ពីនេះ ពីនោះ
រួមគ្នាកម្ចាត់សត្រូវរួម
×
កំណាព្យបទ ពាក្យ៨
ដោយ ប៉ាកកាខ្មៅ
-គ្រប់ក្រុមបក្សពួកកុំវក់វង្វេង
សូមឈប់ធ្វើលេងគួរជ្រែងជើងទប់
រួមគ្នាដោះស្រាយទាំងថ្ងៃទាំងយប់
កុំរារាំងទប់ងប់ប៉ែងជើងគ្នា។
-ស្រាយបញ្ហារាស្ត្របញ្ចៀសក្រីក្រ
សូមធ្វើរឿងល្អដើម្បីប្រជា
រឿងខ្វែងគំនិតគំនុំចងពៀរ
គួរនិយាយគ្នាទាំងស្របប្រឆាំង។
-គំនុំបុគ្គលគួរទុកដោយឡែក
ងាកមកជជែករឿងរាស្ត្រឲ្យខ្លាំង
ជួយអ្នកជនបទឲ្យមានកម្លាំង
នាំអ្នកភូមិច្បាំងនឹងភាពក្រីក្រ។
-អ្នកភូមិធូរធារគ្រប់គ្នាសប្បាយ
ព្រោះនយោបាយអ្នកដឹកនាំល្អ
រាស្ត្ររដ្ឋរស់បានព្រោះស្រូវអង្ករ
ជួយករសិករដូចជួយរដ្ឋា។
-រាស្ត្រព្រួយសន្ធឹកខ្វះទឹកធ្វើស្រែ
ដង្កូវហូរហែបំផ្លាញផ្លែផ្កា
ផលមិនបានល្អទាំងស្រែចម្ការ
បានស្បៀងឯណាមកស្តុកក្នុងឃ្លាំង?
-រួមគិតរួមធ្វើសើរើកំហុស
គួរឈប់បន្តុះបង្អាប់រារាំង
កម្ចាត់សត្រូវរួមជារនាំង
ក្រក្រីដែលរាំងមិនឲ្យស្រុកថ្កើង៕
© រក្សាសិទ្ធិដោយ thmeythmey.com