កីឡាជាតិ
ជាតិ
ក្រសួងការពារជាតិក្លាយជាម្ចាស់ពាន Hun Sen Cup ឆ្នាំ២០១៦ ក្រសួងការពារជាតិលើកពានរង្វាន់សម្តេច ហ៊ុន សែន ជាលើកទីពីរ។ រូបថត Masayori Ishikawa
× ក្រសួងការពារជាតិ ក្លាយជាម្ចាស់ជើងឯកពានរង្វាន់សម្តេច ហ៊ុន សែន ឆ្នាំ២០១៦ ក្រោយការស៊ុតបាល់ប៉េណាល់ឈ្នះព្រះខ័នរាជស្វាយរៀង ៦-៥ បន្ទាប់ពីបញ្ចប់ក្នុងលទ្ធផលស្មើ ១-១ ក្រោយការប្រកួត១២០នាទី។ រ៉ឹង ប៊ុនហៀង បានស៊ុតបាល់បញ្ចូលទីនាំមុខសម្រាប់ក្រសួងការពារជាតិនៅក្នុងនាទី ទី៨០ ប៉ុន្តែ៨នាទីក្រោយមក សារ៉េត គ្រីយ៉ា បានវាយបកតាមស្មើសម្រាប់ព្រះខ័នរាជស្វាយរៀង។ ការប្រកួតឈានដល់ការបន្ថែមម៉ោង១៥នាទីពីរដង មិនមានការស៊ុតបាល់បញ្ចូលទីឡើយ។
អ្នកចាំទី អោម ឧត្តម បានស៊ុតបាល់ប៉េណាល់ទីបើកឆាកហើយធ្វើបានសម្រេចសម្រាប់ព្រះខ័នរាជស្វាយរៀង។ ច្រឹង ពលរដ្ឋ តាមស្មើ ១-១ ឲ្យក្រសួងការពារជាតិ។ សឿយ វិសាល នាំព្រះខ័នរាជនាំមុខ ២-១ ។ សុខ ហៀង ជួយឲ្យក្រសួងការពារតាមស្មើ ២-២ ។ ហួយ ផល្លីន របស់ព្រះខ័នរាជ បានទាត់បាល់ហើរលើរបាទី ប៉ុន្តែ អោម ឧត្តម បានសង្គ្រោះបាល់របស់ អ៊ុព កាម៉ុល ដើម្បីរក្សាលទ្ធផល ២-២ ដដែល។
សំអឿន ពិដោរ បង្កើនការនាំមុខ ៣-២ សារជាថ្មីរបស់ព្រះខ័នរាជ បន្ទាប់មក ឈិន ឈឿន បានស៊ុតតាមស្មើ ៣-៣ វិញសម្រាប់ការពារជាតិ។ ឈានដល់ការស៊ុតគ្រាប់ទី៥ នេន សុធារ័ត្ន ធ្វើបានសម្រេចសម្រាប់ព្រះខ័នរាជ ហើយ ខែក ខេមរិន្ទ ធ្វើបានសម្រេចស្មើ ៤-៤ ឲ្យការពារជាតិ។
ប្រាក់ សុវណ្ណពិសិដ្ឋ បានបរាជ័យក្នុងការស៊ុតឲ្យផុតដៃពី អ៊ុំ សេរីរ័ត្ន បន្ទាប់មក អ៊ុំ សេរីរ័ត្ន បានធ្វើជាអ្នកស៊ុតបាល់ម្តង ហើយការស៊ុតរបស់គេធ្វើឲ្យបាល់ហើរលើរបាទី។ សារ៉េត គ្រីយ៉ា នាំមុខ ៥-៤ សារជាថ្មី សម្រាប់ព្រះខ័នរាជ ហើយ ស ពិសិដ្ឋ តាមស្មើ ៥-៥ សម្រាប់ការពារជាតិ។ ឈានគ្រាប់ទី៨ ជា សំណាង បានទាត់បាល់ចំលើរបាទី ខណៈរ៉ឹង ប៊ុនហៀង ជាអ្នកនាំជ័យជម្នះ ៦-៥ ឲ្យក្រសួងការពារជាតិដើម្បីលើកពានជាលើកទីពីរ៕
© រក្សាសិទ្ធិដោយ thmeythmey.com