ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
ជាតិ
ជនជាតិដើមភាគតិចបន្តជំទាស់គម្រោងរុករករ៉ែមាសខេត្តរតនគិរី
17, Jun 2016 ,
10:19 pm
រូបភាព
×
ដោយ:
រតនគិរី៖ ពលរដ្ឋជនជាតិដើមភាគតិចចំនួន ២ឃុំ ក្នុងស្រុកអូរយ៉ាដាវ បានបន្តជំទាស់ នឹងគម្រោងរុករករ៉ែរបស់ក្រុមហ៊ុនអង្គរហ្គោល (Angkor Gold) ក្នុងខេត្តរតនគិរី ដោយពួកគេលើកឡើងថា ក្រុមហ៊ុនរបស់កាណាដាមួយនេះ បានធ្វើឲ្យប៉ះពាល់ដីចម្ការវិលជុំ ដីព្រៃកប់ខ្មោច ប្រពៃណីដូនតាដើម និងបរិស្ថាននៅក្នុងសហគមន៍គេ។ តែ ភាគីក្រុមហ៊ុនបានច្រានចោលការចោទប្រកាន់ពួកគេ។
ពលរដ្ឋជនជាតិដើមភាគតិចជាង ១០០គ្រួសារ រស់នៅក្នុងឃុំប៉ាតេ និងឃុំយ៉ាទុង ស្រុកអូរយ៉ាដាវ ខេត្តរតនគិរី បន្តជំទាស់គម្រោងរុករ៉ែរបស់ក្រុមហ៊ុន អង្គរ ហ្គោល ដែលទទួលបានសិទ្ធិស្រាវជ្រាវរុករករ៉ែមាសពីក្រសួងរ៉ែ និងថាមពល។ ពួកគេអះអាង ក្រុមហ៊ុនបានចុះប្រតិបត្តិការសិក្សាពីប្រភពរ៉ែក្នុងតំបន់ពួកគេជិត ១០ឆ្នាំហើយ វាកំពុងបង្កប៉ះពាល់ដល់ជីវភាពរស់នៅសហគមន៍ជនជាតិដើមភាគតិចពួកគេ។
ប្រធានសហគមន៍ជនជាតិដើមភាគតិចចារាយ ឃុំប៉ាតេ ស្រុកអូរយ៉ាដាវ លោក សេវ ហ្លិត បានប្រាប់ក្រុមអ្នកសារព័ត៌មានដែលដឹកនាំដោយអង្គការក្រៅរដ្ឋាភិបាល កាលពីថ្ងៃទី២៥ ខែឧសភា ថា ពួកគេប្រឆាំងដាច់ខាត នឹងគម្រោងអភិវឌ្ឍរបស់ក្រុមហ៊ុន រុករករ៉ែមាសក្នុង សហគមន៍ពួកគេ។
បុរសជនជាតិចារាយសម្បុរខ្មៅស្រអែមវ័យ ៤៧ឆ្នាំរូបនេះ បានចោទប្រកាន់ក្រុមហ៊ុនឯកជននេះ កំពុងរុករករ៉ែបំផ្លាញដីព្រៃ និងដីចម្ការវិលជុំដែលជាអាយុជីវិតពួកគេ ព្រោះក្រុមហ៊ុនបានរុករានលើដីព្រៃភ្នំធម្មជាតិរបស់ពួកគេ។ លោកបានលើកឡើងពីក្តីបារម្ភយ៉ាងដូច្នេះថា៖«យើងមានបញ្ហា គឺក្រុមហ៊ុនបង្កផលប៉ះពាល់អដល់បរិស្ថានហើយ ថែមទាំងអាចកើតភាពវឹកវរនៅក្នុងសហគមន៍ ដូចជា ចោរលួច ឬចោរប្លន់ជាដើម ក្នុងសហគមន៍។ សហគមន៍យើងដាច់ខាតឥតត្រូវការអភិវឌ្ឍបែបនេះទេ។ ពួកគេធ្វើបែបនេះ ដូចសម្លាប់យើងចោលដែរ។ ពលរដ្ឋក្នុងភូមិនេះពុំមានដី ពួកគាត់ចេះរកស៊ីលក់ដូរអ្ ដូចខ្មែរទេ»?
