កីឡាជាតិ
ជាតិ
បឹងកេតបង្កើនគម្លាតនាំមុខ ក្រោយលត់ថាយហ្គឺរ ៥-១ បន្ទាប់ពីប៉ូលិសយកឈ្នះស៊ីម៉ាក់ ១-០
× ក្រុមបឹងកេតអង្គរបានបង្កើនគម្លាតឈរមុខគេក្នុងកំពូលតារាងកាន់តែឆ្ងាយក្នុងពានរង្វាន់ក្របខណ្ឌមិត្តហ្វូនខេមបូឌានលីកប្រចាំឆ្នាំ២០១៦ ក្នុងសប្តាហ៍ទី១៤ ក្រោយលត់ក្រុមខេមបូឌានថាយហ្គឺរ ៥-១ កាលពីម្សិលមិញនៅពហុកីឡដ្ឋានជាតិ។ ចំណែកក្រុមអគ្គស្នងការនគរបាលជាតិ(ប៉ូលិស) បានយកឈ្នះក្រុមមជ្ឈមណ្ឌលកំចាត់មីនកម្ពុជា(ស៊ីម៉ាក់) ១-០។
ក្រុមបឹងកេតអង្គរទទួលបាន៣ពិន្ទុបន្ថែមសម្រាប់បន្តឈរកំពូលតារាង និងបង្កើនគម្លាតនាំមុខគេកាន់តែឆ្ងាយក្នុងសប្តាហ៦ទី១៤នៃពានរង្វាន់ក្របខណ្ឌមិត្តហ្វូនខេមបូឌានលីកប្រចាំឆ្នាំ២០១៦ បន្ទាប់ពីលត់ក្រុមខេមបូឌានថាយហ្គឺរ ៥-១ នៅពហុកីឡដ្ឋានជាតិ កាលពីម្សិលមិញ។ ជ័យជម្នះនេះនាំឲ្យបឹងកេតអង្គរបានបង្កើនគម្លាតពីដៃគូប្រជែងក្រសួងការពារជាតិរហូត៦ពិន្ទុ ដោយក្រុមនេះមាន៣៧ពិន្ទុ ចំណែកក្រសួងការពារជាតិមាន ៣១ពិន្ទុ។
ជ័យជម្នះរបស់ក្រុមបឹងកេតអង្គរ ៥-១ លើក្រុមខេមបូឌានថាយហ្គឺរនេះ កីឡាករជប៉ុន Kazuki ជាអ្នករកបានគ្រាប់បាល់បើកឆាកឲ្យបឹងកេតនៅនាទី១០ មុនកីឡាករ Bata សម្រេចគ្រាប់ទី២នៅនាទី២០ ដើម្បីនាំមុខខេមបូឌានថាយហ្គឺរ ២-០ ក្នុងតង់ទី១។
ចំណែកតង់ទី២ខ្សែប្រយុទ្ធខេមបូឌានថាយហ្គឺរ Masato បានតែតបាល់បញ្ចូលទី១គ្រាប់ ដើម្បីតាមបឹងកេតអង្គរ ២-១ នៅនាទី៦៧ ប៉ុន្តែខ្សែប្រយុទ្ធ Gbenga បានសម្រេច២គ្រាប់បន្ថែមឲ្យបឹងកេតនៅនាទី៧៩ និង៨២ មុនកីឡាករ ចាន់ វឌ្ឍនាកា សម្រេចគ្រាប់បាល់ចុងក្រោយនៅនាទីបន្ថែម ៩០+៤ ដើម្បីនាំជ័យជម្នះ ៥-១ ឲ្យបឹងកេត។
ដោយឡែក នាជំនួបរវាងក្រុមអគ្គស្នងការនគរបាលជាតិ និងមជ្ឈមណ្ឌលកំចាត់មីនកម្ពុជានៅពហុកីឡដ្ឋានជាតិកាលពីម្សិលមិញ ក្នុងតង់ទី១ក្រុមទាំងពីរមិនមានការស៊ុតបាល់បញ្ចូលទីគ្នានោះទេ ទោះបីក្រុមទាំងពីរខំប្រឹងវាយបកដាក់គ្នាទៅវិញទៅមកយ៉ាងណាក៏ដោយ។ ប៉ុន្តែនៅចុងតង់ទី២ខ្សែប្រយុទ្ធ ទិត្យ ឌីណា រកបានគ្រាប់បាល់១គ្រាប់ឲ្យប៉ូលិស ដើម្បីនាំមុខស៊ីម៉ាក ១-០ នៅនាទី៨៦ ហើយវាក៏ជាគ្រាប់បាល់ជ័យជម្នះរបស់ប៉ូលិសផងដែរ។
ជ័យជម្នះរបស់បឹងកេត មិនត្រឹមតែជួយឲ្យក្រុមនេះឈរកំពូលតារាង និងបង្កើនគម្លាតមុខគេក្នុងកំពូលតារាងប៉ុណ្ណោះទេ ថែមទាំងជួយឲ្យឈានកាន់តែកៀកក្នុងការឈ្នះពានរង្វាន់ក្របខណ្ឌមិត្តហ្វូនខេមបូឌានលីកប្រចាំឆ្នាំ២០១៦ ព្រោះក្រុមនេះនៅសល់តែ៤ប្រកួតទៀតប៉ុណ្ណោះ គឺជាមួយ ណាហ្គាវើល នៅថ្ងៃទី៧ សីហា, ប៉ូលិស ថ្ងៃទី១៤ សីហា, ស្វាយរៀង ថ្ងៃទី១៩ ខែសីហា និងជាមួយភ្នំពេញក្រោន នៅថ្ងៃទី១១ ខែកញ្ញា៕
Tag:
បាល់ទាត់
Cambodian League 2016
© រក្សាសិទ្ធិដោយ thmeythmey.com