កីឡាជាតិ
ជាតិ
សួង វិរៈ កីឡាករទី៧ដែលទទួលបានស្បែកជើងមាសក្នុងពានរង្វាន់សម្តេច ហ៊ុន សែន សួង វិរៈ ទទួលពានស្បែកជើងមាសពីលោក សៅ សុខា ប្រធានសហព័ន្ធកីឡាបាល់ទាត់កម្ពុជា។ រូបថត Masayori Ishikawa
× ពានរង្វាន់កីឡាបាល់ទាត់សម្តេច ហ៊ុន សែន ឬ Hun Sen Cup បានធ្វើដំណើរអស់រយៈពេល១០ឆ្នាំហើយ។ ក្រសួងការពារជាតិ បានលើកពានលើកទីពីរ ក្រោយយកឈ្នះជើងឯកឆ្នាំចាស់ ព្រះខ័នរាជស្វាយរៀង កាលពីល្ងាចថ្ងៃសៅរ៍ ទី២ ខែកក្កដា។ បើគិតលើរង្វាន់កីឡាករដែលស៊ុតបាល់បញ្ចូលទីច្រើនជាងគេ កីឡាករ សួង វិរៈ នៃក្លិបខេមបូឌានថាយហ្គឺរ ក្លាយជាកីឡាករទី៧ដែលទទួលស្បែកជើងមាស (Golden Boot) ជាមួយនឹងប្រាក់រង្វាន់១លានរៀល។
គួច សុគម្ភៈ ដែលបច្ចុប្បន្នជាកីឡាកររបស់ណាហ្គាវើល ទទួលបានស្បែកជើងមាសមុនគេនៅពេលខេមរាកីឡាឈ្នះពាន Hun Sen Cup បើកឆាកនៅឆ្នាំ២០០៧។ គេបានឈ្នះ Golden Boot ពីរលើកទៀត ពោលគឺនៅឆ្នាំ២០០៩ នៅពេលខេមរាធ្លាក់នៅវគ្គ១/៤ផ្តាច់ព្រ័ត្រ។ នៅឆ្នាំ២០១០ ខេមរាកីឡាខកឱកាសឡើងទៅវគ្គ១/២ផ្តាច់ព្រ័ត្រដូចគ្នា ប៉ុន្តែ សុគម្ភៈ នៅតែឈ្នះពាន Golden Boot ដោយចែករំលែកជាមួយ ស្រី វាសនា នៃក្លិបភ្នំពេញក្រោន ដែលបានស៊ុតបាល់បញ្ចូលទីចំនួន២០គ្រាប់ដូចគ្នា។
ឃួន ឡាបូរ៉ាវី គឺជាកីឡាករដែលឈ្នះស្បែកជើងមាសបីលើកផងដែរ ដោយរូបគេទទួលបាន២លើកក្នុងនាមជាកីឡាកររបស់ព្រះខ័នរាជ ខណៈក្រុមមួយនេះលើកពានកាលពីឆ្នាំ២០១១ និងឆ្នាំ២០១២ ។ ពីរឆ្នាំក្រោយ បូរ៉ាវី ទទួលបានស្បែកជើងមាសម្តងទៀត នៅពេលដែលក្រុមបឹងកេតអង្គររបស់គេបានចំណាត់ថ្នាក់លេខបី នាឆ្នាំ២០១៤ ។
សុក ច័ន្ទរស្មី គឺជាកីឡាករទីពីរដែលបានឈ្នះ Golden Boot ខណៈរូបគេលេងឲ្យក្លិបព្រះខ័នរាជដែលបញ្ចប់ចំណាត់ថ្នាក់លេខ២ កាលពីឆ្នាំ២០០៨ ។ ការឈ្នះពានជាមួយក្លិបក្រសួងការពារជាតិកាលពីថ្ងៃសោរ៍ នាំឲ្យ ច័ន្ទរស្មី ឈ្នះ ពានរង្វាន់សម្តេច ហ៊ុន សែន សរុបចំនួន៣លើក ដោយពីរលើកមុន គេបានឈ្នះជាមួយក្លិបព្រះខ័នរាជ។
នៅឆ្នាំ២០១៣ ចាន់ វឌ្ឍនា បានស៊ុតបាល់បញ្ចូលទីច្រើនជាងគេ នៅពេលដែលចម្ការកៅស៊ូបឹងកេត (ឈ្មោះដើមរបស់បឹងកេតអង្គរ) ធ្លាក់នៅវគ្គ១/៤ផ្តាច់ព្រ័ត្រ។ នៅឆ្នាំ២០១៥ ប្រាក់ មុន្នីឧត្តម បានកាន់កាប់ Golden Boot ក្រោយស្វាយរៀង (ព្រះខ័នរាជស្វាយរៀង) ឈ្នះពាននៅទឹកដីរបស់ខ្លួន។
នៅឆ្នាំ២០១៦ សួង វីរៈ នៃក្លិបខេមបូឌានថាយហ្គឺរ បានក្លាយជាកីឡាករទី៨ ដែលឈ្នះ Golden Boot បើទោះបីជាថាយហ្គឺរចាញ់ក្រសួងការពារជាតិនៅវគ្គ១/៤ផ្តាច់ព្រ័ត្រក៏ដោយ។ វីរៈ បានស៊ុតបាល់បញ្ចូលទីសរុប២៥គ្រាប់។ នៅពេលថាយហ្គឺរឈ្នះខេត្តកណ្តាល ១៨-០ នៅវគ្គជម្រុះ វិរៈ បានស៊ុតបាល់បញ្ចូលទីតែម្នាក់ឯករហូតដល់ទៅ១៥គ្រាប់៕
Tag:
បាល់ទាត់
Hun Sen Cup
© រក្សាសិទ្ធិដោយ thmeythmey.com