ជាតិ
ជប៉ុនប្រកាសការប្រកួតរូបថត លើកដំបូង នៅកម្ពុជា
× ភ្នំពេញ៖ ស្ថានទូតជប៉ុន ប្រកាសជ្រើសរើសអ្នករូបថតមិនអាជីពដែលមានរូបថតល្អប្លែកនានា ចូលរួមដាក់ប្រកួតប្រជែងរូបថតក្រោមប្រធានបទ «ជប៉ុននៅកម្ពុជា» របស់ខ្លួនជាលើកដំបូង ក្នុងប្រទេសកម្ពុជា។
បេក្ខជនជនជាតិកម្ពុជា និងបរទេសទាំងពីរភេទអាយុចាប់ពី ១២ឆ្នាំឡើង ដែលស្នាក់នៅស្របច្បាប់ក្នុងប្រទេសកម្ពុជា អាចចូលរួមប្រកួតយកពានរង្វាន់ លើកលែងតែអ្នកថតរូបអាជីព និងអ្នកសារព័ត៌មាន។
បេក្ខជនត្រូវផ្ញើពាក្យសុំប្រកួតភ្ជាប់ជាមួយរូបថត JPEG ទំហំចាប់ពី 70KB-300KB ដែលមានអត្ថន័យបែបជប៉ុននៅកម្ពុជា តាមរយៈសារអេឡិចត្រូនិច (E-mail) ឲ្យមុនថ្ងៃទី៣១ ខែសីហា ឆ្នាំ ២០១៦។ នេះបើតាមសេចក្តីជូនដំណឹងស្ថានទូតជប៉ុន។
«បេក្ខជនត្រូវតែច្បាស់លាស់អំពីកម្មសិទ្ធិបញ្ញានៃរូបថតរបស់ខ្លួន មុនដាក់ពាក្យប្រកួត។ រូបថតដែលផ្តិតជាប់បុគ្គលណាម្នាក់នោះបេក្ខជនត្រូវតែទទួលបានការអនុញ្ញាតពីបុគ្គលនោះសិន»។ ស្ថានទូតហាមបេក្ខជនទាំងអស់ កុំឲ្យយកស្នាដៃរូបថតដែលធ្លាប់ដាក់ និងត្រៀមប្រកួតក្នុងកម្មវិធីដទៃ ពិសេសគឺ រូបថតអ្នកដទៃដាក់ប្រកួតប្រជែងក្នុងកម្មវិធីនេះដាច់ខាត។
ជប៉ុននឹងជ្រើសរើសរូបថតដែលមានខ្លឹមសារ និងមិនត្រូវបានកែច្នៃល្អបែ្លកចំនួន ៣សន្លឹក ផ្សាយលើទំព័រហេ្វសប៊ុករបស់ស្ថានទូតនៅថ្ងៃទី១៦ ខែកញ្ញា ខាងមុខ។ ជ័យលាភី ៣រូប នឹងទទួលរង្វាន់ពីស្ថានទូតជប៉ុន ក្នុងនោះ រួមមាន ម៉ាស៊ីនថតផ្តិតរូបបានភ្លាមម៉ាក Instax mini 8 មួយគ្រឿង, Exteal hard disk driveមួយ និង Portable battery charger មួយ។
បេក្ខជនមានរូបថតត្រឹម ឬក្រោយថ្ងៃទី១ ខែមករា ឆ្នាំ២០១៦ អាចដាក់ពាក្យសុំប្រកួតឲ្យស្ថានទូត តាមរយៈសារអេឡិចត្រូនិច [email protected]។ បេក្ខជនអាចទំនាក់ទំនងផ្នែកវប្បធម៌ និងព័ត៌មានស្ថានទូតជប៉ុន តាមរយៈលេខទូរសព្ទ ០២៣ ២១៧ ១៦១ ឬគេហទំព័រ http://www.kh.emb-japan.go.jp/index-e.htm ដើម្បីទទួលបានព័ត៌មានលម្អិត៕
Tag:
ជប៉ុន
កម្ពុជា
រូបថត
© រក្សាសិទ្ធិដោយ thmeythmey.com