ជាតិ
នយោបាយជាតិ
ជប៉ុនបន្តផ្តល់ជំនួយដល់ គ.ជ.ប តែចង់ឲ្យ CPP និង CNRP ចរចាគ្នាឡើងវិញ
× ភ្នំពេញ៖ រដ្ឋាភិបាលជប៉ុន នៅតែប្រកាសបន្តផ្តល់ជំនួយជាថវិកាដល់គណៈកម្មាធិការជាតិរៀបចំការបោះឆ្នោត (គ.ជ.ប) សម្រាប់រៀបចំការបោះឆ្នោតជ្រើសរើសក្រុមប្រឹក្សាឃុំ សង្កាត់ឆ្នាំ ២០១៧ និងការបោះឆ្នោតថ្នាក់ជាតិអាណត្តិទី៦ ឆ្នាំ ២០១៨ ខាងមុខ បើទោះជាគណបក្សប្រជាជនកម្ពុជានិងគណបក្សសង្គ្រោះជាតិកំពុងមានទំនាស់នឹងគ្នា។ តែជប៉ុនចង់ឲ្យគណបក្សទាំងពីរ អង្គុយតុចរចារដោះស្រាយបញ្ហាឡើងវិញ ដើម្បីឲ្យការបោះឆ្នោតកាន់តែប្រសើរ។
រដ្ឋាភិបាលជប៉ុននៅតែបន្តផ្តល់ជំនួយថវិកាដល់គណៈកម្មាធិការជាតិរៀបចំការបោះឆ្នោត ដើម្បីរៀបចំការបោះឆ្នោតនៅកម្ពុជានៅពេលខាងមុខ។ ជំហរជប៉ុនបែបនេះ ត្រូវបានប្រកាសឲ្យដឹងជាថ្មីដោយឯកអគ្គរាជទូតជប៉ុនប្រចាំកម្ពុជា លោក Kumamaru Yuji ក្រោយបញ្ចប់ពិធីចុះហត្ថលេខាលើជំនួយឧបត្ថម្ភសម្រាប់ គម្រោងជំនួយអង្គការក្រៅរដ្ឋាភិបាលជប៉ុន នៅថ្ងៃទី៤ កក្កដានេះ។
ការបញ្ជាក់ពីការផ្តល់ជំនួយដល់គ.ជ.ប មន្ត្រីទូតជប៉ុនរូបនេះ ក៏ធ្វើឡើយក្រោយពីប្រមុខរដ្ឋាភិបាល សម្តេច ហ៊ុន សែន ធ្លាប់ព្រមានខ្លាំងៗ កាលពីសប្តាហ៍មុនទៅកាន់មន្ត្រីបេសកកម្មទូតបរទេសជុំវិញរឿងបំណងផ្តាច់ជំនួយដល់ គ.ជ.ប ដោយសារតែរឿងក្តីក្តាំពាក់ព័ន្ធនឹងឯកឧត្តម កឹម សុខា។ សម្តេច ហ៊ុន សែន បានប្រកាសពេលនោះ ដោយមានវត្តមានលោកឯកអគ្គរាជទូតជប៉ុនផងថា បើទោះបីជាអន្តរជាតិមិនផ្តល់ជំនួយដល់ការបោះឆ្នោតក្តី ក៏រដ្ឋាភិបាលកម្ពុជា នៅតែរៀបចំឲ្យមានការបោះឆ្នោតដោយខ្លួនឯងបានដែរ។
លោក Kumamaru Yuji បានប្រាប់សារព័ត៌មានអេឡិចត្រូនិចថ្មីៗថា រដ្ឋាភិបាលជប៉ុននៅតែផ្តល់ជំនួយដល់ដំណើរការរៀបចំការបោះឆ្នោតកម្ពុជាទៀត ពីព្រោះលោកជឿជាក់ថា ការបោះឆ្នោតមួយតាមបែបប្រជាធិបតេយ្យនឹងជួយកំណត់ពីអនាគតប្រទេសកម្ពុជា។ ឯកអគ្គរាជទូតប្រទេសផ្តល់ជំនួយរៀបចំការបោះឆ្នោតនៅកម្ពុជារូបនេះ បាននិយាយពីមូលហេតុដែលរដ្ឋាភិបាលជប៉ុនបន្តផ្តល់ជំនួយថវិកាដល់ គ.ជ.ប ដូច្នេះថា៖«ខ្ញុំយល់ថា វាគឺជាការបោះឆ្នោតដ៏សំខាន់នៅកម្ពុជា។ យើងចង់ធ្វើ ហើយយើងចង់ជួយកម្ពុជា។ ពិតណាស់! ការបោះឆ្នោត គឺរឿងដ៏សំខាន់ ព្រោះវាជាកំណត់អនាគតរបស់កម្ពុជា។ យើងចង់ជួយកម្ពុជា»។
ជាមួយគ្នានេះផងដែរ ពាក់ព័ន្ធនឹងបញ្ហាងាកចេញពីតុចរចារវាងអ្នកនយោបាយបក្សទាំងពីរបច្ចុប្បន្ន លោកឯកអគ្គរាជទូតជប៉ុនរូបខាងលើសង្ឃឹមថា គណបក្សប្រជាជនកម្ពុជា និងគណបក្សសង្គ្រោះជាតិនឹងងាកមករកតុពិភាក្សាគ្នាដោះស្រាយបញ្ហានយោបាយបច្ចុប្បន្នឡើងវិញដោយសន្តិវិធី មុនការបោះឆ្នោតខាងមុខឈានមកដល់។ លោកថា ការដោះស្រាយបញ្ហាដោយអង្គុយតុចរចានេះ ដើម្បីធានាឲ្យការបោះឆ្នោតតាមបែបប្រជាធិបតេយ្យ កាន់តែប្រសើរនៅកម្ពុជា៕
Tag:
បោះឆ្នោត
CPP
CNRP
ជប៉ុន
កឹម សុខា
ហ៊ុន សែន
© រក្សាសិទ្ធិដោយ thmeythmey.com