ជាតិ
UC រៀបចំវេទិកានៃភាពជោគជ័យ ក្នុងការចែករំលែកគន្លឹះ និងចំណេះដឹង
× ភ្នំពេញ៖ សាកលវិទ្យាល័យកម្ពុជា បានរៀបចំវេទិកាដើម្បីភាពជោគជ័យស្ដីពី «ការអប់រំ ជំនាញ និងការងារ» ។ វេទិកានេះ ប្រព្រឹត្តទៅមានរយៈពេល៥ថ្ងៃ ចាប់ពីថ្ងៃទី ២៩ សីហា ដល់ថ្ងៃទី០២ កញ្ញា ឆ្នាំ២០១៦ នៅសាកលវិទ្យាល័យកម្ពុជា វេលាម៉ោង៨ព្រឹក ដល់ម៉ោង៦ល្ងាច ។ វេទិកានេះ ចូលរួមដោយឥតគិតថ្លៃ។
វេទិកានៃភាពជោគជ័យនេះ សំដៅទៅលើកម្មវិធីមួយ ដែលជួយឲ្យសាធារណជន ជាពិសេសយុវជន សិស្សនិស្សិត បានយល់ដឹងនិងបណ្ដុះការចាប់អារម្មណ៍ទៅលើភាពជោគជ័យក្នុងវិស័យអប់រំ ជំនាញ និងការងារ។ វេទិកានេះ បើកជាសាធារណៈ និងឥតគិតថ្លៃសម្រាប់អ្នកសិក្សាអំពីជំនាញវិជ្ជាជីវៈ ក៏ដូចជាសិស្សនិស្សិត ដែលជាអ្នកដែលមានចំណាប់អារម្មណ៍ ក្នុងការស្វែងរកនូវភាពជោគជ័យក្នុងការសិក្សា ជំនាញ ក័ដូចជាឪកាសការងារផ្សេងៗ។
វាគ្មិនក្នុងវេទិកានេះ សុទ្ធសឹងតែជាអ្នកជំនាញដែលននឹងចែករំលែកគន្លឹះដែលឆ្ពោះទៅកាន់ភាពជោគជ័យ ហើយថែមទាំងចែករំលែកនូវ ការយល់ដឹងបន្ថែមសម្រាប់សិស្សានុសិស្ស ថ្នាក់ទី១២ អំពីមុខជំនាញដែលពួកគេគួរតែជ្រើសរើសយកមកសិក្សា ដើម្បីតម្រង់ជំនាញរបស់ពួកគេ និងដើម្បីត្រៀមខ្លួនឲ្យរួចស្រេចសម្រាប់ការងារនៅថ្ងៃអនាគត។
ជាមួយគ្នានេះ វាគ្មិនសំខាន់ៗដែលជាអ្នកជំនាញ និងសហគ្រិន នឹងចែករំលែកគន្លឹះសំខាន់ៗដូចជា អាជីព និងជំនាញវិជ្ជាជីវៈនៅក្នុងប្រព័ន្ធផ្សព្វផ្សាយ, អង្គការក្រៅរដ្ឋាភិបាល និងឪកាសការងារ, អាស៊ាន និងឪកាសការងារ, រួមចំណែកនៅក្នុងការអភិវឌ្ឍនៃវីដេអូ, សារៈសំខាន់នៃជំនួបដំបូង, តើត្រូវធ្វើដូចម្ដេចដើម្បីក្លាយជាសហគ្រិនដ៏ជោគជ័យ, តើសិស្សនិស្សិតគួរសិក្សាយ៉ាងដូចម្ដេចដើម្បីប្រឡងជាប់, តើត្រូវធ្វើដូចម្ដេចដើម្បីទទួលបានភាពជោគជ័យនៅពេលកំពុងរៀននៅសាកលវិទ្យាល័យ និងប្រធានបទដែលជាការចាប់អារម្មណ៍ ផ្សេងៗទៀត។
សូមបញ្ជាក់ថា វគ្គបណ្ដុះបណ្ដាលនីមួយៗ មានរយៈពេលពី២ ទៅ៣ ម៉ោង ហើយនឹងមានការលើកទឹកចិត្តឲ្យចូលរួមបញ្ចេញមតិយោបល់ និងការសួរសំណួរផ្សេងៗទៅវាគ្មិន។ ដោយឡែក ក៏មានការធ្វើទស្សនកិច្ចនៅស្ថានីយទូរទស្សន៍អាស៊ីអាគ្នេយ៍ ពីការបង្ហាញពីរបៀបនៃការថតវីដេអូដោយប្រើប្រាស់ទូរសព្ទដៃ iPhone , ការរៀនពីរបៀបឆុងកាហ្វេ និងការបង្រៀនខ្លីៗផ្សេងៗជាច្រើនទៀតដែលទាក់ទងនឹងបំណិនជីវិតផងដែរ៕
© រក្សាសិទ្ធិដោយ thmeythmey.com