អន្តរជាតិ
ក្មេងនីហ្សេរីយ៉ាជិត៥ម៉ឺននាក់អាចនឹងស្លាប់បើគ្មាន ជំនួយមនុស្សធម៌
×
អង្គការ UNICEF បានអះអាងថា គ្រោះរាំងស្ងួតនិងចលនាក្រុមប្រដាប់អាវុធ បូកូហារ៉ាម (Boko Haram) បានបណ្តាល់ឲ្យក្មេងៗនៅជាប់បឹង Chad ជិតកន្លះលាននាក់រងគ្រោះថ្នាក់ដោយសារកង្វះអាហាររូបត្ថម្ភធ្ងន់ធ្ងរ។ ហើយ ក្នុងចំណោមនោះ ក្មេងៗនីហ្សេរីយ៉ារហូតដល់៤៩០០០នាក់អាចស្លាប់ក្នុងឆ្នាំនេះ បើសិនជាពួកគេមិនបានទទួលជំនួយមនុស្សធម៌និងការព្យាបាលទាន់ពេលវេលាទេនោះ។
ក្មេងៗប្រហែលជិតកន្លះលាននាក់រស់នៅតំបន់បឹង Chad ប្រឈមមុខគ្រោះថ្នាក់ធ្ងន់ធ្ងរដោយសារការអត់ឃ្លាននិងកង្វះអាហាររូបត្ថម្ភ។ យោងតាមអង្គការ UNICEF ក្នុងចំណោមក្មេងទាំងនោះ មានក្មេងប្រហែល ៤៩០០០នាក់ នៅរដ្ឋ Borno នៃប្រទេសនីហ្សេរីយ៉ា អាចនឹងស្លាប់បាត់បង់ជីវិតដោយសារកង្វះអាហាររូបត្ថម្ភនៅក្នុងឆ្នាំនេះ បើសិនជាគ្មានការផ្តល់ជំនួយមនុស្សធម៌ទាន់ពេលទេនោះ ។ អង្គការនេះក៏បានដង្ហោយយ៉ាងទទូចសុំឲ្យសហគមន៍អន្តរជាតិជួយដោះស្រាយបញ្ហានេះផង។
យោងតាមទីភ្នាក់ងារព័ត៌មាន AFP ក្មេងៗទាំងអស់ខាងលើប្រឈមគ្រោះថ្នាក់ ដោយសារបញ្ហាធំពីរ ក្នុងនោះមានគ្រោះរាំងស្ងួតដែលអូសបន្លាយពេលយូរ និងចលនាប្រដាប់អាវុធរបស់ក្រុមភេរវជន Boko Haram ផងដែរ។ ខាងអង្គការ UNICEF បានវាយតម្លៃថា ដើម្បីសង្គ្រោះកុមារទាំង ៤៩០០០នាក់ដែលអាចនឹងស្លាប់នោះ គេត្រូវការជំនួយដែលមានទំហំ ៣០៨ លានដុល្លារអាមេរិកឯណោះ។ ជំនួយទាំងនោះនឹងត្រូវប្រើប្រាស់ដើម្បីជួយដល់ប្រជាជនដែលរងគ្រោះថ្នាក់នៅក្នុងប្រទេសបួន ក្នុងនោះមាន ឆាត, នីហ្សេរីយ៉ា, នីហ្សេ និងកាមេរ៉ូន។
ប៉ុន្តែរឿងដែលគួរឲ្យព្រួយបារម្ភបំផុតគឺមកទល់ពេលបច្ចុប្បន្ន អង្គការ UNICEF បានទទួលជំនួយត្រឹម ៤១លានដុល្លារ ដែលស្មើ ១៣ភាគរយនៃទំហំលុយដែលគេត្រូវការប៉ុណ្ណោះ។ ដូច្នេះហើយ វាជាគ្រោះមហន្តរាយធ្ងន់ធ្ងរ បើសិនជាមិនមានការផ្តល់ជំនួយមនុស្សធម៌ ទាំងស្បៀងអាហារនិងការព្យាបាលទាន់ពេលវេលាទេនោះ។
ដោយសារការប្រយុទ្ធគ្នានិងការវាយប្រហារពីសំណាក់ក្រុមប្រដាប់អាវុធបូកូហារ៉ាម មន្ទីរពេទ្យនិងគ្លីនិកប្រហែល ២ភាគ ៣ ហើយ៣ភាគ៤នៃប្រព័ន្ធទឹកនិងបង្គន់អនាម័យជាដើមនោះត្រូវបានបំផ្លិចបំផ្លាញអស់។
តាមពិតទៅ នៅដើមឆ្នាំ ២០១៥ ក្រុមភេរវជនបូកូហារ៉ាម បានកាន់កាប់ទឹកដីដ៏ធំនៅតំបន់ខាងលើ ប៉ុន្តែចាប់តាំងពីពេលនោះមកក្រុមកងទ័ពប្រទេសទាំងបួនខាងលើបានចាប់ផ្តើមវាយប្រហារលើក្រុមសកម្មប្រយុទ្ធនេះ។តែក្រុមនេះបានចាប់ផ្តើមសកម្មភាពតាំងពីឆ្នាំ ២០០៩ មកម្ល៉េះ ហើយបើគិតមកដល់ពេលបច្ចុប្បន្នក្រុមនេះសម្លាប់មនុស្សរហូតដល់ ១៥០០០នាក់ឯណោះ។ ដោយសារការវាយប្រហារពីសំណាក់ក្រុមកងកម្លាំងរដ្ឋាភិបាល មកដល់ពេលនេះ ក្រុមសកម្មប្រយុទ្ធបូកូហារ៉ាមដកថយនិងកំពុងលាក់ខ្លួនក្នុងព្រៃ Sambisa ដែលស្ថិតនៅភាគអាគ្នេយ៍រដ្ឋ Borno។
ប៉ុន្តែ ថ្វីបើកងកម្លាំងរដ្ឋាភិបាលមានប្រៀបនិងបានវាយបណ្តេញក្រុមប្រដាប់អាវុធបូកូហារ៉ាមឲ្យដកថយក៏ដោយ មនុស្សប្រហែល ២លាននាក់នៅបន្តរស់នៅតំបន់ដែលស្ថិតក្រោមការគ្រប់គ្រងរបស់ក្រុមបូកូហារ៉ាមនេះ៕
Tag:
Boko Haram
នីហ្សេរីយ៉ា
UNICEF
© រក្សាសិទ្ធិដោយ thmeythmey.com