ជាតិ
រឿងពុករលួយ៖ លោក ឱម យ៉ិនទៀង រិះគន់អភិបាលខេត្តបាត់ដំបង
× ប្រធានអង្គភាពប្រឆាំងអំពើពុករលួយលោក ឱម យ៉ិនទៀង បានរិះគន់លោកអភិបាលខេត្តបាត់ដំបូងលោក ច័ន្ទ សុផល ថា ធ្វើខុសពីដែនសមត្ថកិច្ចរបស់ខ្លួន ដោយមិនព្រមបញ្ជូនសំណុំរឿងមកឲ្យអង្គភាពប្រឆាំងអំពើពុករលួយរបស់អភិបាលស្រុកថ្មគោលមកអង្គភាពខ្លួន។ តែយ៉ាងណាលោក ច័ន្ទ សុផល ថា លោកមិនខ្វល់នឹងការលើកឡើងរបស់លោក ឱម យ៉ិនទៀង នោះទេ។
ការឆ្លើយឆ្លងគ្នារវាងប្រធានអង្គភាពប្រឆាំងអំពើពុករលួយជាមួយលោកអភិបាលខេត្តបាត់ដំបងនេះ កើតឡើងដោយសារតែលិខិតមួយចំនួន ត្រូវបានជនមិនស្គាល់មុខផ្សព្វផ្សាយជាសាធារណៈដោយចោទថា លោកអភិបាលស្រុកថ្មគោលប្រព្រឹត្តអំពើពុករលួយ។ យោងតាមកាសែត The Cambodia Daily ដែលចុះផ្សាយនៅថ្ងៃនេះ សំណុំរឿងនេះ លោក ឱម យ៉ិនទៀង ស្នើឲ្យលោកអភិបាលខេត្តបាត់ដំបងលោក ច័ន្ទ សុផល ប្រគល់ឲ្យអង្គភាពរបស់ខ្លួនបើកការស៊ើបអង្កេត តែលោក ច័ន្ទ សុផល មិនយល់ព្រមនោះឡើយ។
លោក ច័ន្ទ សុផល បានប្រាប់កាសែត The Cambodia Daily ថា លោកបានបញ្ជាឲ្យមន្ត្រីគ្រប់គ្រងខេត្ត ធ្វើការស៊ើបអង្កេតហើយ តែលោកនឹងមិនបញ្ជូនសំណុំរឿងនេះ ទៅអង្គភាពប្រឆាំងអំពើពុករលួយទេ ពីព្រោះតែវាស្ថិតនៅកម្រិតថ្នាក់ខេត្ត ។ លោកអភិបាលខេត្តបន្ថែមថា ចំពោះករណីនេះ ប្រសិនបើរកឃើញថា លោក គង់ លី អភិបាលស្រុកថ្មគោលមានកំហុសដូចការចោទប្រកាន់មែននេះ លោកនឹងដាក់ពិន័យលោក គង់ លី ហើយនឹងឲ្យគាត់សងលុយ ព្រមទាំងអប់រំកុំឲ្យធ្វើខុសលើកក្រោយទៀត។
តែយ៉ាងណាលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ មិនអាចទទួលយកបានចំពោះការលើកឡើងរបស់លោក ច័ន្ទ សុផល នោះទេ។ លោក យ៉ិនទៀង បានប្រាប់ទៅលោក សុផល តាមរយៈ The Cambodia Daily ថា លោកអភិបាលខេត្តបាត់ដំបង ធ្វើហួសពីព្រំដែនរបស់ខ្លួន។«ឋានៈជាអភិបាលខេត្តម្នាក់ មិនអាចចាត់ការ និងបញ្ចប់រឿងក្តីពុករលួយបានទេ។ បើទោះបីជាអភិបាលស្រុកនោះ សងលុយមកវិញក៏ដោយ។ គាត់មិនអាចរួចផុតពីសំណាញ់ច្បាប់បានដែរ»។
