កីឡាជាតិ
តើ រឿង សោភ័ណ្ឌ ឬ ពេជ្រ សីហា នណាជាម្ចាស់ជើងឯកគោជល់រជ្ជកាលទី៤?
× ការប្រកួតក្បាច់គុនបុរាណខ្មែរដណ្តើមពានរង្វាន់ជើងឯកគោជល់រជ្ជកាលទី៤ បានឈានដល់ការប្រកួតវគ្គផ្តាច់ព្រ័ត្រដោយល្ងាចថ្ងៃទី១៨ ខែមិថុនា នេះ កីឡាករជើងខ្លាំង រឿង សោភ័ណ្ឌ ត្រូវប្រជែងជាមួយកីឡាករ ពេជ្រ សីហា ដើម្បីដណ្តើមជើងឯកប្រចាំព្រឹត្តិការណ៍នេះ។ ចំណែកកីឡាករ ឡុង សុភី ជួបប្រកួតជាមួយកីឡាការ ឡាវ ដើម្បីដណ្តើមយកចំណាត់ថ្នាក់លេខ៣ និងលេខ៤។ តើ រឿង សោភ័ណ្ឌ និង ពេជ្រ សីហា នណាជាម្ចាស់ជើងឯកគោជល់រជ្ជកាលទី៤?
កីឡាករជើងខ្លាំង រឿង សោភ័ណ្ឌ បន្ទាប់ពីផ្តួលកីឡាករ ឡុង សុភី ឲ្យសន្លប់នៅក្នុងទឹក២នៅវគ្គពាក់កណ្តាលផ្តាច់ព្រ័ត្រ ត្រូវប្រកួតប្រជែងជាមួយកីឡាករ ពេជ្រ សីហា ដើម្បីដណ្តើមជើងឯកនៃពានរង្វាន់គោជល់រជ្ជកាលទី៤ នាវេលាម៉ោង ៦ល្ងាចនេះ នៅលើសង្វៀនស្ថានីយទូរទស្សន៍ CNC។ គូនេះនិងក្លាយជាគូដ៏ជក់ចិត្តព្រោះសុទ្ធសឹងជាកីឡាករជើងខ្លាំង ជាពិសេសនោះមុននឹងមកជួបគ្នានៅវគ្គផ្តាច់ព្រ័ត្រនេះ កីឡាករ ពេជ្រ សីហា បានផ្តួលគូប្រកួតឲ្យសន្លប់នៅក្នុងទឹកទី៤ នៅពាក់កណ្តាលផ្តាច់ព្រ័ត្រ ចំណែក រឿង សោភ័ណ្ឌ ផ្តូលដៃគូឲ្យសន្លប់ក្នុងទឹកទី២។
ចំណែកកីឡាករ ឡុង សុភី មកពីក្លិបសាលវ័ន្តកីឡា ក្រោយពីចាញ់កីឡាករ រឿង សោភ័ណ្ឌ ត្រូវប្រកួតប្រជែងដណ្តើមយកចំណាត់ថ្នាក់លេខ៣ និងលេខ៤ ជាមួយកីឡាករឡាវធុតស៍ភុន ស.សុម៉ាលី ជាកីឡាករដែលសន្លប់ក្នុងទឹកទី៤ក្រោមកណ្តាប់ដៃរបស់កីឡាករ ពេជ្រ សីហា នៅវគ្គពាក់កណ្តាលផ្តាច់ព្រ័ត្រនាល្ងាចនេះផងដែរ។
Tag:
ប្រដាល់
រឿង សោភ័ណ្ឌ
ពេជ្រ សីហា
ឡុង សុភី
© រក្សាសិទ្ធិដោយ thmeythmey.com