ដោយឡែក ពលរដ្ឋនៅក្នុងសហគមន៍មួយផ្សេងទៀត ដែលស្ថិតនៅមិនឆ្ងាយប៉ុន្មានពីឃុំប៉ាតេនេះ ក៏បារម្ភដូចគ្នានឹងប្រធានសហគមន៍ខាងលើដែរ ពាក់ព័ន្ធនឹងការវិនិយោគរុករករ៉ែមាស ដោយក្រុមហ៊ុន អង្គរ ហ្គោល។
ប្រជាពលរដ្ឋភូមិពាក់ ឃុំយ៉ាទុង ស្រុកអូរយ៉ាដាវជាង ១០គ្រួសារ មានវិវាទដីជាង ១ពាន់ហិកតា ត្អូញត្អែរថា ពួកគេបាត់បង់មុខរបរ និងប្រឈមបញ្ហាជីវភាព ជាពិសេសការធ្វើអាជីវកម្មរ៉ែមាសនេះ ជះឥទ្ធិពលកាន់តែអាក្រក់ទៅដល់ប្រពៃណីដើម អស់ព្រៃអារក្ស និងដីចម្ការវិលជុំជាដើមក្រោយការចូលធ្វើអាជីវកម្មរបស់ក្រុមហ៊ុន អង្គរ ហ្គោល ចាប់តាំងពីឆ្នាំ២០១០ រហូតមក។
លោក សេវ ហ្វុន វ័យ ៦៦ឆ្នាំ ជាព្រឹទ្ធាចារ្យនៅក្នុងសហគមន៍ឃុំយ៉ាទុង បាននិយាយថា ជនជាតិភាគតិច មានចំណេះដឹងតិចតួច ដូច្នេះ ពួកគេពុំងាយនឹងទទួលយកការអភិវឌ្ឍ បែបវប្បធម៌ថ្មី តាមរយៈការវិនិយោគនេះទេ។ ម្យ៉ាង ពួកគេពុំជឿលើគោលការណ៍អភិវឌ្ឍរបស់ក្រុមហ៊ុនទេ ព្រោះពួកគេឃើញថា ក្រុមហ៊ុនបំពានលើដីអាស្រ័យផលប្តូរវេនពួកគេ។
បុរសជនជនជាតិចារាយរូបនេះ ពុំយល់ព្រមទទួលយកការអភិវឌ្ឍឡើយបើទោះបីជាក្រុមហ៊ុនបានសន្យាពួកគេថា គេនឹងអភិវឌ្ឍន៍តំបន់ជនជាតិភាគតិចរីកចម្រើនក្តី។ លោកបដិសេធយ៉ាងដូច្នេះថា៖« យើងមិនចង់បានឡាន ម៉ូតូ និងមានទីផ្សារទំនើបទេ។ យើងត្រូវការរក្សានូវប្រពៃណីដើម និងទម្រង់នៃវប្បធម៌ ជំនឿសាសនា មុខរបរតាមទម្លាប់ដូនតា»។ លោកបន្តសង្កត់ធ្ងន់ថា៖ «យើងត្រូវការព្រៃ សត្វព្រៃ បើអត់ព្រៃគឺយើងរស់នៅអត់បានទេ។ តាំងដើមធ្លាប់រកសត្វសំពោច ឆ្មាបាអី និងជ្រូកអីបានតិចតួចទៅ គ្រាន់បានចិញ្ចឹមគ្រួសារ»។
ជាការឆ្លើយតប លោក ម៉ា សំអាត អ្នកគ្រប់គ្រងបច្ចេកទេស ក្រុមហ៊ុន អង្គរហ្គោល បានបដិសេធ នឹងការចោទប្រកាន់របស់ពលរដ្ឋជនជាតិដើមភាគតិច។ លោកនិយាយថា ក្រុមហ៊ុនបានរៀបចំវេទិកាជជែកពិភាក្សាជាសាធារណៈជាមួយពលរដ្ឋ ដោយមានការចូលរួមពីសំណាក់ អង្គក្រៅរដ្ឋាភិបាល