ជាតិ
ឯកអគ្គរដ្ឋទូតបារាំង៖ អ្នកស្រី ពុង ឈីវកេក ជាស្ត្រីដ៏មានឥទ្ធិពល
× កាលពីថ្ងៃល្ងាចថ្ងៃទី ២៤ ខែកក្កដា លោកហ្សង់¬ក្លូដ ពាំបឺហ្វ ឯកអគ្គរដ្ឋទូតបារាំងប្រចាំកម្ពុជា បានបំពាក់គ្រឿងឥស្សរិយយស ឡាឡេស្យុងដោនើរ (La Légion d’Honneur) ថ្នាក់អស្សឫទ្ធិ ជូនអ្នកស្រី ពុង ឈីវកេក ប្រធានអង្គការសិទ្ធិមនុស្សលីកាដូ។ នៅក្នុងពីធីនេះ លោក ឯកអគ្គរដ្ឋទូតបារាំង បានសរសើរអ្នកស្រី ពុង ឈីវកេក ថា ជាស្ត្រីដ៏មានឥទ្ធិពលនៅកម្ពុជា។
អ្នកស្រី ពុង ឈីវកេក ប្រធានអង្គការលីកាដូ ជាអ្នកការពារសិទ្ធិមនុស្ស និងស្ត្រីដ៏ក្លៀវក្លានៅកម្ពុជា។ នេះជាការសរសើររបស់លោក លោកហ្សង់¬ក្លូដ ពាំបឺហ្វ (Jean-Claude Poimboeuf) ឯកអគ្គរដ្ឋទូតបារាំងប្រចាំកម្ពុជា។ លោកឯកអគ្គរដ្ឋទូតបន្តលើកតម្កើងទៀតថា អ្នកស្រី ពុង ឈីវកេក គឺជាមនុស្សដ៏មានឥទ្ធិពល និងទទួលបានការគោរពកោតសរសើរនៅក្នុងចំណោមអង្គការសង្គមស៊ីវិលនៅកម្ពុជា។ ការសរសើររបស់មន្ត្រីទូតបែបនេះ ធ្វើឡើងនៅក្នុងពិធីបំពាក់គ្រឿងឥស្សរិយយស ឡាឡេស្យុងដោនើរ (La Légion d’Honneur) ថ្នាក់អស្សឫទ្ធិ ដល់អ្នកស្រី ពុង ឈីវកេក កាលពីល្ងាចថ្ងៃទី ២៨ ខែកក្កដា នៅស្ថានទូតបារាំងប្រចាំនៅកម្ពុជា។
ការបំពាក់គ្រឿងឥស្សរិយយសដល់អ្នកស្រី អ្នកស្រី ពុង ឈីវកេក នេះ ដើម្បីជាសក្ខីភាពនៃការកោតសរសើររបស់ប្រទេសបារាំងចំពោះតួនាទីរបស់អ្នកស្រី ក្នុងដំណើរការជួយផ្សះផ្សារជាតិ និងការលើកស្ទួយសិទ្ធិមនុស្សនៅកម្ពុជា។ គ្រឿងឥស្សរិយយសឡាឡេស្យុងដោនើរ គឺជាគ្រឿងឥស្សរិយយសដ៏ឧត្តុង្គឧត្តមបំផុតរបស់ប្រទេសបារាំង ដែលត្រូវបានបង្កើតឡើងដោយព្រះចៅណាប៉ូឡេអុងបូណាប៉ាតក្នុងនៅឆ្នាំ១៨០២ ។
នៅក្នុងពិធីដដែលនោះ លោក Jean-Claude Poimboeuf បានលើកឡើងពីគុណសម្បត្តិរបស់អ្នកស្រី ឈីវកេក ដែលអ្នកស្រីបានបញ្ចុះបញ្ចូលសម្តេច ព្រះនរោត្តម សីហនុ និងសម្តេច ហ៊ុន សែន ឲ្យជួបពិភាក្សាគ្នា។ លោកថា ជំនួបនៅឆ្នាំ ១៩៨៧ នោះ គឺជាចំណុចចាប់ផ្តើមនៃការចរចាសន្តិភាព រហូតឈានទៅសម្រេចចេញជាលទ្ធផលនៃកិច្ចព្រមព្រៀងសន្តិភាពទីក្រុងប៉ារីស ២៣ ខែតុលា ឆ្នាំ ១៩៩១ ។ ក្រៅពីបេសកកម្មដ៏សំខាន់នេះ អ្នកស្រី ពុង ឈីវកេក ក៏បង្កើតអង្គការសិទិ្ធមន្សគឺអង្គការលីកាដូ ដោយបានជួយអង្កេតការបោះឆ្នោត ការពារសិទ្ធិមនុស្ស និងលើកកម្ពស់លទ្ធិប្រជាធិបតេយ្យនៅកម្ពុជា អស់រយៈពេលជាង ២០ ឆ្នាំ មកនេះ។ នេះជាការបន្ថែមរបស់លោក ឯកអគ្គរដ្ឋទូតបារាំងខាងលើ។
អ្នកស្រី ពុង ឈីវកេក បានថ្លែងក្រោយពីទទួលគ្រឿងឥស្សរិយយសនោះថា គ្រឿងឥស្សរិយយសនេះ អ្នកស្រីមិនបានស្នើសុំនោះឡើយ តែជាការសម្រេចជ្រើសរើសរបស់រដ្ឋាភិបាលបារាំង ដោយផ្តល់គ្រឿងឥស្សរិយយសនេះ ដល់អ្នកស្រី។ អ្នកការពារសិទ្ធិមនុស្សដ៏ចាស់វស្សានៅកម្ពុជារូបនេះ ពេញចិត្តខ្លាំងណាស់នឹងគ្រឿងឥស្សរិយយសនេះ ពីព្រោះតែបារាំងយល់ថាអ្នកស្រីបានចំណាយពេលវេលា និងកម្លាំងកាយចិត្តដ៏ច្រើន ដើម្បីបុព្វហេតុការងារការពារសិទ្ធិមនុស្ស និងសន្តិភាពនៅកម្ពុជា។
នៅក្នុងពិធីប្រគល់គ្រឿងឥស្សរិយយសដល់អ្នកស្រី ពុង ឈីវកេក កាលពីល្ងាចថ្ងៃទី ២៨ខែកក្កដា មានការចូលរួមពីសែរាជវង្សជាច្រើនអង្គ មន្ត្រីស្ថានទូតនានា មន្ត្រីអង្គការសង្គមស៊ីវិល និងលោកឧកញ៉ា ពុង ខៀវសែ ប្រធានធានាគារកាណាឌីយ៉ា ដែលត្រូវជាសាច់ញាតិរបស់អ្នកស្រីពុង ឈីវកេក៕
ទស្សនាវីដេអូ
Tag:
ពុង ឈីវកេក
ទូតបារាំង
La Légion d’Honneur
© រក្សាសិទ្ធិដោយ thmeythmey.com