កីឡាជាតិ
ជាតិ
×![]()
ដោយ: ថ្មីៗ
ភ្នំពេញ៖ អង្គការ Operation ASHA នឹងរៀបចំការប្រកួតបាល់ទាត់មិត្តភាពសប្បុរសធម៌ (Charity Futsal Tournament 2016) រៃអង្គាសថវិកាជាង ២ម៉ឺនដុល្លារអាមេរិក ដើម្បីបន្តជួយ អ្នកជំងឺរបេង ៣៥០នាក់ ក្នុងខេត្តមណ្ឌលគិរី និងតាកែវ។
Charity Futsal Tournament 2016 លើកទីមួយ នឹងប្រព្រឹត្តឡើង ចាប់ពីម៉ោង ៧ព្រឹក ដល់ ១ រសៀល នៅថ្ងៃទី១០ ខែកក្កដា នៅ Central Park Sport Complex ក្នុងទីក្រុងរណបបឹងកក់។
កញ្ញា Jacqueline Chen នាយិកាអង្គការ Operation ASHA ជនជាតិសិង្ហបុរី បានប្រាប់ពីគោល បំណងកម្មវិធីក្នុងសន្និសីទសារព័ត៌មាន នៅរសៀលថ្ងៃទី៦ ខែកក្កដានេះថា ASHA សង្ឃឹមថា នឹងរៃអង្គាសថវិកាជាង ២ម៉ឺន បន្តជួយគាំទ្រព្យាបាលអ្នកជំងឺរបេងចំនួន ៣៥០នាក់ ក្នុងស្រុក ប្រតិបត្តិចំនួន ២ គឺក្រុងសែនមនោរម្យ ខេត្តមណ្ឌលគិរី និងស្រុកប្រតិបត្តិដូនកែវ ខេត្តតាកែវ ជាចាំបាច់។
កញ្ញាបន្តនិយាយថា ASHA ប្រមូលថវិកាទាំងនេះ ពីក្រុមហ៊ុន សហគ្រាសឯកជននានា ដែល មានគោលបំណងរួមក្នុងការធ្វើឲ្យប្រសើរឡើងនូវសុខមាលភាពសង្គម និងឧបត្ថម្ភដល់ពួកគេ។
កញ្ញាបានឲ្យដឹងពីការបែងចែកក្រុមប្រកួតរកជ័យលាភីថា ក្រុមប្រកួតចំនួន ១៦ ចែកជាពូលចំនួន ៤ពូល ហើយក្នុងមួយពូលមានចំនួន ៤ក្រុម នឹងចូលប្រកួតក្នុងវគ្គទីមួយ។ រួចហើយ ក្រុមប្រកួត ២ ដែលឆ្លងកាត់វគ្គជម្រុះលើកដំបូងក្នុងពូលនីមួយៗ នឹងបន្តប្រកួតវគ្គពាក់កណ្តាលផ្តាច់ព្រាត់ រហូតដល់វគ្គផ្តាច់ព្រាត់។
បើតាមនាយិកាអង្គការ Operation ASHA ក្រុមជ័យលាភីមួយចំណោម ១៦ក្រុម នឹងមានឱកាសប្រកួតលក្ខណៈមិត្តភាពជាមួយក្លឹបបាល់ទាត់ដែលមានកេរ្តិ៍ឈ្មោះល្បី ភ្នំពេញក្រោន។
ក្រៅពីការប្រកួតកីឡាមិត្តភាពនេះ ពួកគេនឹងរៀបចំការតាំងពិព័រណ៌ និងស្តង់ម្ហូបអាហាររបស់ អ្នកឧបត្ថម្ភផងដែរ។
លោក ម៉ៃ តុលា អគ្គលេខាធិការរង និងជាអ្នកនាំពាក្យសហព័ន្ធបាល់ទាត់កម្ពុជា បានគាំទ្រ កម្មវិធីប្រកួតមិត្តភាពសប្បុរសធម៌នេះ ព្រោះវាអាចជួយសុខភាពកីឡាករ និងសុខភាពអ្នកជំងឺ ក្នុងសង្គមកាន់តែប្រសើរឡើង។ លោកជឿជាក់ថា កម្មវិធីនេះ នឹងទទួលបានការចាប់អារម្មណ៍ ពីសាធារណជនច្រើន ហើយពួកគេនឹងរៀបចំឆ្នាំបន្តបន្ទាប់ទៀត ដើម្បីជួយរួមចំណែកលើក កម្ពស់សុខភាពប្រជាជន៕
Tag:
របេង
ASHA
© រក្សាសិទ្ធិដោយ thmeythmey.com
