ជាតិ
សេដ្ឋកិច្ច
លោក ថោង ខុន ថាភ្ញៀវទេសចរគាំទ្រឲ្យកម្ពុជាដំឡើងថ្លៃសំបុត្រចូលទស្សនាអង្គរ
×![]()
សៀមរាប៖ រដ្ឋាភិបាលកម្ពុជាតាមរយៈគ្រឹះស្ថានអង្គរ ទើបនឹងប្រកាសពីគោលការណ៍ថ្មី ដែលសម្រេចដំឡើងថ្លៃសំបុត្រចូលទស្សនារមណីយដ្ឋានអង្គរកាលពីថ្ងៃទី៥ សីហាកន្លងទៅ។ ការណ៍នេះធ្វើឲ្យមានមតិផ្ទុយគ្នា ដោយអ្នកខ្លះថា តម្លៃ៣៧ដុល្លារ ដែលទើបនឹងដំឡើង វាហាក់ដូចជាថ្លៃបន្តិច ខណៈដែលរដ្ឋមន្ត្រីក្រសួងទេសចរណ៍អះអាងថា មានភ្ញៀវទេសចរបរទេសជាច្រើន គាំទ្រក្នុងគោលការណ៍ថ្មីនេះ។
លោក ថោង ខុន រដ្ឋមន្ត្រីក្រសួងទេសចរណ៍បានប្រាប់អ្នកសារព័ត៌មាននៅព្រឹកថ្ងៃទី៧ សីហានេះថា ក្រសួងបានសិក្សាច្បាស់លាស់ និងបានសិក្សាជាច្រើនឆ្នាំមកហើយ លើគោលការណ៍ថ្មីនៃការដំឡើងថ្លៃសំបុត្រទស្សនារមណីយដ្ឋានអង្គរ។ លោកបន្តថា តាមការសិក្សា និងសួរយោបល់ពីសំណាក់ភ្ញៀវទេសចរនៅតាមព្រលានយន្តហោះ ភ្ញៀវទេសចរច្រើនបានសរសើរថា ប្រាសាទអង្គរវត្តពិតវត្ថុដ៏អស្ចារ្យមួយក្នុងពិភពលោក។
«…ទីភ្នាក់ងារទេសចរណ៍ធំៗ ក៏គេប្រាប់យើងថា ថ្លៃយើងថោកណាស់។ ហើយយើងប្រៀបធៀបទៅពិភពលោក ខ្លះប្រាសាទតែមួយទេ ថ្លៃ៨០ដុល្លារ...»។ លោករដ្ឋមន្ត្រីមានប្រសាសន៍ដូច្នេះហើយ ក៏បន្ថែមយ៉ាងនេះថា៖«...ភាពអច្ឆរិយៈរបស់យើង កាន់តែត្រូវបានគេផ្សព្វផ្សាយ ដូច្នេះផលិតផលរបស់យើងកាន់តែល្អ។ យើងមានរបស់មួយ ដែលពីមួយថ្ងៃទីមួយថ្ងៃ កាន់តែមានគុណភាព ដូច្នេះលក់របស់ល្អ ដែលមានគុណភាព គេមិនថាថ្លៃទេ»។
លោករដ្ឋមន្ត្រីក្រសួងទេសចរណ៍បានពន្យល់បន្ថែមលើតម្លៃនេះថា សម្រាប់៣៧ដុល្លារបច្ចុប្បន្ន វាស្មើនឹងតម្លៃ២០ដុល្លារកាលពីឆ្នាំ៩៤ ដែលសព្វថ្ងៃ គ្រប់តម្លៃទំនិញទាំងអស់នៅលើទីផ្សារ មានតម្លៃថ្លៃ។
សម្រាប់មគ្គុទ្ទេសក៍ទេសចរណ៍យល់ថា ការដំឡើងថ្លៃសំបុត្រអង្គរ ហាក់មិនស៊ីគ្នាទៅនឹងស្ថានភាពសេដ្ឋកិច្ចក្នុងពិភពលោក។ លោក រស់ សណ្តាន ប្រធានសមាគមមគ្គុទេសក៍ទេសចរណ៍ជនជាតិខ្មែរនិយាយភសារុស្ស៊ី ធ្លាប់បានប្រាប់សារព័ត៌មានថ្មីៗថា ការដំឡើងតម្លៃនេះ អាចប៉ះពាល់ដល់វិស័យទេសចរណ៍ខ្មែរ ដែលលោកមើលឃើញថា ហាក់មិនសូវល្អក្នុងរយៈពេលចុងក្រោយនេះ។
ផ្ទុយពីនេះ ប្រធានសមាគមទីភ្នាក់ងារទេសចរណ៍កម្ពុជាប្រចាំខេត្តសៀមរាប បែរយល់ថា មិនសូវជាថ្លៃនោះទេ។ លោក ផាវ ព្រឿន ពន្យល់ថា បើធៀបនឹងគោលដៅទេសចរណ៍ក្នុងប្រទេសក្បែរខាង គឺតម្លៃនេះ អាចទទួលយកបាន ហើយលោកសុំឲ្យមានសេចក្តីជូនដំណឹងមុនការអនុវត្តជាក់ស្តែងរយៈពេលមួយឆ្នាំឡើង ដើម្បីងាយស្រួលដល់ទីភ្នាក់ងារទេសចរណ៍ធ្វើការផ្សព្វផ្សាយ។
គ្រឹះស្ថានអង្គរ ដែលជាស្ថាប័នគ្រប់គ្រងចំណូលអង្គររបស់រាជរដ្ឋាភិបាល បានប្រកាសពីតម្លៃថ្មី។ តម្លៃថ្មី គឺសម្រាប់សំបុត្រទស្សនាមួយថ្ងៃ ឡើងពី២០ទៅ៣៧ដុល្លារ សម្រាប់៣ថ្ងៃឡើងពី៤០ ទៅ៦២ដុល្លារ និងសម្រាប់១សប្តាហ៍ឡើងពី៦០ ទៅ៧២ដុល្លារ។ រាល់សំបុត្រទាំងអស់ គឺរដ្ឋាភិបាលបានកាត់២ដុល្លារ សម្រាប់បង់ចូលក្នុងមូលនិធិរបស់មន្ទីរពេទ្យគន្ធបុប្ផា ដោយមានបញ្ជាក់ច្បាស់នៅខាងក្រោយខ្នងសំបុត្រ។ គោលការណ៍ថ្មីនេះ នឹងអនុវត្តន៍ចាប់ពីខែកុម្ភៈ ឆ្នាំ២០១៧តទៅ៕
សូមស្តាប់ប្រសាសន៍លោក ថោង ខុន ពាក់ព័ន្ធនឹងបញ្ហានេះដូចតទៅ
Tag:
ថោង ខុន
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
