ជាតិប្រចាំឆ្នាំ២០១៦ ដែលធ្វើការប្រកួតអស់រយៈពេល៥ថ្ងៃចាប់ពីថ្ងៃទី១៣ ដល់ថ្ងៃទី១៧ ខែមិថុនា ដែលមានកីឡាករកីឡាការិនី៩២នាក់តំណាងឲ្យក្លិប-សមាគមចំនួន៩ចូលរួម និងមាន៩ប្រទេសវិញ្ញាសា បានបញ្ចប់យ៉ាងជោគជ័យកាលពីព្រឹកមិញនេះនៅទីលានសូហ្វតិន្នីសក្នុងពហុកីឡដ្ឋានជាតិក្រោបវត្តមានរបស់លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡា លោក ហ៊ុន សាមុត ប្រធាននាយកដ្ឋានអប់រំកាយ និងកីឡា នៃក្រសួងអប់រំយុវជន និងកីឡា។