អ្នកសារព័ត៌មាន និងអាជ្ញាធរពាក់ព័ន្ធគ្រប់លំដាប់ថ្នាក់ ដើម្បីឲ្យពលរដ្ឋ លើកពីក្តីបារម្ភពួកគេ។ ប៉ុន្តែលោកថា ពួកគេបានបដិសេធការចូលរួម ដោយសារពួកគេពុំយល់ពីការអភិវឌ្ឍន៍។ លោកបដិសេធយ៉ាងដូច្នេះថា៖«យើងតែងសម្រួលបញ្ហាជាមួយពួគគាត់ យើងទិញដីពួកគាត់ទាំងអត់ប្លង់កម្មសិទ្ធិស្របច្បាប់។ យើងរៀបចំដីស្រែតំបន់ផ្សេង ធ្វើពាងស្តុកទឹកតាមផ្ទះជូនគាត់ តែពួកគាត់ពុំចេះរស់នៅ ពួកគាត់ចង់រស់នៅតាមព្រៃភ្នំ ទឹកអូរ ទឹកស្ទឹងទៅវិញ។ តែយើងនឹងពិភាក្សាគ្នាជាសាធារណជាមួយពួកគាត់ថែមទៀត»។
យ៉ាងណា បច្ចុប្បន្ននេះ ក្រុមហ៊ុនស្រាវជ្រាវរុករករ៉ែអង្គរហ្គោលនេះ បានលក់អាជ្ញាប័ណ្ណដីរ៉ែ បន្តឲ្យក្រុមហ៊ុនមួយផ្សេងទៀត គឺក្រុមហ៊ុន មេស្កូ ហ្គូល (Mesco Gold) របស់ប្រទេសឥណ្ឌាម្ដង ដើម្បីបើកប្រតិបត្តិការធ្វើអាជីវកម្មរ៉ែក្នុងតំបន់ព្រៃភ្នំជនជាតិដើមភាគតិច ឃុំយ៉ាទុង និងឃុំប៉ាតេ។
ប្រធានប្រតិបត្តិការអាជីវកម្មរ៉ែប្រចាំក្រុមហ៊ុន មេស្កូ ហ្គោល លោក ហាស វីស្យាម៉ា (Harsh V Sharma) បានបដិសេធថា ក្រុមហ៊ុនលោកបានបំពានដីធ្លី សិទ្ធិសេរីភាពពលរដ្ឋ ក្នុងការធ្វើអាជីវកម្មដោយអាថ៌កំបាំងឡើយ។
តំណាងក្រុមហ៊ុន មេស្កូ ហ្គោល ជនជាតិឥណ្ឌា និយាយពីការអភិវឌ្ឍថា ក្រុមហ៊ុននឹងបង្រៀន និងជ្រើសរើសជនជាតិភាគតិចឲ្យចូលធ្វើការផ្នែករ៉ែ ក្នុងក្រុមហ៊ុន ដោយទទួលប្រាក់ខ្ពស់ សមរម្យ ហើយក្រុមហ៊ុននឹងជួយសង់ពាងស្តុកទឹក បង្គន់អនាម័យ ផ្លូវថ្នល់ជូនពួកគេ ប្រសិនបើគម្រោងទទួលជោគជ័យ។ បើតាមលោក Harsh V Sharma បច្ចុប្បន្ននេះ ក្រុមហ៊ុនលោកកំពុងរង់ចាំអាជ្ញាប័ណ្ណបើកអាជីវកម្មរ៉ែផ្លូវការពីក្រសួងឧស្សាហកម្ម រ៉ែ និងថាមពល។
មិនខុសគ្នាពីលោក ម៉ា សំអាត ប្រធានប្រតិបត្តិការក្រុមហ៊ុន មេស្កូ ហ្គោល លើកឡើងថា ក្រុមហ៊ុន មេស្កូ ហ្គោល ក្រៅពីបានផ្ដល់សំណងដល់សហគមន៍ក្នុងមួយគ្រួសារចំនួន ១.៥០០ដុល្លារហើយ ពលរដ្ឋរស់នៅតំបន់នោះ អាចបម្រើការក្នុងក្រុមហ៊ុនពួកគេទៀតផង។
