អន្តរជាតិ
បេក្ខជនប្រធានាធិបតី ដូណាល់ត្រាំ សរសើរ សាដាម ហ៊ូសេន ថាពូកែកម្ចាត់ភេរវជន
× បេក្ខជនប្រធានាធិបតីបក្សសាធារណរដ្ឋ ដូណាល់ ត្រាំ បានថ្លែងសរសើរលោក លោក សាដាម ហ៊ូសេន ( Saddam Hussein) ថា មេដឹកនាំម្នាក់នេះពូកែខាងកម្ចាត់ក្រុមភេរវជន ទោះបីជា លោកផ្តាច់ការនិងអាក្រក់ក៏ដោយ។ ការលើកឡើងបែបនេះ បង្កឲ្យមានការប្រតិកម្មខ្លាំងដែរ ប៉ុន្តែកន្លងមកលោកក៏បានពន្យល់ផងថា បើសិន សាដាម ហ៊ូសេន និងកាដាហ្វីនៅមានជីវិតម្ល៉េះអ៊ីរ៉ាក់ និងលីប៊ី ប្រហែលជាប្រសើរខ្លាំង។
ជាថ្មីម្តងទៀត ក្នុងពេលថ្លែងសុន្ទរកថាទៅកាន់អ្នកគាំទ្រនៅរដ្ឋ North Carolina សេដ្ឋីអចលនទ្រព្យនិងជាបេក្ខជនប្រធានាធិបតី ដូណាល់ ត្រាំ បានកោតសរសើរមេដឹកនាំផ្តាច់ការ សាដាម ហ៊ូសេន ជុំវិញការប្រយុទ្ធប្រឆាំងភេរវកម្មកាលលោកនៅកាន់តំណែង។ ប៉ុន្តែ ទីប្រឹក្សាជាន់ខ្ពស់ទទួលបន្ទុករៀបចំឃោសនាបោះឆ្នោតរបស់លោកស្រី ហ៊ីឡារី គ្លីនតុន លោកស្រី Jake Sullivan បានប្រតិកម្មតបសម្តីលោក ដូណាល់ ត្រាំខ្លាំងផងដែរ។
យោងតាមខ្សែអាត់វីដេអូស្តីពីសុន្ទរកថាទាំងមូលនៅ North Carolina ចុះផ្សាយនៅក្នុង You Tube របស់ លោកផ្ទាល់ បេក្ខជនប្រធានាធិបតីម្នាក់នេះបានលើកឡើងថា៖« សាដាម ជាមនុស្សអាក្រក់...ពិតជាអាក្រក់មែន តែអ្នកដឹងទេថា គាត់បានធ្វើបានល្អ។ ធ្វើបានល្អយ៉ាងម៉េច? គឺគាត់បានសម្លាប់ក្រុមភេរវជនយ៉ាងមានប្រសិទ្ធភាព។ បើឥឡូវវិញ អ៊ីរ៉ាក់ក្លាយជាសាលា Harvard សម្រាប់ក្រុមភេរវជនទៅវិញ»។
លោក ដូណាល់ ត្រាំ បានទទួលស្គាល់ផងដែរថា សាដាម ហ៊ូសេន ជាមនុស្សអាក្រក់ និងផ្តាច់ការ ប៉ុន្តែលោកក៏ទំនងជាចង់ឲ្យមេដឹកនាំម្នាក់នេះ កាន់តំណែង ដើម្បីប្រឆាំងក្រុមភេរវជនដែលកំពុងធ្វើព្យុះធ្វើភ្លៀងនៅក្នុងប្រទេសអ៊ីរ៉ាក់។ យ៉ាងណាមិញ បើទោះជា ដូណាល់ ត្រាំ លើកឡើងថា សាដាម បានកម្ចាត់ភេរវជនយ៉ាងមានប្រសិទ្ធភាពក៏ដោយ អ៊ីរ៉ាក់ស្ថិតក្នុងបញ្ជីរដ្ឋគាំទ្រភេរជន នៅពេលដែលប្រទេសនេះស្ថិតនៅក្រោមការដឹកនាំរបស់លោក សាដាម ហ៊ូសេន។
តាមពិតទៅ ដូណាល់ ត្រាំ បានសម្តែងការសោកស្តាយចំពោះការសកម្មភាពឈ្លានពានអ៊ីរ៉ាក់ដែលបង្កឡើងដោយរដ្ឋាភិបាលអាមេរិកកាលឆ្នាំ ២០០៣ ។ ប៉ុន្តែ ដូណាល់ ត្រាំធ្លាប់គាំទ្រការអន្តរាគមន៍និងឈ្លានពានអ៊ីរ៉ាក់ ផងដែរ មុនពេលដែលលោកត្រលប់មកកោតសរសើរលោក សាដាម ហ៊ូសេន នោះ និងបន្ទោសការអន្តរាគមន៍ប្រឆាំងអ៊ីរ៉ាក់នោះពេលលោកក្លាយជាបេក្ខជនប្រធានាធិបតីបក្សសាធារណរដ្ឋនេះ។
វាមិនមែនជាលើកទីមួយទេ ដែលលោក ដូណាល់ ត្រាំ គាំទ្រមេដឹកនាំផ្តាច់ការ។ កាលប៉ុន្មានខែមុន លោក បានពន្យល់ថា តំបន់មជ្ឈិមបូព៌ាប្រហែលជាប្រសើរជាងបច្ចុប្បន្នឆ្ងាយ បើសិនជាមេដឹកនាំផ្តាច់ការដូចជាលោក កាដាហ្វី និងលោក សាដាម ហ៊ូសេន នៅមានជីវិតនិងបន្តកាន់កាប់អំណាចនោះ៕
Tag:
សាដាម ហ៊ូសេន
ដូណាល់ ត្រាំ
North Carolina
© រក្សាសិទ្ធិដោយ thmeythmey.com