អន្តរជាតិ
ឡាវ សង្ឃឹម ថា អាច«រៀនសូត្រពីការគ្រប់គ្រងខេត្ត ក្រុង»ពីវៀតណាម អនុប្រធានសភាជាតិឡាវ(ខាងឆ្វេង) និងប្រធានសភាជាតិវៀតណាម(ខាងស្តាំ) (រូបភាព៖ VNS)
× សភាជាតិវៀតណាម និងឡាវ បានបង្ហាញការសង្ឃឹមរវាងគ្នាទៅវិញទៅមក ក្នុងការបង្កើនកិច្ចសហប្រតិបត្តិការ និងការផ្លាស់ប្តូរបទពិសោធន៍ ដើម្បីធ្វើឲ្យចំណងរវាងប្រទេស បក្សកុម្មុយនីស្ត ក៏ដូចជាប្រជាជននៃប្រទេសទាំងពីរកាន់តែជិតស្និទ្ធនឹងគ្នា។
អនុប្រធានសភាជាតិឡាវ លោក Somphan Phengkhammy នៅថ្ងៃទី១៥ ខែសីហាម្សិលមិញ បានថ្លែងទៅកាន់ប្រធានសភាជាតិវៀតណាមលោកស្រី Nguyễn Thị Kim Ngân ថា «ឡាវមានបំណងក្នុងការរៀនសូត្រពី តួនាទី, តំណែង, ការអនុវត្តតួនាទី និងអំណាចនៃក្រុមប្រឹក្សាខេត្ត និងក្រុងពីវៀតណាម»។ ការអះអាងបែបនេះ ត្រូវបានធ្វើឡើងនាឱកាសដែលលោកបំពេញទស្សនកិច្ចទៅកាន់វៀតណាម។ នេះបើយោងតាមសារព័ត៌មាន Viet Nam News ។
តាមប្រភពព័ត៌មានដដែល លោកអនុប្រធានសភាជាតិឡាវ ក៏បានបន្ថែមដែរថា សភាជាតិឡាវ ក៏សង្ឃឹមដែរថាខ្លួននឹងអាចសហការជាមួយវៀតណាមក្នុងការរៀបចំសិក្ខាសាលាមួយដើម្បីចែករំលែកបទពិសោធន៍ពាក់ព័ន្ធការគ្រប់គ្រង និងឃ្លាំមើលបំណុលសាធារណៈផងដែរ។
ក្នុងដំណើរទស្សនកិច្ចនោះ លោកអនុប្រធានសភាជាតិឡាវ ក៏បានចូលសម្តែងការគួរសមជាមួយនឹងប្រធានាធិបតីថ្មីវៀតណាមលោក Trần Đại Quang ផងដែរ។ ហើយនាជំនួបនោះ លោក Trần Đại Quang ក៏បានប្រាប់លោក Somphan Phengkhammy ថា ទាំងបក្ស រដ្ឋ និងប្រជាជនវៀតណាម តែងតែផ្តល់អាទិភាពដំបូង ក្នុងការពង្រឹងមិត្តភាពជាមួយនឹងឡាវ។ លោកប្រធានាធិបតីវៀតណាមរូបនោះ ក៏បានបញ្ជាក់ដែរថា វៀតណាម ចាត់ទុកទំនាក់ទំនងរវាងវៀតណាមជាមួយនឹងឡាវ គឺគ្មានអ្វីអាចប្រៀបផ្ទឹមបានឡើយ។
សូមជម្រាបផងដែរថា ទាំងឡាវ និងវៀតណាម ដែលសុទ្ធសឹងតែធា្លប់ត្រូវបានគ្រប់គ្រងដោយម្ចាស់អាណានិគមបារាំង និងប្រកាន់យករបបដឹកនាំកុម្មុយនីស្តបក្សតែមួយ ក៏ទើបតែជ្រើសរើសមេដឹកនាំថ្មីកាលពីពេលថ្មីៗនេះដូចគ្នាផងដែរ។ ឡាវ បានជ្រើសរើសលោក Bounnhang Vorachith ជាប្រធានាធិបតីថ្មី ខណៈ លោក Trần Đại Quang ត្រូវបានជ្រើសរើសជាប្រធានាធីបតីវៀតណាម៕
© រក្សាសិទ្ធិដោយ thmeythmey.com