លោក វ៉ាត់ ចំរើន៖ អ្នកមានបំណងចូលរួមរត់ម៉ារ៉ាតុនអង្គរ គួរចុះឈ្មោះឲ្យបានទាន់ពេល

កីឡាជាតិ

ជាតិ

លោក វ៉ាត់ ចំរើន៖ អ្នកមានបំណងចូលរួមរត់ម៉ារ៉ាតុនអង្គរ គួរចុះឈ្មោះឲ្យបានទាន់ពេល

04, Jul 2016 , 9:19 am

រូបភាព

ដោយ:

នាសន្និសីទសារព័ត៌មានកាលពីថ្ងៃទី២៩ ខែមិថុនា នៅទីស្នាក់ការគណៈកម្មាធិការជាតិអូឡាំពិកកម្ពុជា(NOCC) លោក វ៉ាត់ ចំរើន អគ្គលេខាធិការ NOCC បានស្នើឲ្យប្រជាជនកម្ពុជាបោះបង់ទម្លាប់យឺតយ៉ាវក្នុងការចុះឈ្មោះចូលរួមរត់ប្រណាំងក្នុងទិវារត់ប្រណាំងម៉ារ៉ាតុនអន្តរជាតិចក្រភពអង្គរ លើកទី៣ នៅទីរួមខេត្តសៀមរាប ដែលនឹងចាប់ផ្តើមប្រកួតនៅថ្ងៃទី៧ ខែសីហា ខាងមុខនេះ ហើយលោកស្នើឲ្យអ្នកដែលមានបំណងចូលរួមមកចុះឈ្មោះឲ្យបានទាន់ពេលវេលា ដើម្បីងាយស្រួលក្នុងការរៀបចំឲ្យបានល្អ។

អគ្គលេខាធិការ NOCC តាមរយៈការសង្កេតឃើញពីភាពយឺតយ៉ាវរបស់ប្រជាជនកម្ពុជាក្នុងការចុះឈ្មោះចូលរួមរត់ប្រណាំងម៉ារ៉ាតុនអន្តរជាតិចក្រភពកាលពីឆ្នាំមុនៗ បានស្នើរឲ្យប្រជាជនកម្ពុជាដែលមានបំណងចង់ចូលរួមរត់ប្រណាំងម៉ារ៉ាតុនអន្តរជាតិចក្រភពអង្គរឆ្នាំនេះ បោះបង់ទម្លាប់ចាស់ទាំងនោះ រួចរួសរាន់មកចុះឈ្មោះចូលរួមឲ្យបានទាន់ពេលវេលា ដើម្បីងាយស្រួលសម្រាប់ក្រុមការងារត្រៀមរៀបចំឲ្យបានល្អសម្រាប់អ្នកចូលរួម។ ជាមួយគ្នានេះ លោក បានសរសើរជនបរទេស ដែលតែងតែមកចុះឈ្មោះបានទាន់ពេលវេលាសម្រាប់ការចូលរួមផងដែរ។

លោកបានបញ្ជាក់ថា៖«ជនបរទេសដែលចូលរួមទិវារត់ប្រណាំងម៉ារ៉ាតុនអន្តរជាតិចក្រភពអង្គរនេះ តែងតែមកចុះឈ្មោះចូលរួមទាន់ពេលវេលាត្រឹមត្រូវជានិច្ច ប៉ុន្តែប្រជាជនកម្ពុជាវិញច្រើនតែមិនចោលទម្លាប់ដែលជិតដល់ថ្ងៃប្រកួតទើបទៅចុះឈ្មោះ ឬដល់ថ្ងៃរត់បានទៅចុះឈ្មោះ។ ហេតុនេះខ្ញុំសូមស្នើប្រជាជនកម្ពុជា ដែលមានបំណងចង់ចូលរួមទិវារត់ប្រណាំងម៉ារ៉ាតុនអន្តរជាតិចក្រភពអង្គរឆ្នាំនេះ មេត្តាមកចុះឈ្មោះឲ្យបានលឿនដើម្បីងាយស្រួលក្នុងការរៀបចំត្រៀមសម្រាប់អ្នកចូលរួមឲ្យបានល្អ»។

