យុវជន បញ្ញា គ្រោងស្នើដាក់តាំងគំនូរ លោក កែម ឡី ក្នុងសារមន្ទីរជាតិ

បទយកការណ៍ / បទសម្ភាសន៍

យុវជន បញ្ញា គ្រោងស្នើដាក់តាំងគំនូរ លោក កែម ឡី ក្នុងសារមន្ទីរជាតិ

06, Aug 2016 , 9:54 am

រូបភាព

ដោយ:

ជីវព័ត៌មាន

ភ្នំពេញ៖ លោក ប៊ួ បញ្ញា គឺជាអ្នកគូររូបដ៏ធំមួយរបស់លោក បណ្ឌិត កែម ឡី ដែលបានលេចឡើង នៅក្នុងក្បួនដង្ហែសពរបស់លោកកែម ឡី កាលពីពេលកន្លងមក។ គំនូរនេះ មានទំហំ ២ម៉ែត្រកន្លះ គុណនឹង១.៧ ម៉ែត្រ ។ យុវជនវ័យ២៦រូបនេះ គ្រោងស្នើសារមន្ទីរជាតិ ដើម្បីដាក់តាំងរូបគំនូរនេះផងដែរ។ ជាមួយគ្នានោះ បញ្ញា គ្រោងគូររូបអំពីសកម្មភាពរបស់ លោក កែម ឡីចំនួន៤៥ផ្ទាំងបន្ថែមទៀត និងចង់ឲ្យរដ្ឋាភិបាលសង់សារមន្ទីរមួយទៀត ដែលមានឈ្មោះលោក កែម ឡី ទៀតផង។

អ្នកតាមដានសារព័ត៌មាន ប្រហែលជាមិនទាន់ភ្លេចទេ រូបភាពការដង្ហែសព លោក កែម ឡី ទៅកាន់ខេត្តតាកែវ កាលពីថ្ងៃទី២៩ ខែកក្កដា ដែលមានចូលរួមជាច្រើននាក់នោះ។ ប៉ុន្តែអ្វីដែលគួរឲ្យចាប់អារម្មណ៍ដែរនោះ គឺផ្ទាំងគំនូរដ៏ធំមួយ ដែលមានទំហំ២ម៉ែត្រកន្លះ គុណនឹង១.៧ម៉ែត្រ ដែលដាក់លើរថយន្តមួយគ្រឿងនៅក្នុងក្បួនដង្ហែដែរនោះ។ គំនូរនេះ ត្រូវបានលោក ប៊ួ បញ្ញា ដែលជាម្ចាស់ស្នាដៃ យកមកដាក់តាំងនៅទីស្នាក់ការកណ្តាលគណបក្សប្រជាធិបតេយ្យមូលដ្ឋាន ក្នុងថ្ងៃប្រារព្ធខួប១ឆ្នាំ នៃការបង្កើតគណបក្សនេះ។

និស្សិតឆ្នាំ៥ ផ្នែកអភិវឌ្ឍន៍ជនបទ នៅវិទ្យាស្ថានបច្ចេកវិទ្យាកម្ពុជា លោក ប៊ួ បញ្ញា បានដុសខាត់ ជំនាញគូររូបរបស់ខ្លួន បន្ទាប់ពីគេបានទទួលបានការបណ្តុះបណ្តាលផ្នែកគំនូរ ពីអង្គការកុមារមេគង្គ កាលលោករៀនថ្នាក់ទី៥ នៅខេត្តបន្ទាយមានជ័យ ដែលជាស្រុកកំណើត។ យុវជនវ័យ២៦ឆ្នាំរូបនេះ បានបញ្ជាក់យ៉ាងដូច្នេះ៖«រូបនេះ ខ្ញុំគូរបន្ទាប់ពី លោក កែម ឡីស្លាប់បាន៥ថ្ងៃ ខ្ញុំផ្តើមគូរដើម្បីឲ្យទាន់ការដង្ហែសពរបស់គាត់ ដែលគេប្រកាសថា ហែទៅខេត្តតាកែវ ក្នុងថ្ងៃបុណ្យ៧ថ្ងៃរបស់គាត់ តែគម្រោងបានប្តូរវិញ»។

បើតាម បួរ បញ្ញា រូបគេបានចំណាយពេល៣០ម៉ោង ផ្ចិតផ្ចង់គូរគំនូរមួយផ្ទាំងនេះ និងចំណាយថវិកាប្រមាណ១០០ដុល្លារ ដែលជាថវិកាផ្ទាល់ខ្លួនខ្លះ និងពីសប្បុរសជនខ្លះ។ និស្សិតរូបនេះបន្តថា គំនូររូបលោក កែម ឡី ដែលគេគូរនេះ គឺកើតឡើងចេញពីទឹកចិត្តស្រឡាញ់ និងគោរព ចំពោះលោក បណ្ឌិត កែម ឡី ដែលយុវជនរូបនេះ ចាត់ទុកថាជាវីរបុរសនៃសេរីភាពបញ្ចេញមតិនៅកម្ពុជា។

ព្រោះតែស្រឡាញ់ពីវីរភាពរបស់ លោក កែម ឡី បញ្ញា បានអះអាងថា រូបគេគ្រោងគូររូបលោក កែម ឡី ចំនួន៤៥ផ្ទាំងបន្ថែមទៀត ព្រមទាំងស្នើឲ្យរដ្ឋាភិបាលសង់សារមន្ទីរជាតិមួយដែលមានឈ្មោះ លោក កែម ឡីទៀតផង ដើម្បីដាក់តាំងគំនូរទាំងនេះ។ «នៅពេលបណ្ឌិត កែម ឡី មានអាយុ៩០ឆ្នាំ ខ្ញុំនឹងស្នើសុំសារមន្ទីរជាតិ ឲ្យយកគំនូរនេះ ទៅដាក់តាំងនៅទីនោះ ដើម្បីទុកឲ្យកូនខ្មែរគ្រប់គ្នាបានចងចាំពីវីរភាពរបស់គាត់»។ យុវជនសម្បុរសណ្តែកបាយរូបនេះបញ្ជាក់យ៉ាងដូច្នេះ មុននឹងពន្យល់ពីមូលហេតុបន្ថែមថា ការដែលលោកមិនចង់ស្នើសុំទៅសារមន្ទីរជាតិភ្លាមៗបែបនេះ គឺលោកដឹងទុកជាមុនថា គេមិនអនុញ្ញាតនោះឡើយ។

បញ្ញា បានពន្យល់ពីមូលហេតុដែលរូបគេចង់គូររូបលោក កែម ឡី ៤៥ផ្ទាំងបន្ថែមទៀត យ៉ាងដូច្នេះថា៖«ខ្ញុំស្រឡាញ់លោកបណ្ឌិត កែម ឡី ត្រង់វីរភាពរបស់គាត់ ព្រោះទោះបីលោកដឹងថា គេនឹងសម្លាញ់គាត់ក៏ដោយ ក៏លោកមិនរាថយនោះទេ ទើបខ្ញុំប្តេជ្ញាចិត្តគូររូបគាត់បន្ថែមទៀត ដើម្បីទុកឲ្យខ្មែរជំនាន់ក្រោយ។ កម្រមានណាស់ បញ្ញវន្តដូចគាត់»។