ភ្នំពេញ៖ សម័យប្រឡងមធ្យមសិក្សាទុតិយភូមិ(បាក់ឌុប) នឹងប្រព្រឹត្តិទៅថ្ងៃទី២២-២៣ ខែសីហា។ ក្នុងអំឡុងពេលមួយខែ មុនសម័យប្រឡងមកដល់ បេក្ខជនជាច្រើននិយាយតែអំពីការប្រឹងប្រែង និងសិក្សាត្រៀមប្រឡងយ៉ាងប្រុងប្រយ័ត្ន ខណៈរដ្ឋមន្ត្រីក្រសួងអប់រំនៅតែផ្ញើសារអំពីការរឹតបន្តឹងវិន័យក្នុងសម័យប្រឡង។
កំពុងអង្គុយលើបង់ក្រោមដើមឈើ ក្នុងបរិវេណវិទ្យាល័យ សម្ដេច ហ៊ុន សែន ភ្នំពេញថ្មី យុវសិស្សមួយក្រុម មានគ្នាប្រមាណ៧នាក់ មានប្រុសមានស្រី កំពុងតែរៀនធ្វើលំហាត់ ដោយមានការពន្យល់គ្នាទៅវិញទៅមក។ យុវសិស្សទាំងនោះ ខំប្រឹងធ្វើលំហាត់យ៉ាងយកចិត្តទុកដាក់។ យុវសិស្សទាំង៧រូបនេះ ស្ទើរតែគ្រប់គ្នាមានក្ដីសង្ឃឹមខ្ពស់ថាខ្លួននឹងទទួលបានលទ្ធផលល្អ ក្នុងសម័យប្រឡងដែលក្រសួងអប់រំបន្តរឹតបន្តឹងវិធានការក្នុងសម័យប្រឡងនេះ។ ក្នុងចំណោមយុវសិស្សមួយក្រុមនេះ បានបង្ហាញអាកប្បកិរិយាអៀនប្រៀននៅពេលដែលអ្នកសារព័ត៌មានសម្ភាសន៍ពួកគេ ហើយពួកគេបានអោយតំណាងក្រុមម្នាក់ ដើម្បីផ្ដល់បទសម្ភាសន៍ដល់សារព័ត៌មានថ្មីៗ ដោយពួកគេជួយឆ្លើយបន្ថែមខ្លះៗ។ យុវតី ស៊ូ សុជាតា ជាសិស្សថ្នាក់ទី១២ និងជាសិស្សពូកែក្នុងថ្នាក់មួយរូបផងដែរ បានត្រៀមខ្លួនរួចរាល់ហើយ និងខំប្រឹងបន្ថែមទៀតសម្រាប់ការប្រឡងនេះ។ យុវតីសម្បុរសជាកូនកាត់ចិនរូបនេះ បានរៀបរាប់ថា៖ «ពេញមួយសប្ដាហ៍ ខ្ញុំរៀនរហូត ទាំងម៉ោងរដ្ឋ ទាំងម៉ោងរៀនគួរបន្ថែម និងការរៀនខ្លួនឯងទៀតផង»។ កញ្ញា ស៊ូ សុជាតា ប្រាប់ថា៖«មានពេលខ្លះខ្ញុំខំរៀនច្រើនពេក គឺធ្វើអោយឪពុកម្ដាយព្រួយបារម្ភ ព្រោះខ្ញុំខំរៀនពីព្រឹកដល់យប់ ដោយមិនសូវបានសម្រាក»។
យុវតីវ័យ១៧ឆ្នាំរូបនេះ បានបន្ថែម នៅពេលដែលការប្រឡងជិតមកដល់មានការរៀនដោយខ្លួនឯង និងជាក្រុមមានការកើនឡើង មិនថាតែអ្នករៀនពូកែទេ សូម្បីតែអ្នកដើរលេងដែលមិនសូវចូលចិត្តរៀន បានងាកមករៀនបន្ថែមជាក្រុមវិញ ហើយមិនបានចំណាយពេលវេលាទៅដើរលេងទៀតនោះទេ។ សុជាតាមិនដែលមានចិត្តចង្អៀតក្នុងការពន្យល់មេរៀន ឬលំហាត់ដល់អ្នករៀនខ្សោយនោះទេ នៅពេលដែលមិនយល់សុជាតាអាចពន្យល់ប្រាប់បាន។ នៅពេលដែលក្រសួងអប់រំបានរឹតបន្តឹងវិន័យក្នុងសម័យប្រឡង សុជាតា ហាក់មានអារម្មណ៍ភ័យ ចំពោះការប្រឡងនេះ ទោះបីរូបគេដឹងពីសមត្ថភាពដែលខ្លួនអាចធ្វើបានក៏ដោយ។ យុវសិស្ស សុជាតា មានក្ដីសង្ឃឹមថាខ្លួននឹងទទួលបានលទ្ធផលល្អ (B,C) ហើយមានក្ដីស្រម៉ៃចង់បន្តការសិក្សានៅប្រទេសជប៉ុនផងដែរ។
