ជាតិ
សង្គមជាតិ
ក្រសួងសន្យាជួយដោះស្រាយរឿងដីធ្លីជូនពលរដ្ឋនៅបឹងទំពុន និងបឹងជើងឯក
×
ភ្នំពេញ៖ ដោយព្រួយបារម្ភពីគម្រោងអភិវឌ្ឍន៍នៅក្បែរសហគមន៍របស់ខ្លួន ពលរដ្ឋមកពីសហគមន៍ ព្រែកតាគង់១ និងខ្វា នៃតំបន់បឹងទំពុន និងបឹងជើងឯក នៅថ្ងៃនេះ បានដាក់ញត្តិទាមទារជាថ្មីទៅក្រសួងរៀបចំដែនដី នគរូបនីយកម្ម និងសំណង់ ដើម្បីឲ្យក្រសួងផ្ដល់កម្មសិទ្ធិដីធ្លីដល់ពួកគាត់។ អ្នកនាំពាក្យក្រសួងរៀបចំដែនដី បានសន្យាជួយដោះស្រាយបញ្ហារបស់ពលរដ្ឋទាំងនោះ។
ញត្តិទាមទាបណ្ណកម្មសិទ្ធិដីធ្លីរបស់សហគមន៍ព្រែកតាគង់១ និងខ្វា ត្រូវបានក្រសួងរៀបចំដែនដីព្រមទទួល យកទៅពិនត្យដោះស្រាយហើយនៅថ្ងៃនេះ។ លោក អ៊ំ ណារី តំណាងសហគមព្រែកតាគង់១ ឲ្យដឹងថា ពលរដ្ឋទាំងពីរសហគមន៍នៃតំបន់បឹងទំពុន និងបឹងជើងឯក នៅថ្ងៃទី១១ខែសីហានេះ បានទាមទារជាថ្មីទៅក្រសួងរៀបចំដែនដី ដើម្បីជួយឲ្យពួកគាត់ទទួលបានកម្មសិទ្ធិដីធ្លី និងអភិវឌ្ឍន៍នៅនឹងកន្លែង ខណៈពលរដ្ឋទាំងនោះ ព្រួយបារម្ភពីគម្រោងអភិវឌ្ឍន៍របស់ក្រុមហ៊ុន ING Holding នៅក្នុងតំបន់នោះ។ បើតាមលោក ណារី សហគមន៍ព្រែកតាគង់១មានពលរដ្ឋជាង ៣៨០គ្រួសារ និងសហគមន៍ខ្វាមានប្រហែល ១៦០គ្រួសារ។
តំណាងសហគមន៍ព្រែកតាគង់១រូបនេះ បញ្ជាក់ថា ពលរដ្ឋបានដាក់ញ្ញត្តិទៅក្រសួងរៀបចំដែនដីម្ដងរួចហើយ តែក្រសួងស្នើឲ្យពលរដ្ឋដែលទាមទារទាំងនោះ ស្វែងរកដំណោះស្រាយពីសាលារាជធានីភ្នំពេញ។ លោកបន្ថែមថា ដោយមិនទាន់ទទួលដំណោះស្រាយពីអាជ្ញាធររាជធានី ទើបសហគមន៍ទាំងពីរនេះបន្តដាក់ញ្ញត្តិជាថ្មីទៅក្រសួងរៀបចំដែនដី។
អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក សារុន ឫទ្ធា ថ្លែងប្រាប់សារព័ត៌មានថ្មីៗថា ក្រសួងព្រមទទួលយកញត្តិរបស់ពលរដ្ឋ ដើម្បីពិនិត្យដោះស្រាយរឿងដីធ្លីទាំងនោះ។ លោកមានប្រសាសន៍ដូច្នេះថា៖«ជាគោលការណ៍រាល់ញត្តិ ឬសំណូមពររបស់ពលរដ្ឋដាក់ទៅក្រសួងតែងយកទៅពិនិត្យ ហើយចែកក្រុមដោះស្រាយតាមជំនាញនីមួយៗ»។ ប៉ុន្តែដំណោះស្រាយរបស់ក្រសួងនឹងសម្រេចយ៉ាងណានោះ លោក ឫទ្ធា ប្រាប់ថា គឺអាស្រ័យការពិនិត្យតាមភាពជាក់ស្តែងរបស់ក្រុមជំនាញ។
លោក អ៊ំ ណារី តំណាងពលរដ្ឋតវ៉ា អះអាងថា បើដំណោះស្រាយរបស់ក្រសួងមិនឆ្លើយតបតាមការចង់បានរបស់ពលរដ្ឋនោះទេ នោះនឹងមានការទាមទារសាជាថ្មី។ លោកនិយាយដូចនេះថា៖«យើងនឹងបន្តទាមទារ ដោយមានមនុស្សច្រើនជាងនេះទៀត ដើម្បីឲ្យក្រសួងដោះស្រាយ»។ បើតាមលោក ណារី ក្រសួងនឹងផ្ដល់ដំណឹងអំពីដំណោះស្រាយនៅថ្ងៃទី២៤ខែសីហា ខាងមុខនេះ៕
© រក្សាសិទ្ធិដោយ thmeythmey.com