លោក ខៀវ កាញារីទ្ធ៖ Global Witness មានជម្លោះជាបុគ្គលជាមួយសម្តេច ហ៊ុន សែន

ជាតិ

នយោបាយជាតិ

លោក ខៀវ កាញារីទ្ធ៖ Global Witness មានជម្លោះជាបុគ្គលជាមួយសម្តេច ហ៊ុន សែន

11, Jul 2016 , 6:27 pm

រូបភាព

លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន

ដោយ: ថ្មីៗ

នៅព្រឹកថ្ងៃទី១១កក្កដានេះ មន្ត្រីជាន់ខ្ពស់ដ៏ល្បីឈ្មោះនៃរដ្ឋាភិបាលកម្ពុជា និងជារដ្ឋមន្ត្រីក្រសួងព័ត៌មានបានផ្តល់បទសម្ភាសន៍ដល់សារព័ត៌មានមួយចំនួនក្នុងសំណុំរឿងឃាតកម្មលើលោក កែម ឡី និងរបាយការណ៍ Global Witness ដែលផ្សាយអំពីការក្តោបក្តាប់សេដ្ឋកិច្ចនៃគ្រួសារសម្តេចនាយករដ្ឋមន្ត្រី ហ៊ុន សែន នៅកម្ពុជា។

រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានរិះគន់អ្នកសរសេររបាយការណ៍របស់ Global Witness ថាពួកគេបានបង្វែរ«បាយបិណ្ឌ ជាបាយបាត្រ» និងមានចរិតបន្លំពលរដ្ឋខ្មែរ។ លើសពីនេះ លោក ខៀវ កាញារីទ្ធ ក៏បានអះអាងផងដែរថា Global Witness មានទំនាស់បុគ្គលជាមួយសម្តេចនាយករដ្ឋមន្ត្រី ហ៊ុន សែន។

« Global Witness មានទំនាស់ជាមួយសម្តេចនាយករដ្ឋមន្ត្រីជាបុគ្គល។ កម្មវិធីរបស់ Global Witness នៅកម្ពុជា គឺសង្គ្រាមបុគ្គលរវាង Global Witness និងនាយករដ្ឋមន្ត្រីហ៊ុន សែន»។ រដ្ឋមន្ត្រីក្រសួងព័ត៌មានបានឆ្លើយយ៉ាងនេះតបទៅអ្នកកាសែតនៃទូរទស្សន៍ជាតិកម្ពុជា ដែលសួរលោកពីមូលហេតុដែល Global Witness ចេញផ្សាយរបាយការណ៍ថ្មីៗរបស់ខ្លួនទាក់ទងនឹងជំនួញរបស់គ្រួសារនាយករដ្ឋមន្ត្រី។

តាមរយៈការពន្យល់របស់លោក ខៀវ កាញារីទ្ធ នៅក្នុងសន្និសីទសារព័ត៌មានមួយនៅការិយាល័យរបស់លោក នោះ ការដែលសមាជិកគ្រួសារនាយករដ្ឋមន្ត្រីមានភាគហ៊ុនខ្លះនៅតាមក្រុមហ៊ុននោះ វាមិនមែនជាក្តោបក្តាប់សេដ្ឋកិច្ចកម្ពុជារបស់គ្រួសារនាយករដ្ឋមន្ត្រីនោះឡើយ។

«បើយើងមើលមិនជ្រៅ យើងនឹងមើលឃើញថា ការនិយាយ [របស់Global Witness]នេះសមរម្យ គ្រប់គ្រាន់។ គឺត្រកូលនាយករដ្ឋមន្ត្រីគ្រប់គ្រងសេដ្ឋកិច្ចនៅកម្ពុជា។ តែបើគេយល់សេដ្ឋកិច្ចបច្ចុប្បន្ន គឺមិនមែនជារឿងធំទេ។ នៅក្នុងសម័យភាវូបនីយកម្មសេដ្ឋកិច្ច គេហៅ economics by the number គឺសេដ្ឋកិច្ចតាមតួលេខ បានន័យថា បើយើងមានទុនកាន់តែធំ គឺយើងវិវត្តបានលឿន»។ លោក ខៀវ កាញារីទ្ធ ពន្យល់បន្តថា៖«គាត់(Global Witness)ត្រូវបញ្ជាក់ថា តើត្រកូលនាយករដ្ឋមន្ត្រី ធ្វើជាក្រុមប្រឹក្សាភិបាលប៉ុន្មានក្រុមហ៊ុន? គាត់អត់និយាយទេ គាត់អត់ច្បាស់ទេ។ គាត់គ្រាន់តែថា អ្នកនេះមានឈ្មោះនៅនេះ គាត់រាប់មួយ។ ដាក់ហ៊ុននៅនោះ គាត់រាប់មួយ។ គ្រាន់តែយើងចូល ថាយើងក្តោបក្តាប់សេដ្ឋកិ្ចដែរ នោះជាការខុសឆ្គង និងបន្លំប្រជាជនផង»។

គួរបញ្ជាក់ផងដែរថា លោក ខៀវ កាញារីទ្ធ គឺជាមន្ត្រីជាន់ខ្ពស់ទីមួយដែលបានចេញមុខឆ្លើយតបនឹងរបាយការណ៍របស់ Global Witness បន្ទាប់ពីកូនប្រុសស្រី៣នាក់របស់លោកនាយករដ្ឋមន្ត្រីបានបញ្ចេញប្រតិកម្មរួមគ្នានៅតាមគណនីហ្វេសប៊ុករបស់ពួកគេ។

ឃាតកម្មលើលោក កែម ឡី ក៏ជាប្រធានបទក្តៅនៅក្នុងសន្និសីទកាសែតនោះដែរ។ លោក ខៀវ កាញារីទ្ធ អះអាងថា រដ្ឋាភិបាលរបស់លោក គឺជាអ្នកខាតធំបំផុតនៅក្នុងសំណុំរឿងឃាតកម្មលើលោក កែម ឡី នេះ។ វាជាការខាតបង់ដោយសារតែ បើតាមការពន្យល់របស់លោក ខៀវ កាញារីទ្ធ រដ្ឋាភិបាលកំពុងបង្ហាញថា នៅកម្ពុជាមានប្រជាធិបតេយ្យ មានការរិះគន់ដោយសេរី។ «ដូច្នេះនេះគឺជាការប៉ះពាល់ដល់គោលនយោបាយរបស់រដ្ឋាភិបាលទាំងមូល ចឹងរដ្ឋាភិបាលនឹងព្យាយាមខិតខំធ្វើយ៉ាងណាបំភ្លឺឲ្យលើបញ្ហាងងឺតនេះ»។ នេះជាការបញ្ជាក់របស់លោករដ្ឋមន្ត្រី៕