កីឡាអន្តរជាតិ
អន្តរជាតិ
RIO៖ ថៃ ឥណ្ឌូនេស៊ី វៀតណាម សិង្ហបុរី ម៉ាឡេស៊ី និងហ្វីលីពីន សុទ្ធតែឈ្នះមេដាយ
× ក្នុងចំណោមសមាជិកអាស៊ានទាំង១០ ប្រទេសចំនួន៦ស្ថិតក្នុងចំណោមបញ្ជីប្រទេសដែលទទួលបានមេដាយពីការប្រកួតក្នុងព្រឹត្តិការណ៍កីឡាអូឡាំពិកឆ្នាំ២០១៦ នៅទីក្រុង Rio de Janeiro ប្រទេសប្រេស៊ីល ដែលទើបនឹងបញ្ចប់កាលពីថ្ងៃអាទិត្យ ទី២១ ខែសីហា ខណៈប្រទេសចំនួន៤ទៀត បានត្រឹមតែទទួលបទពិសោធន៍ និងបំបែកកំណត់ត្រាខ្លួនប៉ុណ្ណោះ។
សម្រាប់តំបន់អាស៊ាន ថៃជាប្រទេសដែលលេចធ្លោជាងគេនៅក្នុងព្រឹត្តិការណ៍កីឡាអូឡាំពិក ពួកគេទទួលបានមេដាយមាស២ ប្រាក់២ និងសំរឹទ្ធ២ ។ មេដាយមាសទាំងពីររបស់ថៃ មកពីវិញ្ញាសាលើកទម្ងន់ ដែលរកបានដោយកីឡាការិនី Sukanya Srisura និងកីឡាការិនី Sopita Tansan។ កីឡាលើកទម្ងន់របស់ថៃ រកបានប្រាក់១ និងសំរឹទ្ធ១ទៀតផងដែរ ខណៈកីឡាតេក្វាន់ដូ រួមចំណែកបានមេដាយប្រាក់១ និងសំរឹទ្ធ១ ។
ឥណ្ឌូនេស៊ី រកបានមាស១ និងប្រាក់២។ មេដាយមាសរបស់ឥណ្ឌូនេស៊ី សម្រេចបាននៅលើវិញ្ញាសាវាយសីចម្រុះ ដែលមានកីឡាករ Tontowi Ahmad និងកីឡាការិនី Liliyana Natsir។ សម្រាប់មេដាយប្រាក់ទាំង២ ឥណ្ឌូនេស៊ី រកបានក្នុងប្រភេទកីឡាលើកទម្ងន់។
វៀតណាម បង្ហាញភាពខ្លាំងរបស់ខ្លួនលើវិញ្ញាសាបាញ់កាំភ្លើង ដោយកីឡាករ Hoang Xuan Vinh តែម្នាក់ឯង បានក្លាយជាវិរបុរសប្រចាំប្រទេសតាមរយៈការឈ្នះមេដាយមាស១ និងប្រាក់១ ។
រីឯសិង្ហបុរី កីឡាករហែលទឹក Joseph Schooling បានឈ្នះមេដាយមាសអូឡាំពិកជាលើកដំបូងសម្រាប់ប្រទេសដ៏តូចមួយនេះ។
ចំណែកម៉ាឡេស៊ី ពួកគេឈ្នះមេដាយប្រាក់៤ និងសំរឹទ្ធ១ ។ កីឡាវាយសី រកបានមេដាយប្រាក់ចំនួន៣ កីឡាលោតទឹក Diving រកបានមេដាយប្រាក់១ ខណៈកីឡាប្រណាំងកង់ រកបានមេដាយសំរឹទ្ធ១ សម្រាប់ម៉ាឡេស៊ី។
ហ្វីលីពីន មានឈ្មោះក្នុងបញ្ជីប្រទេសដែលទទួលបានមេដាយអូឡាំពិក ដោយសារកីឡាការិនី Hidilyn Diaz បានមេដាយប្រាក់លើវិញ្ញាសាលើកទម្ងន់។
សមាជិកប្រទេសអាស៊ានផ្សេងទៀត រួមមាន កម្ពុជា ឡាវ មីយ៉ាន់ម៉ា និងព្រុយណេ មិនបានឈ្នះមេដាយណាមួយឡើយ។ សម្រាប់កម្ពុជា កីឡាការិនីហែលទឹក ហែម ថុនវិទិនី បានបំបែកកំណត់ត្រាចាស់របស់ខ្លួន ខណៈអត្តពលិកម៉ារ៉ាតុន កីឡាការិនី លី ណារី និងកីឡាករ Neko ទទួលបាននូវការកោតសរសើដោយសារតែពួកគេប្រឹងប្រែងរហូតរត់ទៅដល់ទី។
ព្រឹត្តិការណ៍កីឡាអូឡាំពិកទីក្រុង Rio ដែលប្រព្រឹត្តទៅពីថ្ងៃ៥ ដល់ថ្ងៃទី២១ ខែសីហា ឆ្នាំ២០១៦ មានអត្តពលិកជាង១ម៉ឺននាក់ មកពី២០៧ប្រទេស ដែលប្រកួតលើវិញ្ញាសា៣០៦លើ២៨ប្រភេទកីឡា។
អាមេរិកឈ្នះមេដាយច្រើនជាងគេ (មាស៤៦ ប្រាក់៣៧ សំរឹទ្ធ៣៨) ដោយនាំមុខ ចក្រភពអង់គ្លេស ចិន រុស្ស៊ី អាល្លឺម៉ង់ ជប៉ុន បារាំង កូរ៉េខាងត្បូង អ៊ីតាលី និងអូស្ត្រាលី។ ម្ចាស់ផ្ទះប្រេស៊ីល ស្ថិតនៅលេខរៀងទី១៣ ដោយឈ្នះមេដាយមាស៧ ប្រាក់៦ និងសំរឹទ្ធ៦ ៕
© រក្សាសិទ្ធិដោយ thmeythmey.com