សម្រាប់អ្នកចុះឈ្មោះចូលរួមរត់ប្រណាំងក្នុងទិវារត់ប្រណាំងម៉ារ៉ាតុនអន្តរជាតិចក្រភពអង្គរលើកទី៣ មកទល់ពេលនេះមានចំនួនជិត២ពាន់នាក់ហើយ ដោយក្នុងនោះជនបរទេសចំនួនជាង១ពាន់នាក់ កម្ពុជាជាង៥០០នាក់ ក្នុងចំណោមជនបរទេសដែលចុះបានចុះឈ្មោះចូលរួមទាំងនោះភាគច្រើនជាជនជាតិចិន។ ហើយប្រសិនបើអ្នកមានបំណងចង់ចុះឈ្មោះចូលរួមប្រកួតក្នុងព្រឹត្តិការណ៍នេះអាចចូលទៅកាន់ www.angkorempiremarathon.org។

លោក សែម ផល្លា នាយកប្រតិបត្តិនៃគណៈកម្មការរៀបចំការប្រកួតនេះបានបញ្ជាក់ថា កាលពីឆ្នាំ២០១៥ មានអ្នកចុះឈ្មោះចូលរួមចំនួនជាង២ពាន់នាក់ ហើយសម្រាប់ឆ្នាំនេះ លោក រំពឹងថា នឹងទទួលបានអ្នកចូលរួមកើនជាងឆ្នាំមុន។ ការប្រកួតរត់ប្រណាំងម៉ារ៉ាតុនអន្តរជាតិចក្រភពអង្គរនេះ មាន៤ប្រភេទវិញ្ញាសាចូលរួម គឺ៤២,១៩៥គីឡូម៉ែត្រ, ២១គីឡូម៉ែត្រ, ១០គីឡូម៉ែត្រ និង៣គីឡូម៉ែត្រ។ តម្លៃចុះឈ្មោះសម្រាប់វិញ្ញាសា៤២គីឡូម៉ែត្របរទេស ៦៥ដុល្លារ និងកម្ពុជា២០ដុល្លារ, ២១គីឡូម៉ែត្របរទេស៥៥ដុល្លារ កម្ពុជា១៥ដុល្លារ, ១០គីឡូម៉ែត្របរទេស៥០ដុល្លារ កម្ពុជា១២ដុល្លារ និង៣គីឡូម៉ែត្របរទេស៣០ដុល្លារ និងកម្ពុជា៥ដុល្លារ។

ទន្ទឹមនឹងនេះ លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានបញ្ជាក់ថា ថវិកាដែលបានមកពីការចុះឈ្មោះចូលរួមទិវារត់ប្រណាំងម៉ារ៉ាតុនអន្តរជាតិចក្រភពអង្គរនឹងយកជួយដល់មន្ទីរពេទ្យកុមារអង្គរសៀមរាប និងអង្គរនានាដែលធ្វើការជាលក្ខណៈមនុស្សធម៌។

លោកបានបន្ថែមថា ការរៀបចំការរត់ប្រណាំងម៉ារ៉ាតុនអន្តរជាតិចក្រភពអង្គរនេះឡើងក្នុងគោលបំណងដើម្បីជួយលើកស្ទួយវិស័យកីឡាកម្ពុជាឲ្យមានការរីកចម្រើន និងជួយលើកស្ទួយវិស័យទេសចរណ៍កម្ពុជាតាមការទាក់ទាញភ្ញៀវទេសចរណ៍ឲ្យមកទស្សនាតំបន់អង្គរ ព្រោះខែសីហា ជាខែមួយដែលមានភ្ញៀវទេសចរណ៍ធ្លាក់ចុះ៕