អន្តរជាតិ
នយោបាយអន្តរជាតិ
រូបភាពកុមារម្នាក់របួសក្នុងសង្គ្រាមស៊ីរីធ្វើឲ្យពិភពលោកតក់ស្លុតខ្លាំង រូបភាព៖ Aleppo Media Center
× រូបភាពកុមារជនជាតិស៊ីរីវ័យ៥ឆ្នាំម្នាក់ដែលរាងកាយដិតដាមដោយឈាមនិងរបួសភ្នែកផងនោះបានធ្វើឲ្យពិភពលោកសោកសង្រេងនិងមនុស្សផងទាំងពួងតក់ស្លុត និងអាណិតខ្លោចចិត្ត។ គេដឹងច្បាស់ថាកុមារម្នាក់នេះជាជនរងគ្រោះម្នាក់ក្នុងចំណោមជនរងគ្រោះរាប់លាននាក់ផ្សេងទៀតដែលកំពុងបាត់បង់ជំរក ព្រាត់ប្រាសបងប្អូននិងប្រឈមការបាត់បង់ជីវិតដោយសង្គ្រាមរ៉ាំរ៉ៃជាង៥ឆ្នាំមកនេះ។
បន្ទាប់ពីភ្ញាក់ផ្អើលដោយសារ
រូបភាពក្មេងតូចជាជនភៀសខ្លួនម្នាក់ដែល ស្លាប់ដោយសារលង់ទឹកនៅលើឆ្នេរនៅប្រទេសក្រិក ថ្មីៗនេះទៀតគេបានឃើញមានការចែកចាយបន្តគ្នានូវរូបភាពគួរឲ្យខ្លោចចិត្តដែលរបស់ក្មេងជនជាតិស៊ីរីម្នាក់ទៀត។ ក្មេងនោះមានដិតដាមដោយឈាម និងរងរបួសភ្នែកដោយសារការទម្លាក់គ្រាប់បែកលើទីក្រុងក្រុមឧទ្ទាមនៅទីក្រុង Aleppo ហើយត្រូវបានគេជួយសង្គ្រោះ។
យោងតាមរូបភាពដែលចែកចាយដំបូងដោយ អង្គការ Aleppo Media Center ក្មេងប្រុសនេះមានឈ្មោះថា Omran Daqneesh មានវ័យ ៥ឆ្នាំ។ គេរស់នៅតំបន់ដែលស្ថិតក្រោមការកាន់កាប់របស់ក្រុមឧទ្ទាមនៅក្រុង Aleppo ។ ក្មេងម្នាក់នេះត្រូវបានគេជួយសង្គ្រោះពីក្រោមគំនរអាគារដែលបែកបាក់ក្រោយការទម្លាក់គ្រាប់ ហើយគេក៏បានទទួលការព្យាបាលក្បាលនិងភ្នែកដែលរងរបួសផងដែរ។
បើយោងតាម Aleppo Media Center នៅថ្ងៃព្រហស្បតិ៍ទី ១៨ សីហា មានក្មេងៗរងរបួសដោយសារការវាយប្រហារផ្លូវអាកាសប្រហែល ១២នាក់ ហើយពួកគេភាគច្រើនមានអាយុក្រោម ១៥ឆ្នាំ។
តាមពិតទៅ រូបភាពរបស់ក្មេងដ៏គួរឲ្យសង្វេគនេះបានអង្រួនចិត្តមនុស្សជាតិលើពិភពលោក ហើយក៏ទាញឲ្យពិភពលោកចាប់អារម្មណ៍ចំពោះសង្គ្រាមបង្ហូរឈាមនៅស៊ីរីរយៈពេល ៥ឆ្នាំនេះដែរ។ ហើយគេក៏ឃើញមានការដង្ហោយសុំឲ្យភាគីពាក់ព័ន្ធជាពិសេសមហាអំណាចធំៗមានរុស្ស៊ី និងអាមេរិកដែលបានគាំទ្រភាគីជម្លោះនោះ ជួយបញ្ចប់សង្គ្រាមនេះឲ្យបានឆាប់។ គេមិនអាចបន្តព្រងើយកន្តើយបណ្តោយឲ្យសង្គ្រាមបង្ហូរឈាមដណ្តើមអំណាចនេះ បន្តឆក់យកជីវិតមនុស្សប្រជាជនស្លូតត្រង់ជាពិសេសកុមារបែបនេះឡើយ។ សង្គ្រាមនេះ គួរដល់ពេលដែលត្រូវចប់ហើយ ប្រជាជនស៊ីរីឆ្អែតឆ្អន់នឹងសង្គ្រាមហើយ។
សូមបញ្ជាក់ថា សង្គ្រាមស៊ីវិលនៅស៊ីរីចាប់ផ្តើមឡើងនៅក្នុងឆ្នាំ ២០១១ ក្រោយចលនាប្រឆាំងរដ្ឋាភិបាលកើតឡើងផុសផុលដើម្បីទាមទារផ្តួលរលំរបបដឹកនាំលោក បាសា អាល់អាសាដ។ តែសង្គ្រាមនេះបន្តអូសបន្លាយរហូតមក ដោយសារគ្មានភាគីណាមួយអាចឈ្នះសង្គ្រាមដាច់ណាត់ ហើយមកទល់ពេលនេះសង្គ្រាមស៊ីរីនេះបានឆក់យកជីវិតមនុស្សប្រហែលជាង ៤សែននាក់ និងបណ្តាលឲ្យមនុស្សជាង៧លាននាក់ផ្សេងទៀតបាត់បង់ជំរកនិងរត់ភៀសខ្លួន៕
© រក្សាសិទ្ធិដោយ thmeythmey.com