ពាក់ព័ន្ធនឹងបញ្ហានេះដែរ មន្ត្រីសមាគមការពារសិទ្ធិមនុស្សអាដហុក (ADHOC) ខេត្តរតនគិរីសង្កេតឃើញថា ក្រុមហ៊ុនរុករករ៉ែ អង្គរហ្គោល និងក្រុមហ៊ុនអាជីវកម្មរែ់ មេស្កូ ហ្គោល បានបើកព័ត៌មានយ៉ាងទូលំទូលាយ ក្នុងការចរចាជាមួយសហគមន៍ អង្គការក្រៅរដ្ឋាភិបាល និងភាគីពាក់ព័ន្ធ ផ្ទុយពីក្រុមហ៊ុនដទៃទៀត។
លោក ប៊ី វ៉ាន់នី មន្ត្រីស៊ើបអង្កេតនៃសមាគមការពារសិទ្ធិមនុស្សអាដហុក ខេត្តរតនគិរី និយាយថា ក្រុមហ៊ុនទាំងពីរបានបើកទូលាយ និងមានតម្លាភាពក្នុងការពិគ្រោះយោបល់ជាមួយសហគមន៍ ចាប់តាំងពីផ្ដើមវិនិយោគ រហូតមក ។ ហើយថា ក្រុមហ៊ុនពុំបានបំពានរាល់សំណើពលរដ្ឋឡើយ។
មន្ត្រី NGO ដែលតាមដានរឿងនេះ និយាយដូច្នេះថា៖«រហូតមកដល់ពេលនេះ ខ្ញុំឃើញក្រុមហ៊ុនហ្នឹងអត់ទាន់បានរំលោភបំពានទៅលើដីប្រជាពលរដ្ឋ ណាមួយទេ។ រយៈពេលដែលខ្ញុំធ្វើមួយឆ្នាំនេះ អត់មានឃើញក្រុមហ៊ុនហ្នឹងរំលោភទៅលើដីប្រជាពលរដ្ឋទេ»។
បើតាមលោក Harsh V Sharma ក្រុមហ៊ុន Mesco Gold ដែលទិញសិទ្ធិបន្តពីក្រុមហ៊ុន អង្គរ ហ្គោល អាចនឹងត្រូវចាប់ផ្ដើមធ្វើអាជីវកម្មរ៉ែមាស ក្នុងខែមិថុនានេះ។ ហើយ ក្រុមហ៊ុនត្រូវការកម្លាំងពលកម្មជាង ៤០០នាក់ ក្នុងនោះ មាន ៤០ ទៅ ៥០នាក់ ជាអ្នកបច្ចេកទេសជនជាតិឥណ្ឌា៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
រ៉ែ
មាស
រតនគិរី
© រក្សាសិទ្ធិដោយ thmeythmey.com
អត្ថបទពេញនិយម
ផ្សារដើមគរថ្មី លើផ្ទៃដី៣០ហិកតា ត្រូវបានដាក់ដំណើរការជាផ្លូវការហើយ
3 ថ្ងៃ
ដំណឹងបឋម៖ ករណីផ្ទុះឃ្លាំងគ្រាប់នៅបន្ទាយភូមិភាគ៣ ក្រុងច្បារមន មានអ្នកស្លាប់ និងរបួសច្រើននាក ...
4 ថ្ងៃ
តើពាក្យងារជា «សម្តេច» មានន័យដូចម្តេច?
11 ម៉ោង
គ្រឿងឥស្សរិយាភរណៈ គឺ «មេដាយ» មិនមែន «មេដៃ» ឡើយ
6 ថ្ងៃ
តើពាក្យ «ដុតដៃដុតជើង» មានន័យដូចម្តេច?
5 ថ្ងៃ
អត្ថបទពេញនិយមបន្ថែម