ជាតិ
អន្តោប្រវេសន៍ឃាត់ខ្លួនជនជាតិចិន និងវៀតណាម ២១នាក់ នៅ Sino Great Wall
× ភ្នំពេញ៖ នគរបាលអន្តោប្រវេសន៍បានចុះឆែកឆេររកឃើញជនអន្តោប្រវេសន៍ខុសច្បាប់ចំនួន ២១ ក្នុងចំណោមជនជាតិចិន និងវៀតណាមចំនួន ១៩០នាក់ កំពុងធ្វើការនៅការដ្ឋានសំណង់ ចិន Sino Great Wall ស្ថិតក្នុងសង្កាត់ទន្លេបាសាក់ ខណ្ឌចំការមន។
ប្រធាននាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍លោក អ៊ុក ហៃសីឡា សហការជាមួយកម្លាំងនគរបាលមូលដ្ឋាន និងតំណាងអយ្យការ បានបន្តប្រតិបត្តិការចុះឆែកឆេររកជនអន្តោប្រវេសន៍ធ្វើការ និងស្នាក់នៅខុសច្បាប់ ក្នុងប្រទេសកម្ពុជា នៅថ្ងៃទី១៦ ខែសីហា ឆ្នាំ២០១៦នេះ។
លោកបានប្រាប់ក្រោយពីការពិនិត្យឆែកឆេរ នៅថ្ងៃនេះថា សមត្ថកិច្ចបានឃាត់ខ្លួនកម្មករចិនចំនួន ២០នាក់ និងវៀតណាម១នាក់ គ្មានលិខិតឆ្លងដែនស្របច្បាប់ កំពុងធ្វើការនៅទីនោះ បញ្ជូនទៅនាយកដ្ឋានអន្តោប្រវេសន៍នៃក្រសួងមហាផ្ទៃ ដើម្បីពិន័យតាមច្បាប់។ ហើយថា នគរបាលអន្តោប្រវេសន៍បានប្រមូលលិខិតឆ្លងដែនចំនួន ៤៣៨លិខិត មកពិនិត្យ ដើម្បីធានាពីភាពស្របច្បាប់ការងារ ក្នុងប្រទេសកម្ពុជាដែរ។
«ពួកគេបានលួចឆ្លងដែន ស្នាក់នៅ និងធ្វើជាកម្មករសំណង់ខុសច្បាប់ ក្នុងការដ្ឋានសំណង់នេះចំនួន ២១នាក់ ចំណោមអន្តោប្រវេសន៍ ១៩០នាក់។ យើងចង់ឲ្យពួកគេទាំងកម្មករនិយោជិត និងនិយោជិកបរទេសគោរពច្បាប់កម្ពុជា»។ នេះជាការបញ្ជាក់របស់លោកឧត្តមសេនីយ៍ទោ អ៊ុក ហៃសីឡា។
ទន្ទឹមគ្នា លោកបានអំពាវនាវកម្មករនិយោជិត និងនិយោជកបរទេសទាំងអស់ត្រូវបំពេញសៀវភៅការងារ ស្របតាមច្បាប់អន្តោប្រវេសន៍ និងច្បាប់ការងារកម្ពុជា ជៀសវាងកុំឲ្យ ពួកគេខាតពេលវេលាធ្វើការងារ។
គួរជម្រាបដែរ គិតចាប់ពីឆ្នាំ២០១៤ រហូតដល់ខែសីហា ឆ្នាំ២០១៦នេះ អគ្គនាយកដ្ឋានអន្តោប្រវេសន៍ កម្ពុជាបានបណ្តេញជនអន្តោប្រវេសន៍ខុសច្បាប់ ៦៨សញ្ជាតិ ចំនួន ១០,៧៨៧នាក់ ក្នុងនោះ នារី១,៧០៤ នាក់។ ក្នុងចំណោមជនអន្តោប្រវេសន៍ខុសច្បាប់ជាង ១ ម៉ឺននាក់មានជនជាតិវៀតណាមចំនួន ៩២១៧ នាក់៕
Tag:
អន្តោប្រវេសន៍
ចិន
វៀតណាម
Sino Great Wall
© រក្សាសិទ្ធិដោយ thmeythmey.com