ជាតិ
សង្គមជាតិ
អង្គការ ILO ជំរុញឲ្យមានការលើកទឹកចិត្តជនជាតិដើមភាគតិចក្នុងការចូលរួមអភិវឌ្ឍសង្គម
× ភ្នំពេញ៖ អង្គការអន្តជាតិខាងការងារ ហៅកាត់ថា ILO ជំរុញឲ្យមានការលើកទឹកចិត្តជនជាតិដើមភាគតិចក្នុងការចូលរួមអភិវឌ្ឍសង្គម។ អង្គការ ILO កត់សម្គាល់ថា បច្ចុប្បន្ននេះ សំឡេងរបស់ជនជាតិដើមភាគតិច គឺជាការរួមចំណែក ក្នុងការកសាងយន្តការរឹងមាំ និងមានប្រសិទ្ធិភាពសម្រាប់កិច្ចសន្ទនា ដែលជាដៃគូក្នុងការបំពេញតាមការសន្យា ដើម្បីការអភិវឌ្ឍន៍។
បើតាមសេចក្ដីថ្លែងការណ៍របស់អង្គការ ILO ជនជាតិដើមភាគតិច និងកុលសម្ព័ន្ធ គឺជាក្រុមដែលងាយរងគ្រោះទៅនឹងការរើសអើង។ ពួកគេប្រឈមនឹងការលំបាកនានា នៅក្នុងការទទួលការអប់រំប្រកបដោយគុណភាព ឱកាសការងារសមរម្យ ការគាំទ្រសម្រាប់សកម្មភាពបង្កើនប្រាក់ចំណូល និងកិច្ចគាំពារសង្គម។ ជនជាតិដើមភាគតិច ក៏ស្ថិតនៅចំណោមក្រុមដែលរងផលប៉ះពាល់នៃការបំរែបំរួលអាកាសធាតុ និងការបាត់បង់សិទ្ធិកាន់កាប់ដីធ្លីផងដែរ។
បើតាមអគ្គនាយកអង្គការអន្តរជាតិខាងការងារ លោក Guy Ryder ជនជាតិដើមភាគតិច និងទទួលបានយកចិត្តទុកដាក់ជាពិសេស ទៅលើស្ត្រី តាមរយៈរបៀបវីរៈ «គ្មាននរណាម្នាក់ ត្រូវបានគេទុកចោល» នៅក្នុងការខិតខំ ឆ្ពោះទៅរកការសម្រេចឲ្យបាននូវគោលដៅអភិវឌ្ឍន៍ប្រកបដោយចីរភាព។ លោក Guy Ryder បានបញ្ជាក់ដូច្នេះថា៖«យើងត្រូវធានាឲ្យបានថាជនជាតិដើមភាគតិច និងកុលសម្ព័ន្ធ អាចដឹងពីសក្ដានុពលពេញលេញរបស់ខ្លួន ដែលជាដៃគូ ក្នុងការបំពេញតាមការសន្យា ការអភិវឌ្ឍន៍ប្រកបដោយបរិយាប័ន្នផលិតភាព និងចីរភាព»។
សេចក្ដីថ្លែងការក៏បានបញ្ជាក់ផងដែរនឹងធានាឲ្យបានថា ស្ត្រីនិងបុរស ជនជាតិដើមភាគតិចរាប់លាននាក់ នៅជុំវិញពិភពលោក នឹងក្លាយទៅជាភ្នាក់ងារនៃការផ្លាស់ប្ដូរ ដែលនេះមិនត្រឹមតែធានាជីវភាពរស់នៅ និងតម្រូវការរបស់ពួកគេផ្ទាល់ប៉ុណ្ណោះទេ ប៉ុន្តែថែមទាំងដើម្បីការពារថែរក្សាធនធាន ធម្មជាតិ របស់ខ្លួនទៀតផង។
តាមរយៈអនុសញ្ញាស្ដីពីជនជាតិដើមភាគតិច និងកុលសម្ព័ន្ធរបស់អង្គការ ILO ឆ្នាំ១៩៨៩(លេខ ១៦៩) និងសេចក្ដីប្រកាសរបស់អង្គការសហប្រជាជាតិ ស្ដីពីសិទ្ធិជនជាតិដើមភាគតិច បានសង្កត់ធ្ងន់ទៅលើសិទ្ធិរបស់ជនជាតិដើមភាគតិច ក្នុងការចូលរួមធ្វើសេចក្ដីសម្រេចលើបញ្ហានានា ដែលអាចរងផលប៉ះពាល់ដល់ពួកគេដោយផ្ទាល់។ អង្គការ ILO និងសសរស្ដម្ភទាំងបួន រួមមានកិច្ចសន្ទនាសង្គម សិទ្ធិការងារ កិច្ចគាំពារសង្គម និងការងារ បានកំណត់ពិភពការងារជាផ្នែកស្នូលនៃការដោះស្រាយបញ្ហាសង្គម បញ្ហាសេដ្ចកិច្ច និងបញ្ហាបរិស្ថាន។
គួរបញ្ជាក់ថា ថ្ងៃទី៩ ខែសីហា ឆ្នាំ២០១៦ គឺជាទិវាអន្តរជាតិ នៃជនជាតិដើមភាគតិច នៅលើពិភពលោក។ តាមរយៈទិវានេះ ជនជាតិដើមភាគតិច នឹងទទួលបានការផ្ដល់យុត្តិធម៌ផ្នែកសេដ្ឋកិច្ច និងសង្គមកិច្ច តាមរយៈការងារសមរម្យ៕
© រក្សាសិទ្ធិដោយ thmeythmey.com