កីឡាជាតិ
ទ័ព ប៉ះ ប៉ូលិស ដើម្បីសាកជើងកីឡាករចំណូលថ្មី ខណៈវេស្ទើន ស្វាគមន៍ ណាហ្គាវើល
×![]()
ការប្រកួតពានរង្វាន់ក្របខណ្ឌមិត្តហ្វូនខេមបូឌានលីក ជុំទី២ សប្តាហ៍ទី១០ នារសៀលថ្ងៃទី១៨ ខែមិថុនា នេះ ក្រសួងការពារជាតិ(ទ័ព) ជួប អគ្គស្នងការនគរបាលជាតិ(ប៉ូលិស) នៅកីឡដ្ឋានកងយោធពលខេមរភូមិន្ទ(ស្តាតចាស់) ដើម្បីសាកជើងកីឡាករចំណូលថ្មី។ ចំណែក វេស្ទើន ស្វាគមន៍ ណាហ្គាវើល នៅកីឡដ្ឋានវេស្ទើន។ 
ក្រុមឈរកំពូលតារាងពានរង្វាន់លីកកំពូល ក្រសួងការពារជាតិ បន្ទាប់ពីទិញកីឡាករជនជាតិកូរ៉េខាងជើង២រូបកាលពីពេលថ្មីៗ ត្រូវជួបប្រកួតជាមួយក្រុមអគ្គស្នងការនគរបាលជាតិ ដើម្បីវាស់ស្ទង់ ក៏ដូចជាបង្ហាញសមត្ថភាពរបស់កីឡាករចំណូលថ្មីរបស់ខ្លួនក្នុងជុំទី២ នៃសប្តាហ៍ទី១០។ ការប្រកួតនេះនឹងប្រព្រឹត្តទៅនៅរសៀលម៉ោង ៣:៣០នាទី នៅកីឡដ្ឋានកងយោធពលខេមរភូមិន្ទ។
កីឡាករចំណូលថ្មីជនជាតិកូរ៉េខាងជើងដែលជាចំណូលថ្មីរបស់ក្រុមក្រសួងការពារជាតិរួមមានខ្សែប្រយុទ្ធ Ri Hyok-chol ដែលពាក់អាវលេខ៣៣របស់ក្រសួងការពារជាតិ និងខ្សែការពារ Jang Song-hyokដែលត្រូវពាក់លេខ៣៤។ Ri Hyok-chol និង Jang Song-hyok ជាកីឡាករដែលស្ថិតនៅក្នុងក្រុមជម្រើសជាតិកូរ៉េខាងជើងនៅឡើយ។
នារសៀលម៉ោង ៣:៣០នាទី នៅកីឡដ្ឋានវេស្ទើនក្រុមឈរបាតតារាង វេស្ទើនភ្នំពេញ ដែលជាក្រុមមិនដែលស្គាល់ពាក្យឈ្នះតាំងពីចាប់បើករដូវកាលថ្មី ត្រូវជួបប្រកួតជាមួយក្រុម ណាហ្គាវើល ដើម្បីស្វែងរក៣ពិន្ទុសម្រាប់ស្តារមុខមាត់ក្នុងជើងទី២ នៃសប្តាហ៍ទី១០នេះ។
គួរបញ្ជាក់ថា សម្រាប់ការប្រកួតបើកឆាកជុំទី២ សប្តាហ៍ទី១០ កាលពីម្សិលមិញ នៅពហុកីឡដ្ឋានជាតិអូឡាំពិក ក្រុមភ្នំពេញក្រោន បានត្រឹមរក្សាលទ្ធផលស្មើ ០-០ ជាមួយ ក្រុមខេមបូឌានថាយហ្គឺរប៉ុណ្ណោះ៕
Tag:
បាល់ទាត់
Cambodian League 2016
© រក្សាសិទ្ធិដោយ thmeythmey.com
