ជាតិ
ACU ព្រមទទួលការបំភ្លឺរបស់លោក រុន រ័ត្នវាសនា រឿងភាពមិនប្រក្រតីក្នុងអង្គភាព
× ក្រោយពីកើតមានការប្តឹងពាក់ព័ន្ធនឹងភាពមិនប្រក្រតីមួយចំនួន ក្នុងនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃអគ្គស្នងការនគរបាលជាតិ លោក រុន រ័ត្នវាសនា ដែលជាប្រធាន បានចេញសេចក្តីបំភ្លឺទៅអង្គភាពប្រឆាំងអំពើពុករលួយ (ACU)។ ក្រោយពិនិត្យលើការបកស្រាយ ACU សម្រេចទទួលការស្រាយបំភ្លឺរបស់ប្រធាននាយកដ្ឋាននគរបាលទេសចរណ៍ និងស្នើឲ្យស្ថាប័នមួយនេះបិទផ្សាយលិខិតបំភ្លឺ ដើម្បីបញ្ចប់នីតិវិធី។
«...ខ្ញុំសូមអរគុណចំពោះកិច្ចសហការក្នុងការបំភ្លឺ និងស្នើឲ្យឯកឧត្តមបិទផ្សាយលិខិតបំភ្លឺរបស់ឯកឧត្តមជាសាធារណៈនៅក្នុងនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃអគ្គស្នងការនគរបាលជាតិ ក្រសួងមហាផ្ទៃ ដើម្បីបញ្ចប់នីតិវិធីបឋមនៃការទទួលពាក្យបណ្តឹងរបស់ អ.ប.ព»។ នេះជាខ្លឹមសារក្នុងលិខិតរបស់លោក ឪម យ៉ិនទៀង។
ក្នុងលិខិតដែលផ្ញើទៅលោក រុន រ័ត្នវាសនា ដែលចុះថ្ងៃទី១២ កក្កដា អំពីការសុំការបំភ្លឺលើលិខិត ACU ចុះថ្ងៃទី២៥ ឧសភា ពាក់ព័ន្ធភាពមិនប្រក្រតីមួយចំនួន ក្នុងការអនុវត្តតួនាទីភារកិច្ចរបស់លោក រុន រ័ត្នវាសនា។ ភាពមិនប្រក្រតីទាំងនោះមានចំនួន ៦ ចំណុច រួមមាន ការចេញលិខិតស្នាមមួយចំនួន មិនគោរពតាមការប្រកាសរបស់ក្រសួង, ករណីប្រធានក្រុមគោលដៅផាកពិន័យ និងគោលដៅជំនាញ ជាបក្ខពួកខ្លួន, ការយករថយន្តម៉ាក MAZDA ដែលពន្ធនាំចូលជាបន្ទុករបស់រដ្ឋទៅបំពាក់ស្លាកលេខនគរបាល និងប្រកាសលក់ក្នុងតម្លៃជាង ៣ម៉ឺនដុល្លារ, ករណីធ្វើឲ្យបាត់ថវិកាអង្គភាព និងករណីមិនបើកប្រាក់បេសកកម្មអង្គរសង្គ្រាន្តឆ្នាំ២០១៥ ដល់មន្ត្រីជាង ១០០នាក់ជាដើម។
ក្នុងលិខិតបំភ្លឺ ដែលសរសេរភ្ជាប់ពីក្រោមបញ្ហាដែលបានលើកឡើង និងដែលបានចេញផ្សាយក្នុងទំព័រហ្វេសប៊ុករបស់នាយកដ្ឋាននគរបាលចរាចរណ៍នៅថ្ងៃនេះ លោក រុន រ័ត្នវាសសនា បានច្រានចោលរាល់ចំណុចដែលបានចោទលោកទាំងប៉ុន្មាន។ ពាក់ព័ន្ធនឹងការចេញលិខិតស្នាម លោកថាមានការធ្វើកំណត់បង្ហាញត្រឹមត្រូវ និងទៅតាមឋានានុក្រម តាមជំនាញការិយាល័យសុទ្ធសាធ។ ប្រធានគោលដៅ និងការិយាល័យជំនាញ គឺមានការសម្រេចពីរដ្ឋមន្ត្រីក្រសួងមហាផ្ទៃ ដោយពុំមានបក្ខពួករបស់លោក រុន រ័ត្នវាសនាឡើយ។ សម្រាប់រថយន្តម៉ាក MAZDA អង្គភាពដែលចង់ប្រើប្រាស់រថយន្តនេះ ត្រូវយកថវិកាទៅទិញ និងពុំមានសេវារដ្ឋបាលអ្វីផ្សេងទៀតឡើយ ហើយនាយកដ្ឋានរបស់លោក ក៏ពុំមានរថយន្តម៉ាក ស្តារិចបិទស្គុតឡូហ្គោ POLIC នោះដែរ មានតែម៉ាក MAZDA និង HYUNDAI សម្រាប់ល្បាត និងដឹកជញ្ជូនមន្ត្រីក្នុងការបំពេញបេសកកម្ម។
ចំណែកថវិកាជំនាញ៣លានរៀលក្នុងមួយ ដែលបានពីអគ្គស្នងការនគរបាលជាតិ គឺបានប្រើប្រាស់សម្រាប់បម្រើកិច្ចការងាររបស់នាយកដ្ឋាន និងសម្រាប់មន្ត្រីចុះបេសកកម្ម តាមខេត្តក្រុង។ ប្រាក់រង្វាន់១០% ពីការពិន័យបទល្មើសចរាចរណ៍ផ្លូវគោក សម្រាប់ពង្រឹងយន្តការរបស់អង្គភាព និងឧបត្ថម្ភមន្ត្រីជាដើម។ ដោយឡែក រឿងប្រាក់បេសកកម្មអង្គរសង្គ្រាន្តឆ្នាំ២០១៥នោះ លោក រុន រ័ត្នវាសនា ឆ្លើយថា បានបើកអស់ហើយ ហើយភាពយឺតយ៉ាវ ដោយសារកង្វះឯកសាររបស់មន្ត្រីបេសកកម្មតែប៉ុណ្ណោះ៕
© រក្សាសិទ្ធិដោយ thmeythmey.com