មាតាប្រជាធិបតេយ្យមីយ៉ាន់ម៉ា លោកស្រី ស៊ូជី នឹងជួបលោក អូបាម៉ា នៅខែកញ្ញា

អន្តរជាតិ

នយោបាយអន្តរជាតិ

មាតាប្រជាធិបតេយ្យមីយ៉ាន់ម៉ា លោកស្រី ស៊ូជី នឹងជួបលោក អូបាម៉ា នៅខែកញ្ញា

29, Jul 2016 , 10:39 pm

រូបភាព

ដោយ:

ចុងក្រោយកាលបរិច្ឆេទនៃដំណើរទស្សនកិច្ចរបស់មេដឹកនាំ de facto មីយ៉ាន់ម៉ា លោកស្រី អ៊ុងសាន ស៊ូជី ទៅកាន់អាមេរិកត្រូវបានកំណត់ហើយ។ នោះគឺមាតាប្រជាធិបតេយ្យមីយ៉ាន់ម៉ា នឹងមានវត្តមានក្នុងឋានៈថ្មីទៅកាន់អាមេរិកនៅពាក់កណ្តាលខែកញ្ញាខាងមុខដ៏ខ្លីនេះ ហើយ វានឹងក្លាយជាជំនួបលើកទីបីរវាងប្រធានាធិបតីអាមេរិក លោកបារ៉ាក់ អូបាម៉ា ជាមួយនឹងលោកស្រីអ៊ុងសាន ស៊ូជីផងដែរ។

សេតវិមានអាមេរិក បានថ្លែងបញ្ជាក់ថា រដ្ឋមន្ត្រីការបរទេស និងជាទីប្រឹក្សារដ្ឋមីយ៉ាន់ម៉ា លោកស្រី អ៊ុងសាន ស៊ូជី នឹងបំពេញទស្សកិច្ចទៅកាន់វ៉ាស៊ីនតោននៅខែពាក់កណ្តាលខែកញ្ញាខាងមុខនេះហើយ។កាលបរិច្ឆេទនេះ ត្រូវបានបញ្ជាក់បន្ទាប់ពី ទីប្រឹក្សាសន្តិសុខជាតិអាមេរិកលោក Ben Rhodes បានថ្លែងប្រាប់លោកស្រីអ៊ុងសាន ស៊ូជីកាលពីសប្តាហ៍មុនពីការអញ្ជើញលោកស្រីរបស់ប្រធានាធិបតីអាមេរិកលោកបារ៉ាក់ អូបាម៉ាទៅកាន់អាមេរិក មុនពេលលោកបញ្ចប់អាណត្តិប្រធានចុងក្រោយរបស់លោក។ នេះបើយោងតាមសារព័ត៌មាន The News York Times។

សូមជម្រាបផងដែរថា នៅថ្ងៃទី២០ ខែកក្កដា ទីប្រឹក្សាសន្តិសុខជាតិអាមេរិក លោក Ben Rhodes បានថ្លែងឲ្យដឹងពីការអញ្ជើញរបស់លោកប្រធានាធិបតីអាមេរិកបារ៉ាក់ អូបាម៉ា នាជំនួបជាមួយនឹងលោស្រី អ៊ុងសាន ស៊ូជី ដែលស្ថិតនៅក្នុងអំឡុងពេលនៃដំណើរទស្សនកិច្ចរបស់លោកទៅកាន់មីយ៉ាន់ម៉ា។ នាដំណើរទស្សនកិច្ចនោះ លោក ក៏បានប្រកាសកញ្ចប់ជំនួយថ្មីប្រមាណ២១លានដុល្លារដើម្បីគាំទ្រកំណើនសេដ្ឋកិច្ចមីយ៉ាន់ម៉ាទៀតផង។