ស្រដៀងនឹងយុវតីខាងលើយុវជន ហេង ពិសិដ្ឋ ជាសិស្សថ្នាក់ទី១២ ក៏ជាសិស្សពូកែមួយរូបនៅក្នុងថ្នាក់ផងដែរ។ សព្វថ្ងៃពិសិដ្ឋរស់នៅជាមួយពូមីងនៅរាជធានីភ្នំពេញ ស្របពេលដែលឪពុកម្ដាយរស់នៅឯខេត្តបាត់ដំបង។ ពិសិដ្ឋមានបងប្អូន ២នាក់ ហើយជាកូនច្បងក្នុងគ្រួសារ។ យុវជន ហេង ពិសិដ្ឋ បានត្រៀមខ្លួនរួចហើយ តាំងពីចាប់ផ្ដើមសិក្សាថ្នាក់ទី១២មកម្ល៉េះ ទោះបីពិសិដ្ឋមិនសូវចេះគណិតវិទ្យា តែមុខវិជ្ជាដទៃពិសិដ្ឋអាចធ្វើបានយ៉ាងល្អ។ នៅពេលទំនេរពិសិដ្ឋ បានយកពេលវេលានោះទៅរៀនធ្វើលំហាត់ដោយខ្លួនឯង ហើយជួយធ្វើការងារផ្ទះ និងយកពេលទៅបង្រៀនមិត្តរួមថ្នាក់ ក្នុងមួយសប្ដាហ៍៣ថ្ងៃ។ យុវជនសម្បុរសណ្ដែកបាយរូបនេះ បានរៀបរាប់យ៉ាងដូច្នេះថា៖ «ខ្ញុំបានរៀបចំការរៀនច្បាស់លាស់។ ខ្ញុំបែងចែកពេលវេលារៀនផង និងលំហែខួរក្បាលផង ដោយក្នុងមួយថ្ងៃខ្ញុំត្រូវទៅរៀនរដ្ឋផង រៀនបន្ថែមជាមួយគ្រូផង និងរៀនដោយខ្លួនឯងផង»។ ហេង ពិសិដ្ឋ បានបន្ថែមថា ទោះបីខំរៀនទាំងថ្ងៃទាំងយប់ក៏ដោយ ត្រូវតែគិតពីសុខភាព ព្រោះការរៀនអាចធ្វើសុខភាពចុះខ្សោយ ត្រូវតែទទួលអាហារគ្រប់គ្រាន់ និងទៀងទាត់។
យុវជនវ័យ១៨ឆ្នាំរូបនេះ ហាក់មានអារម្មណ៍សប្បាយចិត្តនៅពេលដែលក្រសួងអប់រំ បានចាប់ផ្ដើមកែទម្រង់រឹតបន្តឹងវិស័យអប់រំ ដោយពិសិដ្ឋយល់ឃើញថា៖ «ជាការល្អដែលក្រសួងរឹតបន្តឹង ព្រោះដើម្បីឲ្យបេក្ខជនទាំងអស់ ដឹងពីសមត្ថភាពផ្ទាល់ខ្លួន និងមិនចាំបាច់លួចចម្លងសំណៅឯកសារផ្សេងៗ»។ ប៉ុន្តែពិសិដ្ឋមានការព្រួយបារម្ភ ចំពោះការសាងកំហុសខុសឆ្គងក្នុងការប្រឡង ដោយអចេតនា។ យុវសិស្ស ហេង ពិសិដ្ឋ មានក្ដីសង្ឃឹមថាសមត្ថភាពដែលខ្លួនមានអាចទទួលបានលទ្ធផល(B,C) ព្រោះពិសិដ្ឋចង់បន្តការសិក្សានៅមហាវិទ្យាល័យនៅក្រៅប្រទេស។ នៅពេលប្រឡងជាប់ យុវជន ហេង ពិសិដ្ឋ ចង់បន្ដការសិក្សាដោយជ្រើសរើសផ្នែកបរិស្ថានសម្រាប់សិក្សាបន្ត ទន្ទឹមនឹងមុខវិជ្ជាជីវវិទ្យា និងគីមីវិទ្យា ជាមុខវិជ្ជាដែលពិសិដ្ឋស្រលាញ់ចូលចិត្តហើយពូកែផងនោះ។
