ភ្នំពេញ៖
«អង្ករក្លាយជាបាយ» គឺមិនមែនជាការដាំបាយ សម្រាប់បរិភោគប្រចាំថ្ងៃនោះទេ ប៉ុន្តែ ពាក្យនេះ ចាស់បុរាណតែងសំដៅលើស្នេហាជ្រុលខ្លួនរបស់យុវវ័យ។ ស្នេហាដំបូងដ៏ផ្អែមល្អែមដូចទឹកឃ្មុំ ប៉ុន្តែ ប្រែជាស្នេហាទឹកខ្មេះនោះ គឺតែងធ្វើឲ្យអ្នកដែលជួបប្រទះបញ្ហានេះ ពិបាករកផ្លូវដោះស្រាយ ពីព្រោះយុវវ័យជាវ័យឈាមរាវ មិនសូវមានគំនិតវែងឆ្ងាយ។ ភិក្ខុ គូ សុភាព មានវិធី៨យ៉ាង ដើម្បីដោះស្រាយបញ្ហានេះ។
«អង្ករក្លាយជាបាយ» បើបញ្ហាធ្ងន់ធ្ងរ មិនអាចដោះស្រាយបាន អ្នកមានបញ្ហានេះទាំងឡាយ គួរពិចារណាស្វែងរកផ្លូវដោះស្រាយតាមផ្លូវចិត្តខ្លួនឯងដូចខាងក្រោម៖
១) កុំចាំបាច់ក្តៅក្រហាយស្តាយក្រោយធ្វើអ្វី ទោះបីខំយំស្រែក រហូតមិនញ៉ាំបាយផឹកទឹក ដេកបង្ហូរទឹកភ្នែក និងធ្វើបាបខ្លួនឯងប៉ុណ្ណា ក៏មិនត្រឡប់ដូចដើមវិញដែរ។ គួរគិតថា ទុកសោករបស់យើងប៉ុណ្ណឹង នៅមិនទាន់ដល់ទុក្ខរបស់នាងបដាចារ ដែលប្តី ឪពុកម្តាយ និងបងប្អូនត្រូវស្លាប់ តែនាងនៅតែតស៊ូរស់បាន ដោយមិនអស់សង្ឃឹមក្នុងជីវិត រហូតនាងក្លាយជាមនុស្សដ៏មានតម្លៃ និងគួរឲ្យគោរព។
២) គួរគិតថា វាមិនមែនកើតឡើងចំពោះយើងម្នាក់ទេ ពីព្រោះមនុស្សលើផែនដីទាំងអស់ សុទ្ធតែមានរឿងនេះដែរ។ ចូរកុំយកចិត្តទុកដាក់ នឹងពាក្យសើចចំអក ពាក្យនិន្ទា គឺត្រូវទ្រាំលេបថ្ម លេបគ្រួស លុះដល់ថ្ងៃក្រោយ ពាក្យទាំងនោះ នឹងក្លាយជាអសារបង់។ ចូរកុំមានគំនិតសងសឹក និងកុំគិតខ្លីចង់សម្លាប់ខ្លួនដោយសារខ្មាស់គេ។ គួរត្រូវគិតថា យើងអាចរកអ្នកផ្សេងមកជំនួសបានទេតើ ឲ្យតែនៅមានជីវិត។
៣) បើនៅរៀន ត្រូវខំរៀនឡើងវិញ បើរកស៊ី ត្រូវខំរកស៊ីឡើងវិញ និងធ្វើអ្វីដែលនាំឲ្យសប្បាយចិត្ត ដូចជា ដើរលេងកំសាន្ត លេងកីឡា ហូបនេះ ហូបនោះ បំបាត់ទុក្ខកង្វល់។
៤) កុំរម្លឹករឿងចាស់ នាំសៅហ្មងចិត្ត កុំនិយាយដើមគេ បង្កាច់បង្ខូចកេរ្តិ៍គេ ឬតាមបំបែកបំបាក់គេ។ គួរចៀសវាងគំនិត«បើអញមិនបានសុខហើយ អញមិនឲ្យអ្នកណាបានសុខទេ» ព្រោះអាចនាំតែនាំទុក្ខដល់ខ្លួនវិញ។
៥) កុំគិតថា ខ្លួនខូចហើយទៅលក់ខ្លួនជានារីរកស៊ីផ្លូវភេទ ដើរពាលាអាវាសែ ឬដើរផឹកប្រមឹក ពុកមាត់មិនកោរ សក់មិនកាត់ មើលមុខដូចចោរប្លន់ គឺត្រូវគិតប្រឹងប្រែង ប្រកបរបរអាជីពដោយសុចរិតទៀតត្រង់។
៦) ព្យាយាមដេកឲ្យឆ្អែតភ្នែក ស៊ីឲ្យឆ្អែតពោះ កុំធ្វើបាបខ្លួនឯង ព្យាយាមបំភ្លេចរឿងអាស្រូវនោះចេញ ហើយត្រូវចូលទៅពិគ្រោះយោបល់ជាមួយឪពុកម្តាយ និងចាស់ទុំដើម្បីឲ្យលោកជួយដោះស្រាយ។
៧) កុំរម្លឹកអនុស្សាវរីយ៍ល្អូកល្អិន ផ្អែមល្អែម នាំឲ្យហូរទាំងភ្នែក ព្រោះវាគ្រាន់តែរឿងអតីតកាលតែប៉ុណ្ណោះ។ គួរតែបោះចោលរូបថត លក់ចោលវត្ថុអនុស្សាវរីយ៍ ឬគ្រឿងបញ្ចាំចិត្តណាដែលមិនសំខាន់ កុំទុកច្រើនពេក អាចនាំឲ្យអាល័យ កាត់ចិត្តមិនដាច់។
៨) សមាធិ ប្រមូលចិត្ត ប្រមូលអារម្មណ៍ឲ្យមូល មិនឲ្យរវើរវាយ អង្គុយក្នុងបន្ទប់ ពែនភ្នែន បិទភ្នែក ផ្តោតចិត្តទៅលើខ្សល់ដកដង្ហើមចេញចូលនៅចុងច្រមុះតែម្យ៉ាង កុំគិតរឿងអ្វីផ្សេងទៀត។ ហ្វឹកហាត់មុនពេលចូលគេងរៀងរាល់ថ្ងៃ យ៉ាងហោចណាស់៣០នាទីក្នុងមួយថ្ងៃ៕
ប្រភព៖«យល់ដឹងអំពីជីវិតអាពាហ៍ពិពាហ៍»រៀបរៀង ដោយ ភិក្ខុ គូ សុភាព