ក៏ប៉ុន្តែលោក ច័ន្ទ សុផល បានថ្លែងការពារខ្លួនថា លោកមិនខ្វល់ពីអ្វីដែលលោក ឱម យ៉ិនទៀង និយាយទេ។ លោក បញ្ជាក់យ៉ាងនេះថា៖« អភិបាលស្រុក គឺជាមន្ត្រីរបស់ខ្ញុំ ខ្ញុំជាចៅហ្វាយរបស់គាត់។ ដូច្នេះ ខ្ញុំអាចប្រើតំណែងរបស់ខ្ញុំ ជាអភិបាលខេត្ត ដើម្បីដោះស្រាយបញ្ហានេះ»។
សូមបញ្ជាក់ថា កាលពីថ្ងៃទី ០២ ខែកក្កដា មានជនអនាមិក បានបោះលិខិតជាច្រើនសន្លឹកនៅតាមទីសាធារណៈនៃក្រុងបាត់ដំបង ដោយក្នុងលិខិតនេះ ចោទប្រកាន់លោក គង់ លី អភិបាលស្រុកថ្មគោលថា បានសហការគ្នាជាមួយលោកប្រធានការិយាល័យរដ្ឋបាលស្រុកប្រព្រឹត្តអំពើពុករលួយដោយយកលុយរដ្ឋទៅស៊ីផឹកជាមួយបក្សពួកខ្លួនរាល់ល្ងាច។ ជាងនេះ នៅក្នុងលិខិតនោះ ដែលមានសរសេរថា តាងនាមឲ្យមន្ត្រីរាជការស្រុកថ្មគោលនោះ បានចោទលោក គង់ លី ថាប្រព្រឹត្តអំពើពុករលួយទាក់ទងនឹងគម្រោងសាងសង់ផ្លូវបេតុងចូលសាលាស្រុកមួយខ្សែប្រវែង ១១០ ម៉ែត្រ ទទឹង ៥ ម៉ែត្រ ចំណាយប្រាក់ ៥៥ លានរៀល ប្រគល់ឲ្យក្រុមហ៊ុនដោយគ្មានការដេញថ្លៃ ព្រមទាំងមិនបានឆ្លងក្រុមប្រឹក្សាស្រុកអនុម័ត។ បន្ថែមពីលើនេះទៀត លិខិតអនាមិកនោះ ក៏ចោទលោកអភិបាលស្រុកថ្មគោល និងប្រធានការិយាល័យរដ្ឋបាលសាលាស្រុកថា បានរួមគ្នាកិបកិបកេងលុយ លើគម្រោងផ្លូវក្រាលគ្រួសក្រហមចូលសាលាស្រុកដូចគ្នាមួយខ្សែទៀត ដែលមានទឹកប្រាក់ ១៥ លានរៀល។ តែជាក់ស្តែងផ្លូវចាក់បេតុងត្រូវបានក្រុមហ៊ុនផ្សារថ្មីជួយធ្វើមួយកំណាត់ តែផ្លូវក្រាលគ្រួសក្រហមចូលសាលាស្រុកមិនធ្វើឡើយ ដោយអ្នកទាំងពីរនេះ យកលុយដាក់ហោប៉ាវ។
តែយ៉ាងណា លោក លោក គង់ លី បានប្រាប់កាសែត The Cambodia Daily ថា លោកមិនទទួលបានផលប្រយោជន៍ពីកិច្ចសន្យាណាមួយទេ។ «ខ្ញុំមិនបានប្រព្រឹត្តអំពើពុករលួយ ដូចការចោទប្រកាន់ពីជនអនាមិកនោះទេ។ ពួកគេ គ្រាន់តែចង់បំផ្លាញកិត្តិយសរបស់ខ្ញុំប៉ុណ្ណោះ។ ខ្ញុំជាអ្នកក្រ ហើយខ្ញុំជិះតែម៉ូតូទៅធ្វើការរាល់ថ្ងៃ»។ នេះជាការបញ្ជាក់របស់លោក គង់ លី៕
© រក្សាសិទ្ធិដោយ thmeythmey.com