កីឡាអន្តរជាតិ
អន្តរជាតិ
បារាំងចម្លង «Viking Clap» តាមអ៊ីស្លង់ ក្រោយឈ្នះអាល្លឺម៉ង់នៅវគ្គ១/២ផ្តាច់ព្រ័ត្រ បារាំងអបអរបែប Viking Clap តាមអ៊ីស្លង់។ រូបថត Icon Sport
×
ក្រុមកីឡាករបាល់ទាត់ជម្រើសជាតិបារាំង និងអ្នកគាំទ្ររបស់ខ្លួន បានធ្វើការអបអរដោយការទះដៃឡើងលើ ឬ «Viking Clap» ដូចក្រុមអ៊ីស្លង់ បន្ទាប់ពីពួកគេបានយកឈ្នះអាល្លឺម៉ង់ ២-០ នាការប្រកួតវគ្គពាក់កណ្តាលផ្តាច់ព្រ័ត្រនៅកីឡដ្ឋាន Stade Velodrome។
«Viking Clap» គឺជារបៀបនៃការអបអរសាទររបស់ក្រុមកីឡាបាល់ទាត់ជម្រើសជាតិអ៊ីស្លង់ ហើយត្រូវបានកត់សម្គាល់ខ្ពស់នៅក្នុងព្រឹត្តិការណ៍ Euro ឆ្នាំ២០១៦ ក្នុងប្រទេសបារាំង។ កាយវិការដ៏រំភើបបំផុតនោះ គឺបន្ទាប់ពីអ៊ីស្លង់ឈ្នះអង់គ្លេស ២-១ នៅវគ្គ១/៨ និងចាញ់បារាំង ៥-២ នៅវគ្គ១/៤ ហើយក្រុមដែនកោះមួយនេះ បន្តអបអរជាមួយក្រុមអ្នកគាំទ្រប្រមាណ៣ម៉ឺននាក់ នៅពេលវិលទៅកាន់ស្រុកកំណើតរបស់ខ្លួន។
វេលស៍ បានក្លាយជាក្រុមទីមួយដែលចម្លងការអបអរ «Viking Clap» ពីអ៊ីស្លង់ ពោលគឺបន្ទាប់ពីវេលស៍បានយកឈ្នះបែលហ្ស៊ិកនៅវគ្គ១/៤ផ្តាច់ព្រ័ត្រ។ បារាំងបានបន្តចម្លងកាយវិការនេះ បន្ទាប់ពីពួកគេបានយកឈ្នះអាល្លឺម៉ង់ ២-០ ដោយការស៊ុតបាល់បញ្ចូលទីទាំង២គ្រាប់របស់ Antoine Griezmann នៅវគ្គ១/២ផ្តាច់ព្រ័ត្រ ដើម្បីឡើងទៅដណ្តើមពាន Euro 2016 ជាមួយព័រទុយហ្គាល់។ ក្រុមអ្នកគាំទ្រអាល្លឺម៉ង់មួយចំនួនក៏បានធ្វើបែបនេះផងដែរ។
អ្នកប្រើប្រាស់បណ្តាញសង្គមជាច្រើនបានរិះគន់ក្រុមម្ចាស់បារាំង ដែលចម្លងតាមអ៊ីស្លង់ និងជាក្រុមដែលពួកគេបានទម្លាក់នៅវគ្គ១/៤ផ្តាច់ព្រ័ត្រ។ គណនី Twitter មួយដែលមានឈ្មោះថា Icelandic Football បានសរសើរចំអកថា៖ «ឱព្រះយេស៊ូ! បារាំង...ពួកអ្នកបានទម្លាក់យើង សូមរកស្ទីលខ្លួនដើម្បីអបអរនៅពេលឈ្នះទៅ»៕
ទស្សនាវីដេអូ
© រក្សាសិទ្ធិដោយ thmeythmey.com