ការប្រកាសអញ្ជើញលោកស្រី ស៊ូជី រួមជាមួយនឹងជំនួយនេះ ក៏ធ្វើឡើងបន្ទាប់ពី ការប្រកាសរបស់ក្រុងវ៉ាស៊ីនតោនក្នុងការបន្ធូរបន្ថយទណ្ឌកម្មដែលបានដាក់ប្រឆាំងនឹងរដ្ឋាភិបាលមីយ៉ាន់ម៉ាក្នុងពេលដែលយោធាដឹកនាំប្រទេសផងដែរ។ ហើយការបង្ហាញឥរិយាបថស្និទ្ធស្នាល និងវិជ្ជមានរបស់ក្រុងវ៉ាស៊ីនតោនមកកាន់ក្រុងរ៉ងហ្គូននេះដែរ បានចាប់ផ្តើមក្រោយដំណើរការប្រជាធិបតេយ្យមីយ៉ាន់ម៉ាកាន់តែល្អប្រសើរ។

មួយវិញទៀតនោះ ការប្រកាសរបស់ក្រុងវ៉ាស៊ីនតោន ក៏ធ្វើឡើង បន្ទាប់ពីការមីយ៉ាន់ម៉ា រៀបចំការបោះឆ្នោតដោយរលូន រួមជាមួយនឹងការផ្ទេរអំណាចរបស់យោធាដែលបានដឹកនាំប្រទេសអស់រយៈពេលជាច្រើនទសវត្សរ៍ទៅកាន់រដ្ឋាភិបាលស៊ីវិល របស់លោកស្រី អ៊ុងសាន ស៊ូជី ដែលបានឈ្នះការបោះឆ្នោតក្នុងលទ្ធផលភ្លូកទឹកភ្លូកដីកាលពីចុងឆ្នាំ២០១៥កន្លងទៅ។

តែអ្វីគួរកត់សម្គាល់នោះ ដំណើរទស្សនកិច្ចរបស់លោកស្រី ស៊ូជី ទៅកាន់អាមេរិកតាមការអញ្ជើញរបស់លោកអូបាម៉ា នឹងធ្វើឲ្យអ្នកទាំងពីរ ជួបគ្នាផ្លូវការជាលើកទីបីផងដែរ។ លោកស្រី ស៊ូជី ធា្លប់ជួបលោកអូប៉ាម៉ាដំបូងក្នុងនាមជាប្រមុខបក្សប្រឆាំងសម្ព័ន្ធជាតិដើម្បីប្រជាធិបតេយ្យកាលពីឆ្នាំ២០១២។ ហើយ ពេលនោះ ក៏ជាលើកដំបូងដែលអាមេរិក បានបង្ហាញ និងលើកមុខមាត់លោកស្រី អ៊ុងសាន ស៊ូជីក្នុងឆាកអន្តរជាតិ ក្រោយលោកស្រីត្រូវបានដោះលែងជាផ្លូវការពីការឃុំរយៈពេល១៧ឆ្នាំក្នុងផ្ទះដោយក្រុមយោធា។ ក្នុងពេលនោះដែរ លោកស្រី ក៏បានទទួលបានលមេដាយមាសពីអាមេរិកផងដែរ។

ភាគីទាំងពីរ បានជួបគ្នាជាលើកទីពីរ ក្នុងឆ្នាំ២០១៤ នៅក្នុងទឹកដីមីយ៉ាន់ម៉ា នាឱកាសដែលប្រធានាធិបតីបារ៉ាក់ អូបាម៉ាបានចូលរួមកិច្ចប្រជុំកំពូលអាស៊ានដែលមីយ៉ាន់ម៉ាធ្វើជាប្រធានអាស៊ាន។ ក្នុងពេលនោះ លោកស្រី ស៊ូជី នៅតែជាប្រមុខបក្សប្រឆាំងនៅឡើយនោះទេ។

ដោយឡែក សម្រាប់ការជួបលោកអូបាម៉ា នាពេលខាងមុខដ៏ខ្លីនេះ លោកស្រី ស៊ូជី មិនមែនជាមេបក្សប្រឆាំងទៀតឡើយ ពោលគឺ លោកស្រី គឺប្រធានបក្សកាន់អំណាច ហើយដែលគេមើលឃើញថា ជាមេដឹកនាំពិតប្រាកដរបស់មីយ៉ាន់ម៉ានោះ ៕