ជាតិ
នយោបាយជាតិ
×![]()
ដោយ: ថ្មីៗ
ថ្ងៃអាទិត្យ ទី១០ ខែកក្កដា ឆ្នាំ២០១៦ ម៉ោងប្រហែល ៩ព្រឹក................
ព្រះសូរ្យសែងកំពុងតែបញ្ចេញកម្តៅកាន់តែខ្លាំងណាស់ទៅហើយមកផែនពសុធាយើងនេះ ដោយមានខ្យល់ជំនោរនារដូវវស្សាបក់ផាត់ស្លឹកព្រឹក្សាដែលដុះអមរុក្ខវិថីនាកណ្តាលទីក្រុងភ្នំពេញផងដែរ។ រីឯមនុស្សម្នាកំពុងរូតរះធ្វើដំណើរទៅតាមគោលដៅរបស់ពួកគេរៀងៗខ្លួន ទាំងអ្នកខ្លះមានទឹកមុខញញឹមប្រិមប្រិយ ហើយអ្នកខ្លះមានទឹកមុខនិងកាយវិការប្រញាប់ប្រញាល់។ ខ្លះទៀតបន្ថយល្បឿនយានជំនិះរបស់ខ្លួនដើម្បីឈាងចូលមកចាក់សាំងបន្ថែមថាមពលដើម្បីបន្តដំណើរទៅមុខទៀត........
............រំពេចនោះស្រាប់តែ....ផាំង! ផាំង!...សម្លេងលាន់ឮដូចរន្ទះបាញ់ខែចេត្រចេញពីក្នុងកូនផ្សារទំនើបតូចមួយនៅក្នុងបរិវេណស្ថានីយប្រេងឥន្ធនៈនោះ ប៉ុន្តែវាពុំបានធ្វើឲ្យភ្ងាក់ផ្អើលដល់ការធ្វើដំណើររបស់ជនានុជននោះទេ។ ភ្លាមៗនោះដែរក៏ស្រាប់មានសម្លេងស្រែកឆោឡោបន្លឺឡើងអំពីរឿងរាវបាញ់ប្រហារមនុស្សឃាតដ៏ឃោរឃៅនៅក្នុងកូនផ្សារទំនើបនោះ។ កម្រាលឥដ្ឋពណ៌សប្រែក្លាយជាក្រហមឆ្អិនឆ្អៅ ក្រាលទៅដោយដំណក់ឈាមរបស់បុរសរងគ្រោះដែលមានវ័យកណ្តាលម្នាក់។ ខ្លួនកាយបុរសនោះបានដេកដួលស្តូកស្តឹងនៅលើដីមិនកម្រើកទាល់តែសោះ។ លោហិតលោកបន្តហូរចេញពីប្រាណឥតល្ហែល្ហើយស្រោចពេញធរណី។ គួរឲ្យសង្វេគណាស់! ដួងព្រលឹងវិញ្ញាណរបស់លោកក៏បានលាចាកចេញពីរូបកាយមួយនេះផងដែរ ទាំងមិនបានផ្តាំផ្ងើអ្វីមួយមាត់ចុងក្រោយដល់មនុស្សជាទីស្រឡាញ់ទាល់តែសោះ ហើយក៏ប្រហែលជារូបគាត់មិនទាំងបានដឹងខ្លួនថា ខ្លួនគាត់បានក្ស័យសង្ខារបាត់ទៅហើយផង។ មិនយូរប៉ុន្មានសម្លេងចរាចរណ៍អ៊ូអរនៅតាមដងផ្លូវ ត្រូវបានរលប់បាត់ទៅដោយសម្លេងស្រែកទ្រហោយំស្តាយស្រណោះចំពោះបុរសម្នាក់នេះ។
ព័ត៌មានមរណានេះបានផ្សព្វផ្សាយយ៉ាងឆាប់រហ័សពាសពេញផ្ទៃប្រទេស។ មហាជនមានអារម្មណ៍ឆាបឆួល សោចសង្រេង ស្តាយស្រណោះ និងឈឺចាប់ជាពន់ពេកចំពោះការបាត់នូវបុរសម្នាក់នេះ ពីព្រោះបុរសម្នាក់នេះគឺជាបុគ្គលក្លាហានមួយរូបដែលតែងតែចូលចិត្តសិក្សាស្វែងយល់ពីជីវភាពរស់នៅរបស់ប្រជាជន និងចែករំលែកនូវការយល់ឃើញ បទពិសោធន៍ជាស្តែង ការវិភាគវែកញែកអំពីបញ្ហាដែលកើតមានឡើងនៅក្នុងសង្គមជាមួយប្រជាពលរដ្ឋ។ លោកគឺជាភ្នែក ជាត្រចៀក ជាច្រមុះ និងជាមាត់របស់ប្រជាជន។ ប៉ុន្តែ! ពុទ្ធោអើយ! ពិតជាពិបាកដកដង្ហើមណាស់! នៅលើលោកាដ៏ធំល្វឹងល្វើយនេះប្រែជាខ្សោះអស់ខ្យល់បរិសុទ្ធសម្រាប់ដកដង្ហើមទៅ វិញ។ ភ្នែកធ្លាប់ស្រឡះប្រែជាស្រវាំងអស់ហើយព្រោះតែជលនេត្រហូរស្រក់មិនស្រាកស្រាន្តឡើយ។ ពេលនេះ វាហាក់ដូចជាកែវភ្នែកទាំងគូរបស់ប្រជាពលរដ្ឋត្រូវបានខ្វេះចោលទៅក្នុងមហាសាគរដ៏ធំធេងគ្មានកោះគ្មានត្រើយ រីឯត្រចៀកទាំងទ្វេសម្រាប់ស្តាប់នូវទុក្ខកង្វល់របស់យើងត្រូវបានកាត់បំផ្លាញចោល ហើយច្រមុះសម្រាប់ជួយស្រង់យកនូវក្លិននៃបញ្ហាក៏ត្រូវបានខ្ទប់ជាប់មិនអាចដកខ្យល់បាន ចំណែកបបូរមាត់ដែលធ្លាប់តែបូរបាច់រាយរាប់រៀបរាប់ពីបញ្ហាសង្គមនោះក៏ត្រូវបានបិទជិតគ្មានចលនាសោះ។ ពិតជាសោកនាដកម្មលោកីយ៍មែន។
ទោះបីជាប្រជាជាតិទាំងមូលមានអារម្មណ៍ថាខ្លួនកាយបែរក្លាយជាពិការនិងបាត់បង់នូវវត្ថុដែលមានតម្លៃមិនអាចកាត់ថ្លៃបានក្តី ក៏ប៉ុន្តែវីរភាព ស្មារតីស្នេហាជាតិ ភាពក្លាហាន និងការពលីរបស់លោកបានប្រែក្លាយជាកម្លាំងចលករដែលកំពុងរីកដុះដាលនៅក្នុងសសៃឈាម បេះដូងនិងផ្នត់គំនិតរបស់ប្រជាជនកម្ពុជាគ្រប់រូប និងគ្រប់ស្រទាប់វណ្ណៈទាំងអស់។ ជាងនេះទៅទៀតវារឹងរឹតតែបណ្តុះយ៉ាងមុតមាំនូវការស្រឡាញ់ភាពយុត្តិធម៌ ការចែករំលែក ការពិភាក្សាវែកញែក និងការលះបង់ដើម្បីសេចក្តីសុខក្សេមក្សាន្ត និងសុខសន្តិភាពទាំងផ្លូវកាយនិងផ្លូវចិត្តជូនប្រទេសកម្ពុជា។ ពិតណាស់ វេលានេះកម្តៅព្រះសូរិយាកាន់តែបញ្ចេញរស្មីខ្លាំងឡើងហើយ ប៉ុន្តែនៅពុំឈ្នះឡើយលើកម្តៅចិត្តពុះកញ្ជ្រោលដែលប្រជាពលរដ្ឋមាន និងឆន្ទៈដ៏មោះមុតក្នុងការបន្តនូវដំណើរដែលមិនទាន់ចប់របស់លោក ក៏ដូចជារបស់ខ្លួនផ្ទាល់ដើម្បីនាំសង្គមមួយនេះ នាំប្រទេសជាទីស្រឡាញ់មួយនេះឲ្យឆ្ពោះទៅដល់គោលដៅនៃត្រើយសេរីភាព ប្រកបដោយយុត្តិធម៌សង្គម និងសុខសន្តិភាពជានិរន្តរ៍ ដូចពាក្យលោករមែងតែងពោលថា៖ «ជូតទឹកភ្នែករបស់អ្នករួចបន្តដំណើរទៅមុខទៀត»។
ជាចុងក្រោយសូមវិញ្ញាណក្ខន្ធរបស់លោកពូ កែម ឡី ទៅកាន់សុគតិភពកុំបីឃ្លៀតឃ្លាតឡើយ!
ដោយ៖ សួង សុខសោភា
ប្រជាពលរដ្ឋ
០១២ ៧១២ ៦០៩
© រក្សាសិទ្ធិដោយ thmeythmey.com
