គជប ប្រកាសដំណើរការចុះឈ្មោះបោះឆ្នោតតាមប្រព័ន្ធកុំព្យូទ័រនៅថ្ងៃនេះ

ជាតិ

គជប ប្រកាសដំណើរការចុះឈ្មោះបោះឆ្នោតតាមប្រព័ន្ធកុំព្យូទ័រនៅថ្ងៃនេះ

18, Aug 2016 , 9:19 am

រូបភាព

ដោយ: ម៉ៅ សុផា

ភ្នំពេញ៖ គណៈកម្មាធិការជាតិរៀបចំការបោះឆ្នោត (គជប) នឹងរៀបចំពិធីប្រកាសដាក់ឲ្យដំណើរការជាផ្លូវការនូវការចុះឈ្មោះបោះឆ្នោតតាមប្រព័ន្ធកុំព្យូទ័រ ឆ្នាំ២០១៦ និងកិច្ចសហប្រតិបត្តិការ រវាងគជប ជាមួយសហភាពអឺរ៉ុប និងជប៉ុន។ ពិធីនេះ នឹងប្រព្រឹត្តទៅនៅម៉ោង៣រសៀល នាថ្ងៃទី១៨ ខែសីហា ឆ្នាំ២០១៦នេះ នៅសណ្ឋាគារ អ៊ឹមភើរៀល។ នេះបើតាម សេចក្តីជូនដំណឹងរបស់គជប។

លោក ហង្ស ពុទ្ធា អ្នកនាំពាក្យរបស់គជប បានលើកឡើងថា គជបនឹងបែងចែកកំព្យូទ័រទៅកាន់មន្ត្រីបោះឆ្នោត នៅតាមឃុំ-សង្កាត់ នាពេលខាងមុខនេះ។ លោក បន្ថែមថា គជបបានរៀបចំផែនការ៣ជំហាន ក្នុងការចែកចាយ កំព្យូទ័រទៅថា្នក់មូលដ្ឋាន។

អ្នកនាំពាក្យរូបនេះ ពន្យល់លម្អិតថា ជំហានដំបូង គឺត្រូវបញ្ចូលនិងដំឡើង កម្មវិធី (Install Program) ជាមុនសិន។ បន្ទាប់ពីដំឡើងកម្មវិធីរួចហើយ គជប នឹងបញ្ជូនកំព្យូទ័រទៅឲ្យគ្រូបណ្តុះបណ្តាល ហើយចុងក្រោយ គ្រូបណ្តុះបណ្តាល ត្រូវចុះទៅបង្រៀនមន្ត្រីនៅតាមមូលដ្ឋាន ព្រមទាំងប្រគល់កំព្យូទ័រទាំងនោះឲ្យពួកគេប្រើប្រាស់តែម្តង។

ទាក់ទងនឹងបញ្ហាខាងលើ សហភាពអឺរ៉ុប បានប្រគល់កំព្យូទ័រចំនួន២៦០០គ្រឿង ដែលម៉ាកអេចភី (HP) ដល់គជប ដោយក្នុងនោះ កំព្យូរយួរដៃ (laptop) មានចំនួន ២៤០០គ្រឿង ហើយកំព្យូរលើតុ (Desktop) មានចំនួន២០០គ្រឿង។ ក្រៅពីកំព្យូទ័រ សហភាពអឺរ៉ុប ក៏បានផ្តល់សម្ភារជាច្រើនទៀត ដល់គជប ផងដែរ ដូចជា កាមេរ៉ាសុវត្ថិភាព (Security Camera), ម៉ាស៊ីនព្រីន (Printer), ទឹកខ្មៅ, ឧបករណ៍ផ្ទុកភ្លើង (Power Bank), ឧបករណ៍ផ្ទុកឯកសារ (Flash) និងឧបករណ៍ស្កេនមេដៃ ជាដើម។ បើតាមការអះអាងរបស់លោក ហង្ស ពុទ្ធា កំព្យូទ័រ រួមទាំងសម្ភារបច្ចេកទេសទាំងអស់ ដែលសហភាពអឺរ៉ុបផ្តល់ឲ្យគ.ជ.ប មានតម្លៃប្រមាណជា៧លានដុលា្លរ។

សូមបញ្ជាក់ថា គ.ជ.ប បានត្រៀមថវិកាចំនួន២៣លានដុល្លារផងដែរ ដើម្បីចាយវាយក្នុងអំឡុងពេលនៃការចុះឈ្មោះបោះឆ្នោតថ្នាក់ឃុំ-សង្កាត់ នាឆ្នាំ២០១៧ ខាងមុខ។ រហូតមកដល់ពេលនេះ គ.ជ.ប បានចេញសេចក្តីជូនដំណឹងជាផ្លូវការហើយ ជុំវិញកាលបរិច្ឆេទនៃការចុះឈ្មោះបោះឆ្នោត។ យោងតាមសេចក្តីជូនដំណឹងនោះ គ.ជ.ប នឹងចាប់ផ្តើមចុះឈ្មោះបោះឆ្នោត នៅថ្ងៃទី១ កញ្ញា ឆ្នាំ២០១៦ តទៅ៕