ជាតិ
រដ្ឋលេខាធិការ ជា ច័ន្ទបរិបូរណ៍ បង្ហាញអារម្មណ៍មិនសប្បាយចិត្តនៅលើគណនីហ្វេសប៊ុក
× កាលពីដើមសប្ដាហ៍នេះ រដ្ឋលេខាធិការក្រសួងព័ត៌មានលោក ជា ច័ន្ទបរិបូរណ៍ បានធ្វើដំណើរចូលទៅកាន់តំបន់កោះពេជ្រដើម្បីចូលរួមក្នុងពិធីចែកសញ្ញាប័ត្រនិស្សិតសាកលវិទ្យាល័យភូមិន្ទភ្នំពេញ ក្រោមវត្តមានសម្ដេចតេជោនាយករដ្ឋមន្ត្រី។
ពេលឆ្លងស្ពានចូលទៅតំបន់កោះពេជ្រ សមាជិករាជរដ្ឋាភិបាលរូបនេះ បានជួបរឿងដដែលៗរបស់ខ្លួនជាថ្មីទៀតម្តងទៀត គឺទទួលការមើលងាយពីសំណាក់មនុស្សមួយចំនួននៅពេលដែលលោកប្រើរថយន្តតែមួយគត់របស់ខ្លួនម៉ាកលុចស៊ីស៤៥០ដ៏ចំណាស់ ហើយថែមទាំងបើកវាដោយខ្លួនឯង គ្មានតៃកុងឡើយ។
ទំនងជាទ្រាំលែងបាន តាមរយះបណ្ដាយសង្គមហ្វេសប៊ុករបស់ខ្លួន, លោក ជា ច័ន្ទបរិបូរណ៍ បានបង្ហោះដោយសរសេររៀបរាប់ពីនាយនគបាលម្នាក់បញ្ជាឲ្យគាត់ចតរថយន្តចាស់របស់គាត់ដែលមានគ្មានតៃកុងនៅឆ្ងាយពីសាលសន្និបាតបានហើយ បើទោះបីជាគាត់មានប័ណ្ណ VIP ក៏ដោយ។ តាមពិតសំបុត្រ VIP ដូចជាមិនសូវមានតម្លៃទេ។ អ្វីដែលនគបាលរូបនោះ ចាប់អារម្មណ៍ខ្លាំង គឺថា រថយន្តគ្មានតៃកុង ហើយរថយន្តទំនងជាចាស់ពេក។
តាមពិតទៅ នេះមិនមែនជាលើកទី១ឡើយសម្រាប់លោក ជា ច័ន្ទបរិបូរណ៌, បើយោងតាមប្រភពមួយចំនួនដែលស្និទ្ធនឹងលោក។ ការដែលលោករដ្ឋលេខាធិការទទួលរងការមិនសូវឲ្យតម្លៃពីមនុស្សមួយចំនួន អាចបណ្តាលមកពីលោកប្រើរថយន្តកញ្ចាស់ ក្នុងខណៈពេលដែលលោកកំពុងកាន់តួនាទីខ្ពស់ជារដ្ឋលេខាធិការក្រសួងព័ត៌មាន។
ទោះជាយ៉ាងណាក៏ដោយ ក៏មានមតិមួយចំនួនបានលើកឡើងទាក់ទងទៅមន្ត្រីជាន់ខ្ពស់មានធនធាន និងមន្ត្រីជាន់ខ្ពស់មិនសូវមានធនធាន។ មតិនោះ តែងរិះគន់មន្ត្រីធំៗមួយចំនួនដែលជិះឡានល្អ និងមានតម្លៃថ្លៃខ្ពស់ថា មាន«ទ្រព្យសម្បត្តិ» អាចបានប្រាក់ដោយសារការប្រព្រឹត្តិអំពើផ្តេសផ្តាស។ តែមតិដដែលនោះ បើឃើញមន្ត្រីជាន់ខ្ពស់មួយចំនួននៃរាជរដ្ឋាភិបាលផ្សេងទៀត មានជីវភាពមិនសូវធូរធារ ប្រើឡានកញ្ចាស់ គ្មានអ្នកហែរហមអមដំណើរ គ្មានតៃកង់បើកជូន ពួកគេបែរជាមើលងាយទៅវិញ។ តើមតិទាំងនោះចង់បានអ្វីពិតប្រាកដ? គួរលើកទឹកចិត្តអ្នកស្មោះត្រង់ដែលមិនសូវមានប្រាក់ ឬត្រូវអបអរអ្នកអាក្រក់ដែលមានប្រាក់ តែមិនសូវស្មោះត្រង់?
© រក្សាសិទ្ធិដោយ thmeythmey.com