កីឡាជាតិ
ជាតិ
ព្រះខ័នរាជស្វាយរៀងអាចការពារជើងឯក ឬក៏ក្រសួងការពារជាតិអាចលើកពានជាលើកទីពីរ?
× ក្រោយពីឆ្លងកាត់ការឈ្នះនៅវគ្គពាក់កណ្តាលផ្តាច់ព្រ័ត្ររៀងៗខ្លួននាពេលកន្លងមក ដោយក្រសួងការពារជាតិ បានយកឈ្នះ មជ្ឈមណ្ឌលកំចាត់មីនកម្ពុជា ខណៈព្រះខ័នរាជស្វាយរៀង បានយកឈ្នះ ភ្នំពេញក្រោន នៅលើទីលាននៃពហុកីឡដ្ឋានជាតិដូចគ្នា។ នាការប្រកួតវគ្គផ្តាច់ព្រ័ត្រនាល្ងាចនេះ ក្រសួងការពារជាតិ(ទ័ព) ត្រូវប្រជែងជាមួយ ក្រុមព្រះខ័នរាជស្វាយរៀង ដើម្បីដណ្តើមជើងឯកនៃពានរង្វាន់សម្តេច ហ៊ុន សែន ប្រចាំឆ្នាំ២០១៦។ តើក្រុមទាំងពីរមួយណាជាម្ចាស់ជើងឯកនៃពានរង្វាន់នេះ?
ម្ចាស់ពានឆ្នាំ២០១០ ក្រសួងការពារជាតិ ក្រោយពីយកឈ្នះក្រុមមជ្ឈមណ្ឌលកំចាត់មីនកម្ពុជា ៣-០ នៅវគ្គពាក់កណ្តាល់ផ្តាច់ព្រ័ត្រ ត្រូវប្រជែងក្នុងវគ្គផ្តាច់ព្រ័ត្រជាមួយម្ចាស់ការពារតំណែងជើងឯកព្រះខ័នរាជស្វាយរៀង ដែលបានយកឈ្នះក្រុមភ្នំពេញក្រោន ៣-២ ដើម្បីដណ្តើមជើងឯកនៃពានរង្វាន់សម្តេច ហ៊ុន សែន លើកទី១០ នាវេលាម៉ោង៧:០០ល្ងាច នៅពហុកីឡដ្ឋានជាតិ។
ជាមួយគ្នានេះ លោក សំ វ៉ាន់ដេត គ្រូបង្វឹកក្រុមព្រះខ័នរាជស្វាយរៀងបានទទួលស្គាល់ថា ក្រុមក្រសួងការពារជាតិគឺជាក្រុមដ៏ខ្លាំងមួយនាពេលបច្ចុប្បន្ន ប៉ុន្តែទោះបីជាយ៉ាងនេះក្តីគ្រូបង្វឹករូបនេះបានត្រៀមរូចជាស្រេចក្នុងការជួបជាមួយក្រុមទ័ពនាល្ងាចនេះ។
លោកបានបញ្ជាក់ថា៖«ក្រុមការពារជាតិគាត់គឺជាក្រុមខ្លាំងនាពេលបច្ចុប្បន្ន ក៏ប៉ុន្តែមិនមែនហាត់តែឯងនោះទេ ក្រុមណាក៏ហាត់ដែរ ទោះក្រុមខ្ញុំក៏ដោយ គឺហាត់ដូចគ្នា។ ដូចយើងបានឃើញក្រុមឥឡូវមានសមត្ថភាពប្រហាក់ប្រហែលគ្នា យើងមិនអាចមើលស្រាលបាននោះទេ ព្រោះឆ្លងការការប្រកួតទោះបីក្រុមខ្លាំងជួបក្រុមខ្សោយគឺហ្គេមនៅតែមានបញ្ហា»។
បើយោងតាមប្រវត្តិជួបគ្នារវាងក្រុមព្រះខ័នរាជស្វាយរៀង និងក្រុមក្រសួងការពារជាតិតាំងពីឆ្នាំ២០១៣ រហូតដល់ឆ្នាំ២០១៥ ក្នុងចំណោម៥ប្រកួតព្រះខ័នរាជស្វាយរៀងឈ្នះបាន២ប្រកួត និងចាញ់៣ប្រកួត។ ជ័យជម្នះ២ដងរបស់ព្រះខ័នរាជស្វាយរៀងគឺក្នុងឆ្នាំ២០១៥ទាំងពីរប្រកួត ជាឆ្នាំដែលក្រុមនេះក្លាយជាម្ចាស់ជើងឯកពានរង្វាន់សម្តេច ហ៊ុន សែន ប្រចាំឆ្នាំ២០១៥ ៕
កម្មវិធីប្រកួតវគ្គផ្តាច់ព្រ័ត្រថ្ងៃទី២ ខែកក្កដា ឆ្នាំ២០១៦៖
- ម៉ោង ៣:៣០នាទី៖ ភ្នំពេញក្រោន ជួប មជ្ឈមណ្ឌលកំចាត់មីនកម្ពុជា នៅពហុកីឡដ្ឋានជាតិ
- ម៉ោង ៧:០០នាទី៖ ក្រសួងការពារជាតិ ជួប ព្រះខ័នរាជស្វាយរៀង នៅពហុកីឡដ្ឋានជាតិ។
Tag:
បាល់ទាត់
Hun Sen Cup 2016
© រក្សាសិទ្ធិដោយ thmeythmey.com