ជាតិ
ចំណុចសំខាន់ដែលច្បាប់បោះឆ្នោតថ្មី ហាមមិនឲ្យNGOs ធ្វើទាក់ទងនឹងការបោះឆ្នោត
×![]()
ដោយ: ថ្មីៗ
ច្បាប់បោះឆ្នោតជ្រើសតាំងតំណាងរាស្ត្រ ដែលបានចូលជាធរមានកាលពីចុងឆ្នាំ ២០១៥ កន្លងទៅ បានចែងពីចំណុចមួយចំនួន ដែលអង្គការក្រៅរដ្ឋាភិបាលជាតិ និងអន្តរជាតិ ត្រូវចៀសវាងធ្វើសកម្មភាពមួយចំនូនទាក់ទងនឹងការបោះឆ្នោតជ្រើសរើសតំណាងរាស្ត្រ។ 
មាត្រា ៨៥ នៃច្បាប់ស្តីពីការបោះឆ្នោតជ្រើសរើសតំណាងរាស្ត្រ បានកំណត់ថា អង្គការមិនរដ្ឋាភិបាល ឬសមាគម ក្នុងស្រុក និងសមាគម ឬអង្គការអន្តរជាតិ ដែលបំពេញការងារក្នុងព្រះរាជាណាចក្រកម្ពុជា ឬជនបរទេស ត្រូវប្រកាន់ជំហរអព្យាក្រឹតឥតលម្អៀងនៅក្នុងការបោះឆ្នោតជ្រើសតាំងតំណាងរាស្ត្រ។ អង្គការមិនមែនរដ្ឋាភិបាល ឬសមាគមក្នុងស្រុក និងសមាគម ឬអង្គការអន្តរជាតិដែលបំពេញការងារក្នុងព្រះរាជាណាចក្រកម្ពុជា មិនត្រូវធ្វើសកម្មភាពណាមួយ ទោះដោយផ្ទាល់ក្តី ឬដោយប្រយោលក្តី ដូចខាងក្រោម៖
ទី ១ ហាមមិនឲ្យផ្តួចផ្តើម ឬចូលរួមក្នុងការឃោសនាបោះឆ្នោតរបស់គណបក្សនយោបាយណាមួយ ឬបេក្ខជនណាម្នាក់។ ការផ្តួចផ្តើម ឬការចូលរួមឃោសនារួមមាន៖ ការបញ្ចុះបញ្ចូល ឬការប្រមូលផ្តុំប្រជាពលរដ្ឋឲ្យចូលរួមឃោសនា ដើម្បីគាំទ្រគណបក្សនយោបាយណាមួយ ឬបេក្ខជនណាម្នាក់។ ការចូលរួមក្នុងក្បួនដង្ហែ ឬការប្រជុំរបស់គណបក្សនយោបាយណាមួយ ឬបេក្ខជនណាម្នាក់។ ការចូលរួមផ្សព្វផ្សាយគោលនយោបាយ ឬសម្ភារឃោសនាបោះឆ្នោតរបស់គណបក្សនយោបាយណាមួយ ឬបេក្ខជនណាម្នាក់។ ការចូលជាសមាជិកគណៈកម្មការឃោសនាបោះឆ្នោតនៃគណបក្សនយោបាយណាមួយ។
ទី ២ ហាមមិនឲ្យចេញសេចក្តីថ្លែងការណ៍ ឬធ្វើសកម្មភាពណាមួយ ក្នុងគោលបំណងគាំទ្រ ឬបង្ហាញភាពលម្អៀងទៅរក ឬប្រឆាំងនឹងគណបក្សនយោបាយណាមួយ ឬបេក្ខជនណាម្នាក់។ ការចេញសេចក្តីថ្លែងការណ៍ ការធ្វើសកម្មភាពគាំទ្រ ឬការបង្ហាញភាពលម្អៀងរួមមាន៖ ការស្ទង់មតិក្នុងបំណងបម្រើឲ្យគណបក្សនយោបាយណាមួយ ឬបេក្ខជនណាម្នាក់។ ការសរសេរជាលាយលក្ខណ៍អក្ស ឬផ្តល់បទសម្ភាសន៍ដល់ប្រព័ន្ធផ្សព្វផ្សាយ ក្នុងន័យគាំទ្រគណបក្សនយោបាយណាមួយ ឬបេក្ខជនណាម្នាក់។ ការដាក់តាង ឬបិទផ្សាយរូបភាព ឬឯកសារផ្សេងៗ ភ្ជាប់នឹងយានយន្តរបស់អង្គការខ្លួនឬនៅក្នុងបរិវេណនៃទីកន្លែងធ្វើការរបស់ខ្លួន ដើម្បីគាំទ្រគណបក្សនយោបាយណាមួយ ឬបេក្ខជនណាម្នាក់។
ទី ៣ ហាមមិនឲ្យផ្តល់មធ្យោបាយជាថវិកា សម្ភារ បរិក្ខារ ធនជានមនុស្ស ឬមធ្យោបាយផ្សេងៗ ដើម្បីគាំទ្រគណបក្សនយោបាយណាមួយ ឬបេក្ខជនណាម្នាក់ ដែលរួមមាន៖ ការផ្តល់ថវិកា សម្ភារ និងបរិក្ខាប្រើប្រាស់ផ្សេងៗ ជូនប្រជាពលរដ្ឋ សម្រាប់ចូលរួមក្នុងសកម្មភាពឃោសនា ដើម្បីគាំទ្រគណបក្សនយោបាយណាមួយ ឬបេក្ខជនណាម្នាក់។ ការផ្តល់ថវិការ សម្ភារ និងបរិក្ខារ សម្រាប់ដង្ហែក្បួនឃោសនា ការជួបជុំសាធារណៈ ការសម្តែងសិល្បៈ និងការបោះពុម្ពសម្ភារឃោសនា ទោះដោយផ្ទាល់ក្តីឬប្រយោលក្តី ដើម្បីគាំទ្រគណបក្សនយោបាយណាមួយ ឬបេក្ខជនណាម្នាក់៕
Tag:
បោះឆ្នោតកម្ពុជា
ច្បាប់
© រក្សាសិទ្ធិដោយ thmeythmey.com
