ពីនេះ ពីនោះ
ព័ត៍មានសុខភាព
ទារកទើបនឹងកើត ខ្វះវីតាមីន D មានអាការៈបែបនេះ
× កង្វះវីតាមីន D មិនត្រឹមតែកើតមាន ទៅលើមនុស្សធំទេ តែក៏មានលើទារក ទើបនឹងកើតផងដែរ ឬអាយុក្រោម ១២ ខែ ព្រោះពួកគេត្រូវការយ៉ាងហោចណាស់ ៥ ម៉ៃក្រូក្រាមជារៀងរាល់ថ្ងៃ។ ធម្មតា កាលណាមិនមានវីតាមីន D គ្រប់គ្រាន់ គេនឹងប្រឈមខ្លាំង នឹងការលូតលាស់ឆ្អឹងមិនសូវល្អ។ កង្វះវីតាមីន D លើទារកទើបនឹងកើត អាចស្រួលព្យាបាលទេ ជាមួយនឹងការឲ្យថ្នាំគ្រាប់វីតាមីន D លេបតែមួយដងគត់។ នៅរយៈពេល ៣ សប្តាហ៍ក្រោយ គឺត្រូវការថតកាំរស្មីអ៊ិចបន្ថែម ដើម្បីចង់ដឹងថាតែទារកនោះ មានការបឺតស្រូបវីតាមីន យកទៅប្រើប្រាស់បាន ឬអត់។
កង្វះវីតាមីន D ត្រូវបានគេស្គាល់ថា ជាហេតុនាំឲ្យទារក មានគ្រោងឆ្អឹងខុសធម្មតា (ឬ Rickets) ដោយសារតែការបឺតស្រូប ជាតិកាល់ស្យូម និងផូស្វ័រមិនបានគ្រប់គ្រាន់។ ជំងឺមួយនេះ ច្រើនកើតលើទារក អាយុចាប់ពី ៦ ទៅ ៣៦ ខែ។ យ៉ាងណាមិញ អាការៈបញ្ជាក់ថា ទារកមានបញ្ហាកង្វះវីតាមីន D ក្នុងខ្លួននោះមានដូចជា ៖
ឆ្អឹងលូតលាស់ខុសធម្មតា
ទារកដែលកង្វះវីតាមីន D ច្រើនតែមានឆ្អឹងជើងកោងខុសធម្មតា។ ចំពោះឆ្អឹងកងខ្នងវិញ ក៏មិនលូតលាស់ត្រង់ដែរ ឬអាចកោងខ្លាងទៅវិញ។ នេះដោយសារតែការលូតលាស់របស់ឆ្អឹង ត្រូវបានរំខានដោយសារកង្វះវីតាមីន D។
ផតឆ្អឹងលលាដ៏ក្បាល
ឆ្អឹងលលាដ៏ក្បាលរបស់ក្មេង ចាបផ្តើមរឹងនៅពេលកើតបាន ១៩ ខែដំបូង ហើយបើសិនជាគេ មានជំងឺកង្វះវីតាមីន D វិញ នោះដំណើការនៃការរឹងនេះ នឹងយឺតទៅតាមគ្នាដែរ។ នៅពេលអ្នកប៉ះក្បាលរបស់គេ អ្នកអាចនឹងសម្គាល់ដឹងថា លលាដ៏ក្បាលគេ នៅតែទន់ខ្លាំងដដែល ឬអាចមានលក្ខណៈផតទៀតផង។
ឈឺ និងខ្សោយសាច់ដុំ
បើសិនជាអ្នកសម្គាល់ឃើញថា កូនកំពុងតែពិបាកវៀរ ឬអង្គុយ ក្នុងពេលវេលាដែលពួកគេ អាចធ្វើបានហើយនោះ វាអាចបណ្តាលមកពីការឈឺ ឬខ្សោយសាច់ដុំ ដែលបង្កឡើងដោយសារកង្វះវីតាមីន D។ និយាយរួមគេមិនអាចដើរទ្រទម្ងន់ខ្លួនឯងបាន។
ឧស្សាហ៍មានការបង្ករោគ
មានការសិក្សាច្រើនណាស់ បានភ្ជាប់ទំនាក់ទំនងគ្នា រវាងការកង្វះវីតាមីន D និងការឧស្សាហ៍មានការបង្ករោគម្តងហើយម្តងទៀត។ បើសិនជាគេឧស្សាហ៍ មានជំងឺផ្តាសាយ ចូរសុំគ្រូពេទ្យ ឲ្យថតកាំរស្មីអ៊ិចដើម្បីកំណត់ថាតើ កូនកង្វះវីតាមីន D ឬអត់។
ឃើញឆ្អឹងជំនីផុសចេញពីស្បែក
ដូចខ្ញុំបាននិយាយ ពីចំណុចដំបូងពីខាងលើអញ្ចឹងគឹថា ឆ្អឹងរបស់គេ អាចនឹងលូតលាស់ខុសធម្មតា ហើយវាក៏ជាសញ្ញាញឹកញាប់មួយ នៃជំងឺកង្វះវីតាមីន D។ ដូច្នេះ បើសិនជាអ្នករកឃើញថា មានឆ្អឹងជំនីទាំងផ្ទាំងៗ ផុសចេញពីស្បែកតែម្តងនោះ វាអាចជាអាការៈមួយហៅថា Rachitic Rosary ដែលបង្កឡើងដោយសារកង្វះជាតិកាល់ស្យូម។
ការលូតលាស់មានភាពយឺតយ៉ាវ
ក្នុងករណីកាន់តែធ្ងន់ធ្ងរនោះ កូនអាចនឹងពិបាកទទួល បានការលូតលាស់ខាងរាងកាយពេញលេញ ឬលឿនដូចក្មេងដទៃណាស់ ជាពិសេស ការក្រឡាប់ ឬលូនជាដើម ព្រោះពួកគេមិនអាចទ្រទម្ងន់ខ្លួនឯងបាននៅឡើយ ហើយដៃជើង អាចនឹងមានលក្ខណៈហើមទៀតផង៕
ត្រួតពិនិត្យដោយ៖ www.health.com.kh
© រក្សាសិទ្ធិដោយ thmeythmey.com