ជាតិ
ADB បើកឱកាសដល់យុវជនកម្ពុជាចូលរួមប្រកួតប្រជែងសំណេរអត្ថបទដើម្បីអបអរខួបទី៥០
× ភ្នំពេញ៖ ធនាគារអភិវឌ្ឍន៍អាស៊ី (ADB) ក្រោមកិច្ចសហការជាមួយសាកលវិទ្យាល័យជាតិគ្រប់គ្រង បានរៀបចំឲ្យមានការប្រកួតសំណេរអត្ថបទជាភាសាអង់គ្លេសសម្រាប់និស្សិតកម្ពុជា ដោយផ្ដោតលើភាពជាដៃគូរវាង ADB និងរដ្ឋាភិបាលកម្ពុជា ដែលឈានដល់ការអបអរខួបលើកទី៥០នៅចុងឆ្នាំនេះ។
នារយៈពេល៥ទសវត្សកន្លងមកនេះ ធនាគារអភិវឌ្ឍន៍អាស៊ី (ADB) បានដើរតួនាទីយ៉ាងសំខាន់ក្នុងការលើកកម្ពស់សេដ្ឋកិច្ចនៅកម្ពុជា។ នាឱកាសប្រារព្ធខួបលើកទី៥០នៃទំនាក់ទំនងជាមួយកម្ពុជា ស្ថាប័នហិរញ្ញវត្ថុដ៏ធំនៅអាស៊ីមួយនេះ ប្រកាសរៀបចំកម្មវិធីប្រកួតសំណេរអត្ថបទជាភាសាអង់គ្លេសសម្រាប់យុវជននៅកម្ពុជា ដោយមានកិច្ចសហការពីសាកលវិទ្យាល័យជាតិគ្រប់គ្រង។
យោងតាមសេចក្តីប្រកាសព័ត៌មានរបស់ ADB កាលពីថ្ងៃទី២៩ ខែកក្កដា លោក Samiuela Tukuafu នាយកធនាគារអភិវឌ្ឍន៍អាស៊ីប្រចាំកម្ពុជា មានប្រសាសន៍ថា ការប្រកួតប្រជែងនេះ ផ្ដល់ឱកាសឲ្យយុវជនកម្ពុជា ក្នុងការស្រាវជ្រាវ និងចែករំលែកចំណេះដឹងពួកគេ ចំពោះតួនាទីរបស់ ADB នៅក្នុងវឌ្ឍនភាពនៃកិច្ចការសង្គម និងសេដ្ឋកិច្ច របស់កម្ពុជា នារយៈពេល៥០ឆ្នាំ កន្លងមក។
លោក Tukuafu បានបន្តថា៖ «យើងក៏ចាប់អារម្មណ៍ផងដែរ ទៅលើគំនិតថ្មីៗរបស់អ្នកនិពន្ធវ័យក្មេងទាំងនោះ ទាក់ទងនឹង ភាពជាដៃគូនាពេលអនាគតរវាង ADB និងរដ្ឋាភិបាលកម្ពុជា។
ជាមួយគ្នានេះ ចំពោះការប្រកួតប្រជែង អ្នកចូលរួមប្រកួតប្រជែងត្រូវសរសេរអត្ថបទសំណេរមួយ ជាភាសាអង់គ្លេស ដោយមិនបានចម្លងស្នាដៃអ្នកដទៃ ក្នុងចន្លោះពី ១៥០០ ទៅ២០០០ពាក្យ។ សម្រាប់ម្ចាស់អត្ថបទសំណេរ ដែលមានស្នាដៃល្អបំផុតចំនួន១០នាក់ នឹងទទួលបានរង្វាន់ ពី ADB ក្នុងពិធីខួបលើកទី៥០ ដែលរៀបចំដោយ ADB នៅចុងឆ្នាំខាងមុខនេះ។
ចំពោះជ័យលាភីលេខ១ ទទួលបានថវិកា ៥០០ដុល្លារអាមេរិក អមដោយមេដាយមាស និងវិញ្ញាបនបត្រ, ជ័យលាភីលេខ២ ទទួលបានថវិកា ៣០០ដុល្លារអាមេរិក អមដោយមេដាយប្រាក់ និងវិញ្ញាបនបត្រ និងជ័យលាភីលេខ៣ ទទួលបានថវិកា ២០០ដុល្លារអាមេរិក អមដោយមេដាយសំរិទ្ធ និងវិញ្ញាបនបត្រ។ សម្រាប់បេក្ខជនទាំង៧រូប ដែលមិនបានជ័យលាភី នឹងទទួលបានថវិកាក្នុងមួយនាក់ ១០០ដុល្លារអាមេរិក រួមជាមួយវិញ្ញាបនបត្រ។ ជាមួយគ្នានេះ កាលបរិច្ឆេទឈប់ទទួលសំណេរអត្ថបទ ត្រឹមថ្ងៃទី៣១ ខែសីហា ឆ្នាំ២០១៦នេះ វេលាម៉ោង៥ល្ងាច៕
© រក្សាសិទ្ធិដោយ thmeythmey.com