មូសុងនិរតី នៅតែបង្កើនឥទ្ធិពលនៅកម្ពុជា

ជាតិ

មូសុងនិរតី នៅតែបង្កើនឥទ្ធិពលនៅកម្ពុជា

25, Jul 2016 , 8:39 pm

រូបភាព

ដោយ: ញឹក ស្រីល័ក្ខ (Nhek Sreyleak)

តាមការព្យាករណ៍អាកាសធាតុរបស់ក្រសួងធនធានទឹក និងឧតុនិយម បានបង្ហាញអោយដឹងថា ខ្យល់មូសុងនិរតីមធ្យម និងជ្រលងសម្ពាធទាប កំពុងបន្តមានឥទ្ធិពលមកលើប្រទេសកម្ពុជាឡើងវិញ ចាប់ពីថ្ងៃទី២៥ ដល់៣១ កក្កដានេះ។ ទន្ទឹមនឺងនេះ ស្ថានភាព ទឹកភ្លៀង អាចបណ្ដាលឲ្យមានភ្លៀងធ្លាក់ពីតិចទៅបង្គួរ ស្ទើរគ្រប់តំបន់ក្នុងប្រទេសកម្ពុជា។

អាកាសធាតុប្រទេស កម្ពុជា ចាប់ពីថ្ងៃទី២៥ ដល់៣១ កក្កដាខាងមុខនេះ កំពុងទទួលឥទ្ធិពលពីខ្យល់មូសុងនិរតីមធ្យម និងជ្រលងសម្ពាធទាបឡើងវិញ ដែលបង្កឲ្យមានការប្រែប្រួលអាកាសធាតុនៅតាមតំបន់មួយចំនួន។ ចំពោះតំបន់ខ្ពង់រាប និងតំបន់វាលទំនាប ស្ថានភាពទឹកភ្លៀង កាន់តែបង្កើនការធ្លាក់រាយប៉ាយពីមធ្យម ទៅច្រើនចាប់ពីថ្ងៃទី២៥ ដល់៣១ ខែកក្កដា ឆ្នាំ២០១៦។

បន្ថែមលើសនេះ នៅក្នុងតំបន់មាត់សមុទ្រ ស្ថានភាពទឹកភ្លៀង អាចនឹងមានភ្លៀងធ្លាក់ពីតិចទៅបង្គួរ ចាប់ពីថ្ងៃទី២៥ ដល់៣១ ខែកក្កដា។ ទាក់ទងគ្នានេះ ក្រសួងធនធានទឹក បានអំពាវនាវដល់ប្រជាពលរដ្ឋឲ្យមានប្រុងប្រយ័ត្នខ្ពស់ ចំពោះបាតុភូតផ្គរ រន្ទះ និងខ្យល់កន្ត្រាក់ អាចនឹងកើតមានច្រើន ជាពិសេសក្នុងតំបន់វាលទំនាប នៅអំឡុងពេលភ្លៀង។ ដើម្បីជៀសវាងនូវគ្រោះថ្នាក់ផ្សេងៗ ដែលកើតដោយយថាហេតុ ក្នុងពេលមេឃរកកលភ្លៀង៕