ជាតិ
មេអន្តោប្រវេសន៍ថា គ្មានហេតុផលលាក់បាំងចំនួនជនអន្តោប្រវេសន៍វៀតណាម
× ភ្នំពេញ៖ លោក សុខ ផល បានថ្លែងការពារពីសុក្រឹតភាពនៃរបាយការណ៍ជំរឿនរបស់អគ្គនាយកដ្ឋានអន្តោប្រវេសន៍ដែលបង្ហាញថា កម្ពុជាមានជនអន្តោប្រវេសន៍វៀតណាមតែជាង ១៦ ម៉ឺននាក់ ដែលមិនដូចនឹងការចោទប្រកាន់កន្លងមកថា ចំនួនជនជាតិវៀតណាមនៅកម្ពុជាមានរាប់លាននាក់ឡើយ។ អគ្គនាយក នៃអគ្គនាយកដ្ឋានអន្តោប្រវេសន៍ក្រសួងមហាផ្ទៃរូបនេះ អះអាង នៅថ្ងៃទី១៩ សីហា ថា អាជ្ញាធរគ្មានប្រយោជន៍អ្វី ដែលត្រូវលាក់បាំងចំនួនជនអន្តោប្រវេសន៍ ជាពិសេសអន្តោប្រវេសន៍វៀតណាមនៅកម្ពុជាឡើយ។
សូមស្តាប់សំឡេងលោក សុខ ផល ឆ្លើយតបនឹងអ្នកសារព័ត៌មាន ក្រោយកិច្ចប្រជុំ ផ្សព្វផ្សាយរបាយការណ៍បូកសរុបជំហានដំបូង ស្តីពីការអនុវត្តបន្តការងារគ្រប់គ្រងជនអន្តោប្រវេសន៍ក្នុងប្រទេសកម្ពុជាក្រសួងមហាផ្ទៃ៖
សូមបញ្ជាក់ថា អគ្គនាយកដ្ឋានអន្តោប្រវេសន៍នៃក្រសួងមហាផ្ទៃបានបង្ហាញរបាយការណ៍ដែលខ្លួនរកឃើញថា បច្ចុប្បន្នជនអន្តោប្រវេសន៍ចំនួន ២៥ សញ្ជាតិ ដែលកំពុងរស់នៅក្នុងប្រទេសកម្ពុជា មានចំនួនសរុប ១៦០ ៨៧២ នាក់ ដោយក្នុងនោះមានជនជាតិតិវៀតណាម ៩៩.៤៩ ភាគរយស្មើនឹង១៦០,០១៥ នាក់។ របាយការណ៍អន្តោប្រវេសន៍ដដែលនោះ បានបញ្ជាក់ថា ជនអន្តោប្រវេសន៍ដែលរស់នៅច្រើនជាងគេនៅរាជធានីភ្នំពេញ មានចំនួន ១៦,៨៦០ គ្រួសារ មានមនុស្សចំនួន ៥៤,៨០១ នាក់, នៅខេត្តកណ្តាលមានចំនួន ៦,៩៦៨ គ្រួសារមានមនុស្ស ២៦,៧២៤ នាក់, នៅខេត្តកំពង់ឆ្នាំមានចំនួន ៤,៦៧២ គ្រួសារ មានមនុស្ស ២០,៣៤១ នាក់ ខេត្តព្រៃវែងចំនួន ៤,៣៥៧ គ្រួសារ មានមនុស្ស ១៦,៣២៣ នាក់៕
Tag:
សុខ ផល
អន្តោប្រវេសន៍
មហាផ្ទៃ
© រក្សាសិទ្ធិដោយ thmeythmey.com