សម្រាប់យុវនារី សាំង លីណែត ជាសិស្សវិទ្យាល័យ សម្ដេច ហ៊ុន សែន ភ្នំពេញថ្មី ដែលមានគំនិតនិងការសិក្សាប្រហាក់ប្រហែលទៅនឹងយុវជនទាំងពីរខាងលើផងដែរ។ យុវតី លីណែត បានបញ្ជាក់ថា ការសិក្សារបស់មនុស្សម្នាក់ៗមានភាពខុសគ្នា ហើយលីណែត មានត្រៀមខ្លួនរួចរាល់ហើយ សម្រាប់ការប្រឡងរយៈពេលខ្លីខាងមុខនេះ។ កញ្ញា សាំង លីណែត បានរៀបរាប់ថា៖ «សម្រាប់ការរៀនខ្ញុំមិនបានផ្ដោតសំខាន់ចំពោះរឿងចំណាត់ថ្នាក់ ឬពិន្ទុក្នុងការប្រកួតប្រជែងជាមួយមិត្តរួមថ្នាក់នោះទេ ដោយខ្ញុំធ្វើការវាស់ស្ទង់សមត្ថភាពខ្លួនឯងនៅពេលប្រឡងប្រចាំខែ ឬប្រចាំឆមាស ដោយមិនបានលួចចម្លងសំណៅឯកសារ ឬមិត្តរួមថ្នាក់នោះទេ»។ យុវនារីវ័យ១៨ឆ្នាំរូបនេះ បានលើកឡើងថា នៅពេលដែលការប្រឡងឈានមកដល់ពាក្យខាងមុខនេះ លីណែត បានចំណាយពេលវេលាពេញមួយសប្ដាហ៍ក្នុងការសិក្សា សម្រាប់ថ្ងៃអាទិត្យលីណែតបានទៅរៀនបំប៉នត្រៀមប្រឡងជាមួយគ្រូនៅសាលាដែលបង្រៀនសិស្សដោយឥតគិតថ្លៃ។
ម្យ៉ាងទៀតក្រៅពីបានធ្វើការរៀនជាមួយគ្រូ លីណែតបានបង្កើតក្រុមសិក្សាបន្ថែម ដើម្បីពន្យល់មេរៀន ឬលំហាត់គ្នាទៅវិញទៅមក នូវចំណុចណាមួយដែលមិនសូវយល់ច្បាស់។ បើទោះបីលីណែត ជាសិស្សពូកែផ្នែកសង្គមពិតមែន ប៉ុន្តែសម្រាប់ការប្រឡងគឺផ្ដោតទៅផ្នែកវិទ្យាសាស្ត្រ លីណែតបានខិតខំប្រឹងប្រែងផ្នែកវិទ្យាសាស្ត្រអោយកាន់តែល្អ ហើយខ្លាំង ព្រោះដើម្បីប្រឡងឲ្យបានលទ្ធផលល្អ ឈានបន្តថ្នាក់មហាវិទ្យាល័យ។ យុវតី លីណែត បានគិតថាសម្រាប់ការប្រឡងនាពេលខាងមុខនេះ លីណែតសង្ឃឹមថាសមត្ថភាពខ្លួននឹងទទួលបានលទ្ធផល (B,C) ដោយមិនមានក្ដីសង្ឃឹមខ្ពស់ចង់បានលទ្ធផល(A)នោះទេ។ កញ្ញាសាំង លីណែត មិនព្រួយបារម្ភ និងភ័យ ចំពោះការប្រឡងទេ ព្រោះកញ្ញា លីណែត ជឿជាក់លើសមត្ថភាពខ្លួនឯង។ ក្រោយពីបញ្ចប់ថ្នាក់ទី១២ កញ្ញា លីណែត មានបំណងចង់បន្តការសិក្សាផ្នែកច្បាប់ នៅមហាវិទ្យាល័យ ស្របពេលដែលលីណែតពូកែផ្នែកសង្គម។
សូមបញ្ជាក់ផងដែរថា សម័យប្រឡងមធ្យមសិក្សាទុតិយភូមិ(បាក់ឌុប) សម្រាប់ឆ្នាំសិក្សា២០១៥-២០១៦ នឹងចាប់ផ្តើមនៅថ្ងៃទី ២២-២៣ ខែសីហា ឆ្នាំ២០១៦ ។ ដោយមានបេក្ខជនប្រឡងប្រមាណជាង៨ម៉ឺននាក់ ទាំងថ្នាក់វិទ្យាសាស្ត្រពិត និងវិទ្យាសាស្ត្រសង្គម ចែកចេញជា ១៥៧ មណ្ឌល និងចំនួន ៣,៧៨១ បន្ទប់ប្រឡង នៅទូទាំងរាជធានី-ខេត្ត៕