ជាតិ
អាជ្ញាធរខេត្តព្រះសីហនុ ចាត់វិធានការមិនឲ្យពលរដ្ឋធ្វើដំណើរលើផ្ទៃសមុទ្រឡើយ
× ភ្នំពេញ៖ ស្នងការដ្ឋាននគរបាលខេត្តព្រះសីហនុ នៃអគ្គស្នងការដ្ឋាននគរបាលជាតិ ចាត់វិធានការពង្រឹង និងបង្ការ ទប់ស្កាត់គ្រោះថ្នាក់ផ្សេងៗ ដែលអាចកើតមាននៅលើផ្ទៃសមុទ្រ តំបន់ឆ្នេរ និងតាមបណ្ដាកោះ ដោយមិនឲ្យម្ចាស់អាជីវកម្ម និងភ្ញៀវទេសចរ ធ្វើដំណើរនៅលើផ្ទៃសមុទ្រឡើយ។ ក្រសួងធនធានទឹក និងឧតុនិយមបានចេញលិខិតផ្សព្វផ្សាយ ពីស្ថានភាពព្យុះ ទី៧ ឈ្មោះ ដៀនមុ ចាប់ពីថ្ងៃទី២០ ដល់ថ្ងៃទី២៥ខែសីហានេះ។
ក្រោយពីពិនិត្យលើស្ថានភាពភូមិសាស្ត្រជាក់ស្ដែង ស្នងការដ្ឋាននគរបាលខេត្តព្រះសីហនុ អំពាវនាវពលរដ្ឋដែលរស់នៅជាប់តំបន់ឆ្នេរសមុទ្រ ទាំងអ្នកប្រកបអាជីវកម្ម មុខរបរនេសាទខ្នាតតូច ខ្នាតធំ ត្រូវផ្អាកអាជីកម្មនិងការធ្វើដំណើរលើផ្ទៃសមុទ្រ ជាបណ្ដោះអាសន្ន ដោយរង់ចាំអាកាសធាតុវិលមករកភាពដើមវិញ។ ចំណែកម្ចាស់អាជីវកម្មជួលយានយន្ត ដឹកភ្ញៀវទេសចរណ៍ ត្រូវយកចិត្តទុកដាក់ឲ្យបានខ្ពស់ពីបញ្ហាអាកាសធាតុ លើផ្ទៃសមុទ្រ ត្រួតពិនិត្យលក្ខណៈបច្ចេកទេស មិនផ្ទុកលើសចំណុះ ហើយក្នុងករណីមានខ្យល់បកកន្ទ្រាក់ ត្រូវផ្អាកការចេញដំណើរជាបណ្ដោះអាសន្ន។
ដោយឡែកម្ចាស់អាជីវកម្មតាមឆ្នេរសមុទ្រ និងតាមបណ្ដាកោះ ត្រូវចូលរួមសហការជាមួយកម្លាំងសមត្ថកិច្ច និងជួយផ្សព្វផ្សាយណែនាំ ពន្យល់ទៅភ្ញៀវទេសចរ ដែលមកទៅលេងកម្សាន្តដើម្បីបង្កើនការប្រុងប្រយ័ត្ន ជៀសវាងការកើតមានបញ្ហា។
គួរបញ្ជាក់ថាកាលពីថ្ងៃ១៩ ម្សិលមិញ មានករណីឧបទ្ទហេតុសមុទ្រកួច នៅឆ្នេរខេត្តព្រះសីហនុដែលបណ្ដាលឲ្យមានអ្នកទេសចរដែលទៅកម្សាន្តមានគ្រោះថ្នាក់លងទឹក រហូតដល់បាត់បង់ជីវិត៕
© រក្សាសិទ្ធិដោយ thmeythmey.com